સુરતમાં ચોરી કરવાના ઇરાદે ઘરમાં ઘૂસેલા ચોરનુ મોત થયું હોવાનું સામે આવ્યું છે. 11 જેટલા ગુન્હામાં પોલીસ ચોપડે ચડેલો આરોપી ઘરમાં ઘૂસતી વેળાએ પટકાતાં તેનું મોત નીપજ્યું હતું.
સુરતમાં ચોરી કરવા ઘરમાં ઘૂસેલા ચોરનું મૃત્યુ
અજય ઉર્ફ ગોરો વસાવા નામના શખ્સનું મૃત્યુ
કાપોદ્રા વિસ્તારમાં ચોરી કરવા ગયો હતો ચોર
સુરતમાં ચોરી કરી રૂપિયા કમાવાની લાલચ રાખતા યુવાનને આ લાલચ મોંઘી ત્યારે પડી જ્યારે ચોરી કરવા ઘૂસેલો ચોર ઘર પરથી પટકાતાં તેનું કમકમાટીભર્યું મોત નીપજ્યું. સુરતમાં ચોરી કરવાના ઇરાદે અજય ઉર્ફ ગોરો વસાવા નામનો શખ્સ એક રહેણાંક મકાનમાં ઘૂસ્યો હતો. સુરતના કાપોદ્રા વિસ્તારમાં મમતા પાર્કના મકાનમાં ચોરી કરવા આરોપી ગયો હતો. આ દરમિયાન રહેણાંક મકાનમાં ઘૂસવા જતી વેળાએ અકસ્માત સર્જાયો હતો.
ઉપરથી ઘરમાં ઘૂસવાના પ્રયાસમાં ચોરે જીવ ગુમાવ્યો
સુરતના મમતા પાર્કમાં ચોરી કરવાના ઇરાદે ત્રાટકેલ શખ્સ મકાન ઉપરથી ઘરમાં ઘૂસવાનો પ્રયાસ કરતો હતો. આ વેળાએ આરોપી અકસ્માતે મકાન ઉપરથી નીચે પટકયો હતો આ દરમિયાન તેનું ઘટના સ્થળે જ મોત નીપજ્યું હતું. ચોરે જીવ ગુમાવ્યો હોવાનું સામે આવતા તાત્કાલિક સ્થાનિક પોલીસને જાણ કરવામાં આવી હતી. જેને લઇને પોલીસ દોડી આવી હતી. આ દરમિયાન પોલીસની પ્રાથમિક તપાસમાં આરોપીએ ઘરફોડ ચોરીના અગાઉ 11 ગુના આચર્યા હોવાનું સામે આવ્યું છે.
આશરે બે માસ અગાઉ સુરતમાં ચોરની ગાડીને નડ્યો હતો આકસ્માત
આશરે બે માસ અગાઉ સુરતમાં ચોરની ગાડીને આકસ્માત નડ્યો હતો. જેમાં કાર લઇને ઇચ્છાપોર નજીક બાંધકામ સાઇટ ઉપર ચોરી કરવા આવેલા યુવક કિંમતી લોખંડની રીંગો ચોરી કરીને ભાગતો હતો. આ દરમિયાન તેની કારને અકસ્માત નડ્યો હતો. કાર ડિવાઇડર સાથે ભટકાતા અકસ્માત સર્જાયો હતો જેને પગલે આરોપીને કાર છોડીને ચોરી કરેલો માલ મૂકીને જ ભાગી જવું પાડવાનો વારો આવ્યો હતો. આ દરમિયાન પોલીસ દોડી ગઇ હતી જ્યાં તપાસ હાથ ધરતા ગાડીમાં ચોરાયેલી લોખંડની રીંગો મળી આવી હતી. જેને લઇને પોલીસે ચોરી અને એક્સીડેન્ટનો ગુનો નોંધી કાર કબજે લીધી હતી.