તમારી આવી સામાન્ય ભૂલોને કારણે થાય છે કિડનીમાં પથરીની સમસ્યા. જાણીને આજથી જ ધ્યાન આપજો.
કિડની સ્ટોનનો દુખાવો ખૂબ જ ભયંકર હોય છે
આ 5 ભૂલોને કારણે થાય છે કિડનીમાં પથરી
વહેલાં જ લક્ષણો ઓળખી લેવા છે જરૂરી
ઘણીવખત શરીરમાં રહેલું સોલ્ટ અને ખનિજો નાના નાના ક્રિસ્ટલના સ્વરૂપમાં કિડનીમાં જમા થવા લાગે છે અને તેને જ કિડની સ્ટોન કહેવાય છે. આ સિવાય જ્યારે વ્યક્તિના પેશાબમાં પ્રવાહીનું પ્રમાણ ઘટી જાય અને કેલ્શિયમ, ઓક્સાલેટ અને યુરિક એસિડનું પ્રમાણ વધી જાય ત્યારે કિડની સ્ટોન બનવા લાગે છે. આ સ્ટોન રેતીના દાણા જેટલા બારીક પણ હોઈ શકે છે, જે સરળતાથી પેશાબ વાટે બહાર નીકળી જાય છે અથવા તો સાઈઝમાં એટલા મોટા પણ હોય છે, જેના કારણે કિડની ફંક્શન અવરોધાય છે. કિડની સ્ટોનનો દુખાવો ખૂબ જ ભયંકર હોય છે.
કિડની સ્ટોનના લક્ષણોની વાત કરીએ તો આ સમય દરમિયાન દર્દીને પાંસળીની નીચે અને શરીરની એક બાજુ સખત દુખાવો થવા લાગે છે, પેશાબ કરતી વખતે તીવ્ર બળતરા અને પીડા થઈ શકે છે અને ઉલટી જેવું પણ થઈ શકે છે. ઘણીવાર તમે શું ખાવ છો, કેવી રીતે ખાવ છો, કઈ દવાઓ ખાવ છો અથવા તમારી ફેમિલી હિસ્ટ્રીમાં કિડની સ્ટોનની સમસ્યા છે કે નહીં, આ કારણોને લીધે કિડની સ્ટોનનું જોખમ રહેલું હોય છે. પરંતુ કેટલીકવાર આપણી કેટલીક રોજીંદી આદતો અને ભૂલોને લીધે પણ કિડનીમાં પથરીની સમસ્યા થાય છે.
પાણી ઓછું પીવું
જો કોઈ વ્યક્તિ દરરોજ પૂરતા પ્રમાણમાં પાણી પીતું નથી તો તેના કારણે માત્ર શરીરમાં પાણીનો અભાવ નથી થતો, પરંતુ કિડનીમાં સ્ટોન બનવાનું જોખમ પણ વધી જાય છે. ડિહાઈડ્રેશનને લીધે પેશાબમાં કેલ્શિયમ ક્રિસ્ટલ સ્વરૂપમાં જામવા લાગે છે. જેથી દરરોજ 2-3 લિટર પાણી પીવો. આ સાથે જ તમે નાળિયેર પાણી, જ્યૂસ વગેરેનું સેવન પણ કરી શકો છો.
સોડિયમનું વધુ સેવન
તમે જે ખાવ છો તેના કારણે પણ કિડની સ્ટોનનું જોખમ વધે છે. બ્રોકોલી, ચોકલેટ, બદામ, પાલક આ એવા ખોરાક છે જેમાં ઓક્સાલેની માત્રા સૌથી વધુ હોય છે. જો આ વસ્તુઓનું વધુ સેવન કરવામાં આવે તો ઓક્સાલેટ કેલ્શિયમ સાથે ચોંટીને કિડનીમાં પથરી બનાવવાનું શરૂ કરે છે. આ સિવાય જો તમે વધારે સોડિયમ ખાઓ છો, તો તેના કારણે કિડનીમાં પથરી બનવાનું જોખમ વધી જાય છે.
ડાયાબિટીસ
ખાસ કરીને ટાઇપ 2 ડાયાબિટીસ રોગ દર્દીના પેશાબને એસિડિક બનાવે છે, જેના કારણે સ્ટોન બનવાનું જોખમ વધારે છે. ઉપરાંત, આ રોગ પેશાબના કોમ્પોઝિશનને પણ બદલી દે છે. જેથીડાયાબિટીસના દર્દીઓએ બ્લડ શુગરને નિયંત્રણમાં રાખવું જોઈએ નહીં તો કિડની સ્ટોનનું જોખમ વધે છે.
સ્થૂળતા
વધુ વજનના લોકોને પણ કિડની સ્ટોનનો ખતરો રહે છે. જે વ્યક્તિનું બીએમઆઈ 30થી વધુ છે તેમને જોખમ સૌથી વધુ છે. જેથી વજન હમેશાં કંટ્રોલમાં રાખો.
કેલ્શિયમ સપ્લિમેન્ટ્સ લેવા
હાડકાં અને દાંતને મજબૂત રાખવા માટે શરીરને કેલ્શિયમની જરૂર હોય છે, પરંતુ જો તમે કેલ્શિયમના સપ્લિમેન્ટ્સનું વધુ પ્રમાણમાં સેવનકરો છો તો તમને કિડનીમાં સ્ટોન થવાનું જોખમ વધી જાય છે.