જો તમે રસ્તામાં કોઈની લિફ્ટ લેતા હો તો આ ચોંકાવનારો કિસ્સો વાંચીને તમે સાવધાન થઈ જજો. એક ખાનગી કંપનીના બિઝનેસ હેડને ઘરે જવા માટે રસ્તામાં પ્રાઇવેટ કારની લિફ્ટ લેવાનું મોંઘું પડ્યું છે.
વિશાલના ગળા પર છરી રાખી કહ્યુ તારી પાસે જે પણ કંઈ હોય તે આપી દે
વિશાલે મોડી રાતે એક રાહદારીના ફોનથી સમગ્ર ઘટનાની જાણ તેના પરિવારજનોને કરી
કારચાલકોએ બિઝનેસ હેડનું અપહરણ કરી લૂંટી લઇ જો ફરિયાદ કરીશ તો તને અને પરિવારને જાનથી મારી નાખીશું તેવી ધમકી આપતાં ફરિયાદ નોંધાઇ છે. વટવા જીઆઇડીસીમાં આવેલ એક કંપનીમાં બિઝનેસ હેડ તરીકે ફરજ બજાવતા અને નડિયાદમાં રહેતા વિશાલ રાજપૂતે વટવા જીઆઇડીસી પોલીસ સ્ટેશનમાં ફરિયાદ નોંધાવી છે.
વિશાલના ગળા પર છરી રાખી કહ્યુ તારી પાસે જે પણ કંઈ હોય તે આપી દે
બે દિવસ પહેલાં વિશાલને કંપનીમાં વધુ કામ હોવાથી રાત્રિના નવ વાગ્યા સુધી રોકાયા હતા. ત્યારબાદ કામ પૂર્ણ કરી નડિયાદ જવા માટે જશોદાનગર ફાયર બ્રિગેડ પાસે એસટી સ્ટેન્ડ પાસે બસની રાહ જોઈ રહ્યા હતા. તે દરમિયાન એક પ્રાઇવેટ કારમાં મુસાફરના સ્વાંગમાં ત્રણ શખ્સો આવ્યા હતા અને ડ્રાઇવરે વિશાલને નડિયાદ જવું છે તેમ કહીને ગાડીમાં બેસાડ્યા હતા. વિશાલ મહેમદાવાદ રોડ થઈ હીરાપુર પાટિયા પહોંચ્યા હતા તે દરમિયાન ગાડીમાં પાછળની સાઇડમાં બેસેલ શખ્સે વિશાલના ગળા પર છરી રાખી તારી પાસે જે પણ કંઈ હોય તે આપી દે એમ કહ્યું હતું. ચાલુ ગાડીએ ડ્રાઇવર સીટની બાજુમાં બેઠેલા અન્ય શખ્સે પણ પાછળ આવી વિશાલને ધમકાવ્યો હતો. ત્યારબાદ રાસ્કા ગામની અવાવરું જગ્યાએ લઈ ગયા હતા.
જ્યાં ગાડી ઊભી રાખીને વિશાલને ગાળો બોલીને માર માર્યો હતો. વિશાલની બેગ ખેંચીને તેમાંથી ડેબિટકાર્ડ, ક્રેડિટકાર્ડ, ૭૦૦ રૂપિયા રોકડા અને મોબાઇલ લૂંટી લીધાં હતાં. ત્યારબાદ આ શખ્સો હાથીજણ થઈ વટવા તરફ અલગ અલગ એટીએમ પર પૈસા ઉપાડવા માટે ગયા હતા. શખ્સોએ વિશાલના કાર્ડમાંથી અલગ અલગ જગ્યાએ ટ્રાન્જેક્શન કરીને કુલ ૫૭ હજાર રૂપિયા ઉપાડી લીધેલ છે. અંતે શખ્સોએ વિશાલને ગોતા પાસે આવેલ ગોકુળ હોટલ નજીકની ગલીમાં લઇ જઇ ધમકી આપી હતી કે જો પોલીસ ફરિયાદ કરીશ તો તને અને તારા પરિવારને જાનથી મારી નાખીશું એમ કહીને વિશાલને ગાડીમાંથી ઉતારી રાતના બે વાગ્યે ફરાર થઈ ગયા હતા.
વિશાલે મોડી રાતે એક રાહદારીના ફોનથી સમગ્ર ઘટનાની જાણ તેના પરિવારજનોને કરી હતી. ત્યારબાદ પોલીસને જાણ કરતાં વિશાલે ત્રણ શખ્સો વિરુદ્ધ ફરિયાદ નોંધાવતાં પોલીસે હાલ ગુનો નોંધી સીસીટીવી ફૂટેજ મેળવી વધુ તપાસ હાથ ધરી છે.