શહેરમાં ગુનાખોરીનો ગ્રાફ ઘટવાની જગ્યાએ વધી રહ્યો છે. ચોરી-લૂંટ જેવી ઘટનાઓ હવે શહેરમાં સામાન્ય બની છે ત્યારે શહેરમાં કાર તેમજ એક્ટિવાની ડેકી તોડી ચોરી કરતી ગેંગનો આતંક વધી ગયો છે. એક યુવક ઇસનપુરની દેના બેન્કમાં ડેબિટકાર્ડ ચાલુ કરવા ગયો ને ગઠિયો એક્ટિવાની ડેકીમાંથી રૂ.એક લાખની રોકડ રકમની ચોરી કરીને ફરાર થઇ ગયાે હોવાની ઘટના પ્રકાશમાં આવી છે.
ચોરીની નવી મોડેસ ઓપરેન્ડી
1 લાખ રૂપિયા એક્ટિવાની ડેકીમાં મૂક્યા હતા
પોલીસે સીસીટીવી ફૂટેજના આધારે ગઠિયાની શોધખોળ શરૂ કરી
વસ્ત્રાલમાં આવેલા સરોવર ફ્લેટમાં રહેતા વિનયકુમાર મિશ્રાએ અજાણ્યા શખ્સ વિરુદ્ધમાં નારોલ પોલીસ સ્ટેશનમાં ફરિયાદ કરી છે. વિનયકુમાર નારોલમાં આવેલ ભાગ્યલક્ષ્મી પ્લાસ્ટિક ઇન્ડસ્ટ્રીઝ નામની કંપનીમાં ક્વોલિટી કંટ્રોલ ઇન્ચાર્જ તરીકે નોકરી કરે છે.
1 લાખ રૂપિયા એક્ટિવાની ડેકીમાં મૂક્યા હતા
થોડા દિવસ પહેલાં વિનયકુમાર નોકરી પર હાજર હતા ત્યારે કંપનીમાં રોકડની જરૂર હોવાથી કંપનીના એકાઉન્ટમાંથી પૈસા ઉપાડવા માટે એક્ટિવા લઈને ઇસનપુર એક્સિસ બેન્કમાં ગયા હતા. બેન્કમાંથી એક લાખ રૂપિયા લઈને એક્ટિવાની ડેકીમાં મૂક્યા હતા. ત્યાંથી વિનયકુમાર ઇસનપુર ગોવિંદવાડી પાસે આવેલ દેના બેન્કમાં ડેબિટકાર્ડ ચાલુ કરાવવા માટે બેન્ક બહાર એક્ટિવા પાર્ક કરીને બેન્કમાં ગયા હતા. પંદર મિનિટ પછી બેન્કનું કામ પતાવીને તેઓ પરત તેમના એક્ટિવા પાસે આવ્યા હતા ત્યારે વિનયકુમારે ડેકી ખોલી તો તેમાં મૂકેલા એક લાખ રૂપિયા ગાયબ હતા.
પોલીસે સીસીટીવી ફૂટેજના આધારે ગઠિયાની શોધખોળ શરૂ કરી
વિનયકુમાર દેના બેન્કમાં ગયા તે દરમિયાન કોઇ ગઠિયાએક્ટિવાનું લોક ખોલી ડેકીમાં મૂકેલ એક લાખની રોકડ રકમ લઈને ફરાર થઇ ગયો હતો આથી વિનયકુમારે તુરંત જ આ મામલે પોલીસને જાણ કરી હતી. ત્યારબાદ પોલીસ પણ આ ઘટનાને લઇ સક્રિય થઇ ગઇ હતી અને નારોલ પોલીસે સીસીટીવી ફૂટેજના આધારે ગઠિયાની શોધખોળ શરૂ કરી છે.