સ્પોર્ટ્સ / બર્થ ડે બોય થીએમે US ઓપનમાં સુમિત નાગલને હરાવી ભારતીય સફર થંભાવી

પ્રથમ રાઉન્ડમાં શાનદાર અંદાજમાં અમેરિકન ખેલાડી બ્રાડલે ક્લાનને હરાવીને બીજા રાઉન્ડમાં પહોંચેલા ભારતના મેન્સ સિંગલ્સના યુવા ખેલાડી સુમિત નાગલની સફર ત્રીજા ક્રમાંકિત ડોમિનિક થીએમે હરાવીને પોતાનો ૨૭મો બર્થ ડે સેલિબ્રેટ કર્યો હતો. ગઈ કાલે રમાયેલી આ મેચમાં ઓસ્ટ્રિયાના ડોમિનિક થીએમે સુમિત નાગલને ૬-૩, ૬-૩, ૬-૨થી સીધા સેટોમાં પરાજય આપીને ત્રીજા રાઉન્ડમાં પ્રવેશ મેળવી લીધો છે.

સુમિત નાગલે બે કલાક એક મિનિટ સુધી થીએમના પડકારોનો સામનો કર્યો

સુમિત નાગલે બે કલાક એક મિનિટ સુધી થીએમના પડકારોનો સામનો કર્યો હતો,પરંતુ તે ક્યારેય થીએમ સામે સરસાઈ મેળવી શક્યો નહોતો. ગઈ કાલે રાત્રે જ્યારે સુમિત પોતાના મુકાબલા માટે ઓસ્ટ્રિયાના ડોમિનિક થીએમ સામે ઊતર્યો ત્યારે સમગ્ર ભારતની નજર તેના પર ટકેલી હતી. પ્રથમ સર્વિસ થીએમે કરી, જ્યારે મેચનો પ્રથમ પોઇન્ટ નાગલે હાંસલ કર્યો હતો. ત્યાર બાદ થીએમે ક્રોસ કોર્ટ ફોરહેન્ડ દ્વારા પોતાનો પ્રથમ પોઇન્ટ હાંસલ કર્યો હતો અને પછીના ત્રણ પોઇન્ટ પણ પોતાના નામે કરીને થીએમે પ્રથમ ગેમ પોતાના નામે કરી લીધી હતી. 

સુમિતનો પરાજય થતાં કરોડો ભારતીય ટેનિસ ચાહકો નિરાશ

બીજા સેટની શરૂઆતમાં જ થીએમે શરૂઆતની બે ગેમ જીતી લીધી હતી. ત્રીજા સેટમાં નાગલે થોડો સંઘર્ષ કર્યો અને બંને વચ્ચે કેટલીક રેલીઓ પણ જોવા મળી હતી, પરંતુ આખરે નાગલ ત્રીજી ગેમ જીતીને સ્કોર ૧-૨ કરવામાં સફળ રહ્યો. જોકે ત્યાર બાદ ફરીથી બંને વચ્ચે જોરદાર સંઘર્ષ જોવા મળ્યો, પરંતુ આખરે નાગલ આ સેટ પણ ગુમાવી બેઠો હતો. થીએમે આ સેટ પણ ૩૩ મિનિટમાં ૬-૩થી જીતી લીધો હતો. આમ સુમિતનો પરાજય થતાં કરોડો ભારતીય ટેનિસ ચાહકો નિરાશ થયા હતા. 

જોકે સુમિત નાગલ પણ જાણતો હતો કે થીએમ સામે મુકાબલો આસાન નથી રહેવાનો અને એ જ કારણે પ્રથમ રાઉન્ડમાં જીત્યા બાદ થીએમ સામેના મુકાબલા અંગે તેણે કહ્યું હતું, ''હું તેની સામે રમવા તૈયાર છું. હું એ મેચનો આનંદ માણીશ.''