આઈપીએલ / IPL-૨૦૨૧માં આ ખેલાડીઓ પર નાણાંનો વરસાદ વરસશે, જાણો કોણ કોણ છે રેસમાં

• રિલીઝ કરાયેલા પ્લેયર્સ પર ફરી મોટો દાવ રમાઈ શકે છે
• રિલીઝ કરેલા પ્લેયર્સ ફરી એકવાર ફોર્મમાં જોવા મળી રહ્યાં છે
• પ્લેયર્સને રિલીઝ કરવાનો નિર્ણય અમુક ટીમ ફ્રેન્ચાઈઝીને મોંઘો પડી શકે છ

ખેલાડીઓની હરાજીમાં ઘણાં ખેલાડીઓને મળી શકે છે મોટી રકમ
આઇપીએલની ૧૪મી સિઝનની તૈયારીઓ શરૂ થઈ ચૂકી છે. મિની ઓક્શન ફેબ્રુઆરીમાં યોજાવાનું છે. બધી ટીમોએ ખેલાડીઓને રિટેન અને રિલીઝ કરી દીધા છે. ફ્રેંચાઇઝીઓ દ્વારા ઘણા ચોંકાવનારા નિર્ણયો પણ લેવામાં આવ્યા છે, જેમાં સ્ટીવ સ્મિથનું નામ સૌથી પહેલાં આવે છે. ઘણી ફ્રેંચાઈઝી દ્વારા મોટા ખેલાડીઓને રિલીઝ કરી દેવામાં આવ્યા છે. આવા દિગ્ગજ ખેલાડીઓ પર હરાજી દરમિયાન નાણાંનો વરસાદ થઈ શકે છે. આજે એવા ખેલાડી પર નજર કરીએ, જેઓ હરાજી દરમિયાન મોટી રકમમાં વેચાઈ શકે છે.

સ્ટીવ સ્મિથ પર ઉંચી બોલી લાગી શકે છે
સ્ટીવ સ્મિથઃ આગામી હરાજી દરમિયાન ઓસ્ટ્રેલિયાના સ્ટાર ખેલાડી સ્ટીવ સ્મિથ પર ઊંચી બોલી લાગી શકે છે. તાજેતરમાં રાજસ્થાન રોયલ્સે સ્મિથને રિલીઝ કરી દીધો છે. હાલ સ્મિથ શાનદાર ફોર્મમાં રમી રહ્યો છે અને આરસીબી સહિત ઘણી એવી ટીમ છે, જેને ઓપનરની જરૂર છે. સ્મિથ ક્રિકેટની દુનિયામાં હંમેશાં મોટું રહ્યું છે અને આ ખેલાડીને ખરીદવા માટે ઘણી ફ્રેંચાઇઝીમાં જંગ છેડાઈ શકે છે.
ગ્લેન મેક્સવેલને ફરી એક તક મળી શકે છે
ગ્લેન મેક્સવેલઃ ઓસ્ટ્રેલિયાનો આ ખેલાડી કિંગ્સ ઈલેવન માટે ફ્લોપ થતો નજરે પડ્યો છે. ઘણી વાર મેક્સવેલને આ ટીમે તક આપી, પરંતુ તે મળેલી તકનો ફાયદો ઉઠાવવામાં નિષ્ફળ રહ્યો. આ વખતે પંજાબે મેક્સવેલને રિલીઝ કરી દીધો છે. મેક્સવેલ પણ મોટા ખેલાડીઓમાંનો એક છે અને તેની હિટિંગ કરવાની ક્ષમતા પર કોઈને શક નથી. આથી જ આગામી હરાજીમાં મેક્સવેલના નામ પર મોટી બોલી લાગી શકે છે.
ફિંચ પર મોટો જુગાર રમાઈ શકે છે
એરોન ફિંચઃ ઓસ્ટ્રેલિયાના સ્ટાર ઓપનર એરોન ફિંચ ગત સિઝનમાં આરસીબી તરફથી કંઈ ખાસ પ્રદર્શન કરી શક્યો નહોતો અને એ જ કારણે તેને રિલીઝ કરી દેવામાં આવ્યો છે, જોકે ફિંચ હાલ સારા ફોર્મમાં છે. આ સ્થિતિમાં હરાજીમાં ફિંચ માટે નાણાંની કોથળી ખુલ્લી મુકાઈ શકે છે. ચેન્નઈ સુપર કિંગ્સ, કેકેઆર અને પંજાબની ટીમ ફિંચ પર મોટો જુગાર રમી શકે છે.
મોરિસનું ઓલરાઉન્ડ પર્ફોર્મન્સ અપાવી શકે છે મોટી રકમ
ક્રિસ મોરિસઃ આ ખેલાડીને ખરીદવા માટે ફ્રેંચાઇઝીઓ વચ્ચે મોટો જંગ જોવા મળી શકે છે. મોરિસ ૧૪૦ કિ.મી.ની ઝડપે બોલિંગ કરી શકે છે એટલું જ નહીં, તે તોફાની બેટિંગ પણ કરી શકે છે. મોરિસનું ઓલરાઉન્ડર હોવું જ મોટી તાકાત છે અને આ જ કારણે ફ્રેંચાઇઝી માલિકો વચ્ચે હરાજી દરમિયાન જંગ છેડાઈ શકે છે.
મુજીબ ટી-20 ક્રિકેટનાં બેસ્ટ બોલર્સમાંથી એક છે
મુજીબ ઉર રહેમાનઃ ભારતની પીચો પર અફઘાનિસ્તાનનો સ્પિનર મુજીબ ઉર રહેમાન બહુ જ સફળ રહ્યો છે. ટી-૨૦ ક્રિકેટમાં પણ રહેમાન બેસ્ટ બોલર્સમાંનો એક છે. આગામી સિઝન પહેલાં જ પંજાબે તેને રિલીઝ કરી દીધો છે. જોકે આ બોલરના પ્રદર્શનને જોતાં અને ભારતીય પીચને ધ્યાનમાં રાખતાં આ ખેલાડીને ખરીદવા ફ્રેંચાઇઝી માલિકો નાણાંની કોથળી ખુલ્લી મૂકી શકે છે.