વર્ષ 2020 ઓટીટી પ્લેટફોર્મ્સના નામે રહ્યું છે. થિયેટર-મિલ્ટપ્લેક્સ બંધ રહેવાના કારણે ઘણી મોટી ફિલ્મો સીધી ઓટીટી પ્લેટફોર્મ પર રિલીઝ થઈ હતી. વેબ સિરીઝે પણ દર્શકોનું ઘણું મનોરંજન કર્યું છે. હવે 2021માં પણ મનોરંજનનો આ સિલસિલો ઓટીટી પ્લેટફોર્મ્સ પર ચાલુ રહેશે. નવા વર્ષના પહેલા મહિનાની શરૂઆત આ ફિલ્મો અને વેબ સિરીઝ સાથે થશે.
2021 જાન્યુઆરીમાં ફિલ્મો કરશે એન્ટરટેઇન
પંકજ ત્રિપાઠીની કાગઝ મચાવશે ધૂમ
સૈફ અલી ખાનની તાંડવ પર સૌની નજર
નેલ પોલિશ (ફિલ્મ)
પહેલી જાન્યુઆરીએ ઝી ફાઇવ પર ‘નેલ પોલિશ’ આવી ચૂકી છે, જેનું નિર્દેશન બગ્સ ભાર્ગવ કૃષ્ણએ કર્યું છે. ‘નેલ પોલિશ’ એક ઈન્ટેન્સ કોર્ટરૂમ ડ્રામા છે, જેમાં અર્જુન રામપાલ એક વકીલના રોલમાં જોવા મળશે અને ૩૮ બાળકોની હત્યાના આરોપીના બચાવમાં જોવા મળશે. ફિલ્મમાં માનવ કૌલ અને આનંદ તિવારી મુખ્ય ભૂમિકામાં દેખાશે.
કાગઝ (ફિલ્મ)
૭ જાન્યુઆરીએ ઝી ફાઇવ પર જ સતીશ કૌશિક નિર્દેશિત ફિલ્મ ‘કાગઝ’ રિલીઝ થશે. આ રિયલ સ્ટોરી પર બનેલી ફિલ્મ છે, જેમાં પંકજ ત્રિપાઠી મુખ્ય ભૂમિકામાં જોવા મળશે. આ ફિલ્મને સલમાન ખાને પ્રોડ્યૂસ કરી છે. ફિલ્મની વાર્તા ભરત લાલ મૃતકની આસપાસ ફરે છે, જેને સરકારી દસ્તાવેજોમાં મૃત ઘોષિત કરવામાં આવ્યો હતો અને તે સિસ્ટમથી પોતે જીવંત છે એની લડાઈ લડે છે.
મારા (ફિલ્મ)
એમેઝોન પ્રાઈમ વીડિયો પર ૮ જાન્યુઆરીએ આર. માધવન અને શ્રદ્ધા શ્રીનાથની ફિલ્મ ‘મારા’ રિલીઝ થશે. આ તેલુગુ ફિલ્મ છે, જેનું નિર્દેશ દિલીપ કુમારે કર્યું છે. ‘મારા’ મલયાલમ ફિલ્મ ‘ચાર્લી’ની ઓફિશિયલ રિમેક છે.
ધ વાઈટ ટાઈગર (ફિલ્મ)
નેટફ્લિક્સ પર ૨૨ જાન્યુઆરીએ પ્રિયંકા ચોપરા અને રાજકુમાર રાવ અભિનીત ફિલ્મ ‘ધ વાઈટ ટાઈગર’ રિલીઝ થશે. તે અરવિંદ અડિગાની આ જ નામની સૌથી વધુ વેચાયેલી નવલકથા પર આધારિત છે. ફિલ્મનું દિગ્દર્શન રામિન બહરાણીએ કર્યું છે.
તાંડવ (વેબ સિરીઝ)
‘સેક્રેડ ગેમ્સ’ જેવી જબરદસ્ત લોકપ્રિય વેબ સિરીઝથી ઓટીટીની દુનિયામાં ધૂમ મચાવનાર સૈફ અલી ખાન હવે ‘તાંડવ’માં એક પોલિટિશિયનના લીડ રોલમાં જોવા મળશે, જે એમેઝોન પ્રાઈમ પર ૧૫ જાન્યુઆરીએ આવી રહી છે. આ સિરીઝમાં ડિમ્પલ કાપડિયા, સુનીલ ગ્રોવર, મોહમ્મદ ઝીશાન અયુબ અને તિગ્માંશુ ધૂલિયા જેવા સક્ષમ કલાકારો ઘણી મહત્ત્વપૂર્ણ ભૂમિકામાં જોવા મળશે. આ સિરીઝનું દિગ્દર્શન અલી અબ્બાસ ઝફરે કર્યું છે.
ઝિદ (વેબ સિરીઝ)
ઝી ફાઇવ પર ૨૨ જાન્યુઆરીએ ઝિદ રિલીઝ થશે. આ સિરીઝમાં અમિત સાધ લીડ રોલમાં જોવા મળશે. આ સિરીઝ સાથે નિર્માતા બોની કપૂર ડિજિટલ ડેબ્યૂ કરી રહ્યા છે. અમૃતા પુરી ફીમેલ લીડ રોલમાં છે.