અમદાવાદ / તહેવારોમાં ખરીદી કરવા જતા લોકો કોરોનાની સાથે આ વસ્તુનો પણ ખ્યાલ રાખજો નહીંતો દિવાળી બગડશે

• દિવાળીના તહેવારમાં ખરીદી માટે જાઓ તો સાવચેત રહેજો
• ગ્રાહકના સ્વાંગમાં ચોર ટોળકી ત્રાટકી
• મહિલાના ચાર તોલાના દાગીના ચોરાયા

લોકડાઉન બાદ આવેલી મંદીના કારણે હજારો લોકો બેકાર થયા છે પરંતુ દિવાળી આવતાંની સાથે જ બજારમાં તેજી હોય તેવું લાગી રહ્યુ છે. દિવાળીને હવે ગણતરીના દિવસો બાકી રહ્યા છે ત્યારે લોકોએ મન મૂકીને ખરીદી કરવાનું શરૂ કરી દીધું છે. લાલ દરવાજા, પાનકોરનાકા, ઢાલગરવાડ, શહેરના વિવિધ મોલમાં હજારો લોકો ગઇ કાલે ખરીદી માટે ઊમટ્યા હતા. કીડિયારું ઊભરાયું હોય તેમ લોકોની ભીડ લાલ દરવાજા બજારમાં જોવા મળી હતી. 

કોરોના વાઇરસના કારણે સોશિયલ ડિસ્ટન્ટસનું ભાન ભૂલીને લોકોએ ખરીદી કરી હતી. જેનો પુરેપુરો ફાયદો ચોર ટોળકીઓએ ઉઠાવ્યો હતો. ગઇ કાલે લાલ દરવાજાના બજારમાં ગ્રાહકના સ્વાંગમાં ચોર ટોળકી ત્રાટકી હતી જેમાં સંખ્યાબંધ લોકોનાં ખિસાં કાતરી લીધાં હતાં. પોલીસ સૂત્રોના જણાવ્યા અનુસાર સંખ્યાબધ લોકોનાં ખિસાંમાંથી ભીડનો લાભ ઉઠાવીને ચોર ટોળકીએ નાની મોટી ચોરીઓ કરી હતી. ચોરી કરતી મહિલા, બાળકો ભીડમાં ગ્રાહક બનીને ઘૂસી ગયા હતા અને તકનો લાભ લઇને ચોરી કરી હતી. 

વડોદરા ખાતે આવેલા શીતલકુંજ સોસાયટીમાં રહતાં સુધાબહેન બ્રહ્મભટ્ટે કારંજ પોલીસ સ્ટેશનમાં ચોરીની ફરિયાદ કરી છે. દીકરાનાં લગ્ન હોવાથી સુધાબહેન શહેરના થલતેજ વિસ્તારમાં રહેતા ભાઇના ઘરે આવ્યાં હતાં. સુધાબહેન ભાઇને આપવા માટે મંગળસૂત્ર સહિતના દાગીના એક પર્સમાં મૂકીને વડોદરાથી અમદાવાદ એસ.ટી.બસમાં આવ્યા હતા. 

ગીતા મંદિર ઊતરતાની સાથે જ સુધાબહેનનાં ચંપલ તૂટી ગયાં હતાં. જેમાં તેઓ સીધાં નવાં ચંપલ અને થોડીક ખરીદી કરવા માટે લાલ દરવાજા પહોચ્યા હતાં. લાલ દરવાજા બજારમાં તે લારી પરથી બક્કલ લઇ રહ્યા હતા ત્યારે ચોર ટોળકી નજર ચૂકવીને સોનાના દાગીના ભરેલું પર્સ ચોરીને નાસી ગઈ હતી. સુધાબહેને લારી વાળાને રૂપિયા આપવા માટે પર્સ ખોલ્યું તો દાગીનાનું પર્સ ગાયબ હતું. આ મામલે સુધાબહેન કાંરજ પોલીસ સ્ટેશનમાં ચોરીની ફરિયાદ કરી છે. પોલીસે આ મામલે ગુનો દાખલ કરીને તપાસ શરુ કરી છે. 

કેટલીક ફરિયાદો પોલીસ ચોપડે નોંધાઇ નથી 

પોલીસ સૂત્રોના જણાવ્યા અનુસાર ગઇકાલે સંખ્યાબંધ ચોરી થઇ છે. જેમાં કોઇના ૫૦૦ રૂપિયા ચોરાયા છે તો કોઇના બે હજાર રૂપિયા ચોરાયા છે. નાની નાની ચોરી થઇ હોવાના કારણે ફરિયાદીઓ પોલીસ સ્ટેશનમાં આવ્યા હતા પરંતુ તેમને ફરિયાદ કરવાનું ટાળ્યું હતું. 

ગ્રાહક બનીને પોલીસે લોકો પર નજર રાખી

દર વર્ષે દિવાળીના સમયે બજારમાં ચોરી ટોળકી ગ્રાહકના સ્વાંગમાં આવતી હોય છે જેને રોકવા માટે પોલીસની ટીમ સિવિલ ડ્રેસ પહેરીને પોતાનું ડ્યુટી કરી હતી. પોલીસ ગ્રાહક બનીને આખો દિવસ બજારમાં ફરતી રહી અને લોકો પર નજર રાખી હતી. 

ગત વર્ષ કરતાં ચોરીનું પ્રમાણ ઓછું 

ગત વર્ષે લાલ દરવાજામાં લોકોનાં પર્સની અસંખ્ય ચોરી થઇ હતી જેની ફરિયાદો પણ પોલીસ મથકમાં નોધાઇ હતી. સૂત્રોના જણાવ્યા અનુસાર ગત વર્ષે લાખો રૂપિયાની ચોરી થઇ હતી.