વિપક્ષનો વિરોધ / ગુજરાત બજેટ સત્રમાં સરકાર માટે આ મુદ્દાઓ બનશે પડકાર, વિરોધ કરવા વિપક્ષનો પ્લાન તૈયાર

• 1 માર્ચથી વિધાનસભાના બજેટ સત્રની શરૂઆત
• કોંગ્રેસના MLA સત્રમાં મોંઘવારીને લઈ કરશે વિરોધ
• તમામ ધારાસભ્યો સાયકલ લઇને પહોંચશે

ગુજરાતમાં સ્થાનિક સ્વરાજનું મતદાન પૂર્ણ થઈ ગયું છે. તો બીજી તરફ 1 માર્ચથી ગુજરાત વિધાનસભાના સત્રની શરૂઆત થઈ રહી છે. બપોરે 12.00 વાગ્યે સત્રની શરૂઆત થશે. પ્રથમ દિવસે રાજ્યપાલ વિધાનસભામાં સંબોધન કરશે. વિધાનસભા સત્રની શરૂઆતમાં શોક પ્રસ્તાવ પાસ કરાશે. 1 માર્ચે માત્ર એક જ સત્ર મળશે. 

ગુજરાતમાં પેપરલેસ બજેટની રજૂઆત

ગુજરાત વિધાનસભાના સત્રની સાથે 3 માર્ચે બજેટ રજૂ કરવામાં આવશે. DyCM નીતિન પટેલ પેપરલેસ બજેટ રજૂ કરશે. તો 2 માર્ચે વિધાનસભામાં રજા રહેશે. મહત્વનું છે કે, 2 તારીખે સ્થાનિક સ્વરાજ્યની ચૂંટણીના પરિણામ છે. જેને લઈ રજા રહેશે.

વિધાનસભા સત્ર અને બજેટ સત્રને લઈ કોંગ્રેસના MLA મોંઘવારીને લઈ વિરોધ કરશે. તમામ ધારાસભ્યો સાઇકલ લઈને વિધાનસભા પર પહોંચશે. દેશમાં ચાલતા પેટ્રોલ અને ડીઝલના વધતા ભાવ મુદ્દે વિરોધ નોંધાવશે.

સુરક્ષા વધારવામાં આવી છે

ગુજરાતમાં વિધાનસભા સત્ર દરમિયાન રોજગાર અને ખેડૂત મુદ્દે આંદોલન થવાની શક્યતા સેવાઈ રહી છે. જેને લઈને વિધાનસભા સ્વર્ણિમ સંકુલની સુરક્ષામાં વધારો કરવામાં આવ્યો છે. વિધાનસભા સત્ર દરમિયાન 141 પોલીસનો ચુસ્ત બંદોબસ્ત રહેશે. વિધાનસભામાં 1 DySP, 4 PI અને 8-PSI તૈનાત કરાશે. જ્યારે વિધાનસભા બહાર 2-SP, 10 DySP અને 350 જેટલા પોલીસ જવાનો તૈનાત રહેશે.