30 મે થી ICC World Cup 2019ની શરૂઆત થઇ રહી છે. આ વખતે મેજબાન ઇંગ્લેન્ડ હશે. ભાગ લેનારી તમામ 10 ટીમો તૈયાર છે. દરેક ટીમના કેપ્ટન પોતપોતાની તૈયારી કરી રહ્યા છે. ત્યારે પોતાની ટીમને ચેમ્પિયન બનાવવા માટે આ દસ સેનાપતિઓ મેદાનમાં ઊતરશે.
વિરાટ કોહલી (ભારત): ૧૯૮૩ અને ૨૦૧૧નો વર્લ્ડકપ જીતનારી ટીમ ઇન્ડિયા આ વખતે વિરાટ કોહલીની કેપ્ટનશિપમાં આ મહાકુંભમાં ઊતરી રહી છે. વિરાટ વર્લ્ડકપમાં પ્રથમ વાર કેપ્ટનશિપ સંભાળતો જોવા મળશે. કોહલીએ અત્યાર સુધી રમેલી ૨૨૭ વન ડે મેચમાં ૫૯.૫૭ની શાનદાર સરેરાશથી ૧૦,૮૪૩ રન બનાવ્યા છે, જેમાં ૪૧ સદી સામેલ છે. આ ઉપરાંત વિરાટે ૬૮ મેચમાં કેપ્ટનશિપ સંભાળવાનો અનુભવ પણ મેળવી લીધો છે.
ઈયોન મોર્ગન (ઈંગ્લેન્ડ): ૨૦ વર્ષ બાદ ઈંગ્લેન્ડ ફરી એક વાર વર્લ્ડકપની યજમાની કરી રહ્યું છે. છેલ્લે ૧૯૯૯ના વર્લ્ડકપની યજમાની કરનારી આ ટીમ આ વખતે ઈયોન મોર્ગનની કેપ્ટનશિપમાં મેદાનમાં ઊતરશે. ક્રિકેટ ચાહકો ઈંગ્લેન્ડને વર્લ્ડકપ જીતવા માટે પ્રબળ દાવેદાર માની રહ્યા છે. મોર્ગને અત્યાર સુધી ૨૨૨ વન ડેમાં ૩૯.૬૪ની સરેરાશથી ૬૯૭૭ રન બનાવ્યા છે, જેમાં ૧૨ સદી સામેલ છે. પોતાના ચોથા વર્લ્ડકપમાં ઊતરી રહેલા ૩૨ વર્ષીય મોર્ગનને ૧૦૦ મેચમાં ટીમનું નેતૃત્વ સંભાળવાનો અનુભવ છે.
એરોન ફિંચ (ઓસ્ટ્રેલિયા): પાંચ વાર વર્લ્ડ ચેમ્પિયન બનેલા ઓસ્ટ્રેલિયાની નજર છઠ્ઠા ખિતાબ પર છે અને આ વખતે ટીમનું નેતૃત્વ એરોન ફિંચ સંભાળી રહ્યો છે. ૩૨ વર્ષીય ફિંચ અત્યાર સુધી ૧૦૯ વન ડે મેચમાં ૩૯.૩૩ની સરેરાશથી ૪૦૫૨ રન બનાવી ચૂક્યો છે, જેમાં ૧૩ સદી પણ સામેલ છે. ફિંચને માત્ર ૧૮ મેચમાં કેપ્ટનશિપ સંભાળવાનો અનુભવ છે.
સરફરાઝ અહમદ (પાકિસ્તાન): ૧૯૯૨ના વર્લ્ડકપ ચેમ્પિયન પાકિસ્તાનની નજર બીજી વાર ખિતાબ જીતવા પર છે અને ટીમની કેપ્ટનશિપ વિકેટકીપર-બેટ્સમેન સરફરાઝ અહમદ સંભાળી રહ્યો છે. ૩૨ વર્ષીય સરફરાઝે અત્યાર સુધી ૧૦૬ વન ડેમાં ૩૪.૮૮ની સરેરાશથી ૨૧૨૮ રન બનાવ્યા છે, જેમાં બે સદી પણ સામેલ છે. વિકેટકીપર તરીકે તેણે ૧૪૬ કેચ ઝડપ્યા છે અને ૨૧ સ્ટમ્પિંગ પણ કર્યા છે. તે ૪૦ મેચમાં પાકિસ્તાનની ટીમનું નેતૃત્વ સંભાળી રહ્યો છે.
ફાફ ડુ પ્લેસી (દક્ષિણ આફ્રિકા): દક્ષિણ આફ્રિકાને મોટી ટૂર્નામેન્ટની 'ચોકર્સ' ટીમ માનવામાં આવે છે અને આ વખતે ૩૪ વર્ષીય ફાફ ડુ પ્લેસીની કેપ્ટનશિપમાં આ ટીમ રમવાની છે. પોતાના પ્રથમ વર્લ્ડકપ ખિતાબની શોધમાં આ ટીમના કેપ્ટને અત્યાર સુધી રમેલી ૧૩૪ વન ડે મેચમાં ૪૬.૫૪ની સરેરાશથી ૫૧૨૦ રન બનાવ્યા છે, જેમાં ૧૧ સદી સામેલ છે. ફાફ ડુ પ્લેસી ૩૦ મેચમાં ટીમને લીડ કરી ચૂક્યો છે.
કેન વિલિયમ્સન (ન્યૂઝીલેન્ડ): ગત વર્લ્ડકપમાં રનરઅપ રહેલી ન્યૂઝીલેન્ડની ટીમ આ વખતે કેન વિલિયમ્સનના નેતૃત્વમાં પોતાનો પ્રથમ ખિતાબ જીતવાની પૂરી કોશિશ કરશે. ૨૮ વર્ષીય વિલિયમ્સને અત્યાર સુધી ૧૩૯ વન ડેમાં ૪૫.૯૦ની સરેરાશથી ૫૫૫૪ રન ૧૧ સદી સાથે બનાવ્યા છે. વિલિયમ્સન પાસે ૬૫ મેચમાં કેપ્ટનશિપ સંભાળવાનો અનુભવ છે.
મુશરફે મુર્તઝા (બાંગ્લાદેશ): ૨૦૧૯નો વર્લ્ડકપ રાઉન્ડ રોબિન અને નોકઆઉટ ફોર્મેટમાં રમવાનો છે અને આ જ કારણે બાંગ્લાદેશની ટીમ પણ ખિતાબ જીતી શકે છે. બાંગ્લાદેશની ટીમ ૩૫ વર્ષીય મુશરફે મુર્તઝાની કેપ્ટનશિપમાં મેદાનમાં ઊતરી રહી છે. ૨૦૯ વન ડે મેચમાં ૩૧.૬૯ની સરેરાશથી ૧૭૫૨ બનાવવાની સાથે ૨૬૫ વિકેટ ઝડપનારા આ ખેલાડીએ ૭૭ મેચમાં બાંગ્લાદેશની ટીમનું નેતૃત્વ સંભાળ્યું છે.
દિમુથ કરુણારત્ને (શ્રીલંકા): શ્રીલંકાની ટીમ આ વખતે ૩૧ વર્ષીય દિમુથ કરુણારત્નેની કેપ્ટનશિપમાં રમી રહી છે. ૧૯૯૬માં ઓસ્ટ્રેલિયાને હરાવીને વર્લ્ડકપનો ખિતાબ જીતનારી શ્રીલંકાની ટીમના કેપ્ટનને ૧૮ વન ડે મેચનો અનુભવ છે, જેમાંથી માત્ર એક મેચમાં તેણે ટીમનું નેતૃત્વ સંભાળ્યું છે.
જેસન હોલ્ડર (વિન્ડીઝ): ૧૯૭૫ અને ૧૯૭૯નો વર્લ્ડકપ જીતનારી વિન્ડીઝ ટીમની નજર ત્રીજો ખિતાબ જીતવા પર છે. ક્રિસ ગેલ, આન્દ્રે રસેલ, શિમરોન હેટમાયર વગેરે સ્ટાર ખેલાડીઓ ધરાવતી આ ટીમ જેસન હોલ્ડરની કેપ્ટનશિપમાં પોતાની નવી ઓળખ બતાવવા માટે ઉત્સુક છે. ૨૭ વર્ષીય હોલ્ડર અત્યાર સુધી ૯૫ વન ડે રમ્યો
છે અને મજાની વાત એ છે કે તેમાંથી ૭૪ મેચમાં તેણે ટીમનું નેતૃત્વ કર્યું છે.
ગુલબદ્દીન નઇબ (અફઘાનિસ્તાન): અફઘાનિસ્તાનની ટીમે પાછલાં કેટલાંક વર્ષોમાં પોતાના પ્રદર્શનથી બધાનાં દિલ જીતી લીધાં છે અને આ વખતે તે ૨૮ વર્ષીય ગુલબદ્દીન નઇબની કેપ્ટનશિપમાં વર્લ્ડકપ રમશે. ૫૫ વન ડે મેચમાં ૮૩૦ રન બનાવનારા આ ખેલાડીએ પોતાની ઝડપથી ૫૫ ખેલાડી (સરેરાશ ૩૦.૪૦)ને આઉટ કર્યા છે. નઇબને જોકે ત્રણ જ મેચમાં કેપ્ટનશિપ સંભાળવાનો અનુભવ છે. રાશિદ ખાન, મોહંમદ શહઝાદ અને મોહંમદ નબી જેવા સ્ટાર ખેલાડીઓનો ઉપયોગ કેવી રીતે કરશે તે જોવું રસપ્રદ બની રહેશે.