દેશભરમાં કોરોનાનો કહેર સતત ફેલાઈ રહ્યો છે ત્યારે કેટલાક લોકો ઘરમાં ભરાઈ ગયા છે અને લૉકડાઉનનું પાલન કરી રહ્યા છે. કેટલાક લોકો બહાર નીકળ્યા વિના દેશ સેવા કરી રહ્યા છે અને કેટલાક જરૂરિયાત મંદો માટે ભોજન બનાવીને દેશ સેવા કરી રહ્યા છે. કેટલાક નાના બાળકો પણ દેશસેવામાં પોતાનું યોગદાન આપી રહ્યા છે. સલામ છે દેશની દીકરીઓને જે 11 વર્ષે જરૂરિયાત મંદો માટે લિસ્ટ તૈયાર કરીને કીટ પણ બનાવી રહી છે જેથી કોઈ ભૂખ્યું ન રહે.
કોરોનાના કહેરમાં પ્રસરી માનવતાની મહેક
દેશની નાની દીકરીએ કર્યું એવું કામ કે બની મિસાલ
લૉકડાઉનમાં પણ લોકો કરી રહ્યા છે દેશની સેવા
POSITIVE વાત-1
આપડા છોટાઉદેપુરના હાંડોદ ગામના 32 વર્ષના સરપંચ વિશાલ પટેલે આખા ગુજરાતના ખમતીધર સરપંચો કરી શકે એવું કામ કર્યું છે, અને રાહ પણ ચીંધી છે. 250 પરિવારવાળા ગામનો પાણીવેરો અને ઘરવેરો પોતાના ખિસ્સામાંથી ભરવાનું સરપંચ વિશાલભાઈએ નક્કી કરી લીધું છે. આ રકમ દોઢ લાખ રૂપિયા જેટલી થાય છે. કેવી સરસ વાત છે, સરપંચને લાગ્યું કે કોરોના મહામારી સમયે આવા કરવેરાને માફ પણ કરી શકાય, પરંતુ માફ કરવાથી એ બોજ પંચાયત પર આવે. આવું ન થાય અને ગામના તમામ પરિવારોને મદદ પણ થાય માટે એ કરવેરા સરપંચ એમના ખિસ્સામાંથી ચૂકવી દેશે.
POSITIVE વાત-2
પુના, મુંબઈ અને હાવડાથી ખરેખર સારા વાવડ છે. મુંબઈમાં 35 વર્ષના બેનને લેબર પેઈન થયું તો એક ખાનગી હોસ્પિટલમાં દાખલ કરાયા. ડિલિવરી પહેલા પ્રોટોકોલ પ્રમાણે એમનો કોરોના ટેસ્ટ થયો તો બેનને કોરોના હતો. એટલે મુંબઈની નાણાવટી હોસ્પિટલમાં એમને શિફ્ટ કર્યા. 21મીએ બેને દીકરીને જન્મ આપ્યો. ડોક્ટરે તપાસ કરી તો દીકરી સ્વસ્થ છે અને એને માતાનું કોઈ ઈન્ફેક્શન લાગ્યું નથી. પુનામાં દીકરાનો જન્મ થયો તો ત્યાં પણ સારા સમાચાર. હાવડામાં પણ દીકરાના જન્મ પછી માતા અને દીકરાની બંન્ને હાલત સારી છે. માતા પોઝિટિવ આવ્યા પછી ઘરવાળા અને ડોક્ટર્સના જીવ તાળવે ચોંટેલા હતા, ત્રણેય કેસમાં. પણ, પરિણામ 'NAGATIVE' આવ્યું.
POSITIVE વાત-3
અલગ-અલગ વિભાગના રેલવેના કર્મચારીઓ રાત-દિવસ એક કરીને જરૂરિયાતમંદો માટે ભોજન બનાવી રહ્યાં છે. દેશમાં 28 જગ્યાઓએ જ્યાં રેલવેના પોતાના રસોડા છે તે ધમધમી રહ્યાં છે અને રેલવેના હજારો લોકો તેમાં કામ કરી રહ્યાં છે. આવું જ એક રસોડું આપણાં અમદાવાદમાં પણ છે. રેલવેએ આમાં પણ રેકોર્ડ બનાવી લીધો છે. 28મી માર્ચથી ધમધમી રહેલા રેલવેના કિચનથી રોજના 20 લાખ લોકોને ભોજન અપાઈ રહ્યું છે. IRCTC પોતે અને રેલવે પોલીસ ફોર્સ પણ ખૂબ તાકાત લગાવીને આ કામ કરી રહ્યાં છે. જુદા જુદા રાજ્યોમાં ક્યાંક સરકારી તો ક્યાંક ખાનગી સંસ્થાઓ, તો કોઈ શહેરોમાં રેલવે પોલીસ ફોર્સ આ ભોજનનું વિતરણ કરે છે.
POSITIVE વાત-4
11 વર્ષની હૈદરાબાદની દીકરી રીદ્ધીની સ્ટોરી ટ્વીટર પર લોકોને પ્રેરિત કરી રહી છે. રીદ્ધીએ લોકડાઉન દરમિયાન મુશ્કેલીમાં મુકાયેલા જરૂરિયાતમંદોની મદદ કરવાનું નક્કી કર્યું. ગલ્લો ફંફોળ્યો થોડી બચત હતી એ ભેગી કરી. એક લીસ્ટ બનાવ્યું કે 4 લોકોના પરિવારને ભોજન માટે રોજ શું જરૂર પડે? ઘરવાળાની મદદથી સપ્લાય કીટ તૈયાર કરી. આમાં મજા પડી તો કોઈએ ક્રાઉડ ફંડિગ માટે મદદ કરી. રીદ્ધીએ એક સરસ લેટર લખ્યો અને લોકોને મદદ માટે ટહેલ નાખી. અત્યાર સુધીમાં 10 લાખ રૂપિયા ભેગા થયા છે, રોજની 1 હજાર સીધા-સામગ્રીની કીટ તૈયાર થઈ રહી છે. ઈચ્છાશક્તિ અને ટેકનોલોજીનો સુગમ સંયોગ. હૈદરાબાદથી હ્યૂસ્ટન સુધીના શહેરો એના સાક્ષી છે.
POSITIVE વાત-5
આમ તો રાજસ્થાનના ચુરુને આપણે આવા ઉનાળે યાદ કરીએ છીએ એના બળબળતા તાપ માટે. પણ, ખરેખર એક દીલની નજીકનો આઈડિયા ચુરુના કલેક્ટરને આવ્યો. હમણાં જે નવું-નવું ખાવાનું બનાવીને સોશિયલ મીડિયામાં રોજ ફોટો મુકે છે એને તો ખાસ વાંચવુ. કલેક્ટર સાહેબે વિચાર્યું કે જ્યારે દેશમાં કેટલાયે લોકો ભૂખ વેઠી રહ્યાં છે ત્યારે આપણે બપોરના ભોજનને અવોઈડ કરી અને એમની મદદ ના કરી શકીએ? સરકારી લોકોએ વાતને વધાવી લીધી. પોલીસે પણ કલેક્ટર સાહેબના વિચારને માથા પર ચડાવ્યો અને શરૂ થઈ લંચ લીધા વગર જરૂરિયાતમંદોની સેવા. ઉદ્દેશ બે હતા. એક તો વ્યક્તિની દરરોજની જરૂરિયાત ઓછી થાય અને જે થોડીઘણી સીધા-સામાન કે પૈસાની બચત થાય એ જરૂરીયાતમંદોને વહેંચવા થાય. ટ્વીટર પર લોકો કલેક્ટર સાહેબને જબરજસ્ત વધાવી રહ્યાં છે. આમેય જે લોકો ભૂખ વેઠી રહ્યાં છે એમના પ્રત્યે સંવેદના અને કરૂણા માટે પણ આપણી મજાના ફોટો અત્યારે શેઅર ના કરીએ તો જીંદગી રોકાઈ જવાની નથી.