ભૂસ્ખલન / VIDEO: મોન્સૂનની મજા માણવા સાપુતારા જતાં પહેલા વિચારજો, અનેક જગ્યાએ લેન્ડસ્લાઇડ 

• ડાંગમાં આફતનો વરસાદ, સતત વરસાદને કારણે ભૂસ્ખલન 
• સાપુતારા વઘઇ રોડ પર ભૂસ્ખલનને કારણે માર્ગ અવરોધાયો 
• સાપુતારા જતાં સહેલાણીઓને મુશ્કેલી

રાજ્યમાં મેઘમહેર વચ્ચે ડાંગથી એક મોટા સમાચાર સામે આવ્યા છે. જો તમે ચોમાસાની મજા માણવા માટે સાપુતારા જવાના હોય તો પહેલા ત્યાંની સ્થિતિ જાણી લેજો. ભારે વરસાદ વચ્ચે હવે સાપુતારા-વધઇ રોડ ઉપર ભૂસ્ખલનની ઘટના સામે આવી છે. આ તરફ  ભૂસ્ખલનને કારણે માર્ગ અવરોધાતા સાપુતારા જતાં સહેલાણીઓને મુશ્કેલી પડી રહી છે. 

ડાંગમાં આફતનો વરસાદ

ડાંગમાં ભારે વરસાદને કારણે ઠેર-ઠેર વરસાદી પાણી ભરાઈ ગયા છે. આ તરફ કુદરતી સૌંદર્યથી ભરપૂર સાપુતારા પંથકમાં ભૂસ્ખલનની ઘટના સામે આવી છે. વિગતો મુજબ આજે સવારે સતત વરસાદને કારણે ડાંગમાં ભૂસ્ખલનની ઘટના સામે આવી છે. જસાપુતારા વઘઇ રોડ પર અનેક જગ્યાએ ભૂસ્ખલનને કારણે માર્ગ અવરોધાતા સાપુતારા જતાં સહેલાણીઓને મુશ્કેલી પડી રહી છે. 

#WATCH गुजरात: लगातार हो रही बारिश के कारण गुजरात के डांग में सापुतारा वाघई रोड पर कई जगहों पर भूस्खलन हुआ। pic.twitter.com/XXNdc50iSx

— ANI_HindiNews (@AHindinews) July 11, 2022

હજી 5 દિવસ ગુજરાતને ઘમરોળશે મેઘરાજા 

ગુજરાતમાં હજુ 5 દિવસ ભારે વરસાદની આગાહી વચ્ચે રાજ્યના 8 જિલ્લાઓમાં વરસાદને લઈને અલર્ટ આપવામાં આવ્યું છે. રાજ્યમાં છોટાઉદેપુર, ભરૂચ, નર્મદા, તાપી અને ડાંગમાં રેડ અલર્ટ આપવામાં આવ્યું છે. તો બીજી બાજુ સુરત, નવસારી અને વલસાડમાં પણ રેડ અલર્ટ આપવામાં આવ્યું છે. રાજ્યમાં અત્યાર સુધીમાં 10 હજાર 674 લોકોનું સ્થળાંતર કરાયું છે.

રાજ્યમાં 24 મંત્રીઓને જિલ્લાવાર જવાબદારી સોંપાઇ

ગુજરાતના ભરૂચ, તાપી, નર્મદા, સુરત, વલસાડ, ડાંગ અને છોટાઉદેપુર, અમદાવાદ સહિતના જિલ્લામાં અનરાધાર વરસાદને પગલે જળપ્રલય જેવી સ્થિતિનું નિર્માણ થયુ છે. જેને લઇને ભારે વરસાદની સ્થિતિ સામે સરકાર એક્શન મૉડમાં આવી ગઈ છે. આ મામલે મુખ્ય સચિવ પંકજકુમારે તમામ જિલ્લાના ઉચ્ચ અધિકારીઓને ઝીરો કેઝ્યુલિટીના અભિગમ સાથે રાહત બચાવની કામગીરી કરવા સૂચનાઓ આપી હતી. તો બીજી તરફ 24 મંત્રીઓને અલગ-અલગ જિલ્લાઓમાં પ્રભારી બનાવાયા છે અને પૂરઅસરગ્રસ્ત આઠ જિલ્લાઓમાં પ્રભારી જિલ્લામાં મંત્રીઓને સ્થાનિક વહીવટી તંત્ર સાથે બેઠક કરવાની સૂચના અપાઈ છે. 

• પૂર્ણશ મોદી: ભરૂચ અને નર્મદા
• મુકેશ પટેલ: તાપી
• કનું દેસાઇ: સુરત અને વલસાડ
• નરેશ પટેલ: ડાંગ
• નિમિષાબેન સુથાર: છોટાઉદેપુર
• ઋષિકેશ પટેલ: અમદાવાદ

ડેડિયાપાડામાં સૌથી વધુ 19.5 ઈંચ વરસાદ ખાબક્યો

રાજ્યમાં એક દિવસમાં 224 તાલુકાઓમાં વરસાદે રમઝટ બોલાવી છે. ત્યારે ગુજરાતના ડેડિયાપાડામાં સૌથી વધુ વરસાદ વરસ્યો છે. ડેડિયાપાડામાં 19.5 ઈંચ વરસાદ ખાબક્યો છે. તો સાથે તિલકવાડા, નાંદોદ, સુબિર અને ડાંગમાં પણ વ્યાપક વરસાદ જોવા મળી રહ્યો છે.