BCCI દ્વારા ઐતિહાસિક નિર્ણય લેવામાં આવ્યો છે. જે મુજબ હવેથી મહિલા ક્રિકેટરોને પણ પુરૂષ ક્રિકેટરોની સમાન ફી અપાશે. BCCIના સચિવ જય શાહે ટ્વીટ કરીને આ જાહેરાત કરી છે.
ભારતીય ક્રિકેટ કંટ્રોલ બોર્ડનો મહત્વનો નિર્ણય
મહિલા અને પુરૂષ ક્રિકેટરોને મળશે સમાન ફી
BCCIના સચિવ જય શાહે કરી જાહેરાત
ભારતીય ક્રિકેટમાં હવે મહિલાઓ અને પુરૂષોમાં પગારના મામલે કોઈ ભેદભાવ રાખવામાં આવશે નહીં. દરેકને સમાન મેચ ફી મળશે. આ જાણકારી ભારતીય ક્રિકેટ કંટ્રોલ બોર્ડ (BCCI)ના સચિવ જય શાહે આપી છે.
સોશિયલ મીડિયા દ્વારા કરી જાહેરાત
જય શાહે સોશિયલ મીડિયા દ્વારા આ ઐતિહાસિક નિર્ણયની જાહેરાત કરી છે. જય શાહે કહ્યું કે, 'અમને એ જણાવતા આનંદ થાય છે કે BCCIએ આ ભેદભાવને દૂર કરવા માટે પહેલું પગલું ભર્યું છે. અમે અમારી કોન્ટ્રાક્ટેડ મહિલા ક્રિકેટરો માટે વેતન ઇક્વિટી પોલિસી લાગુ કરી રહ્યા છીએ.'
I’m pleased to announce @BCCI’s first step towards tackling discrimination. We are implementing pay equity policy for our contracted @BCCIWomen cricketers. The match fee for both Men and Women Cricketers will be same as we move into a new era of gender equality in 🇮🇳 Cricket. pic.twitter.com/xJLn1hCAtl
આ રીતે મહિલા ક્રિકેટરોને મેચ ફી મળશે
BCCI સચિવે કહ્યું કે, હવે અમે લિંગ સમાનતાના એક નવા યુગમાં એન્ટ્રી કરી રહ્યા છીએ. આવી સ્થિતિમાં આ પોલિસી હેઠળ હવેથી પુરૂષ અને મહિલા બંને માટે સમાન મેચ ફી રહેશે. તેમણે કહ્યું કે, હવેથી મહિલાઓને પણ પુરૂષો જેટલી જ મેચ ફી મળશે. ટેસ્ટ ક્રિકેટમાં એક મેચ માટે 15 લાખ રૂપિયા મળે છે. જ્યારે વન-ડે ઈન્ટરનેશનલમાં પુરુષોને એક મેચ માટે 6 લાખ રૂપિયા આપવામાં આવે છે.
મહિલાઓને સમાન ફી મળશે
બીસીસીઆઈના સચિવ જય શાહે કહ્યું કે, ટી20 ઈન્ટરનેશનલ ક્રિકેટમાં એક મેચ રમવા માટે પુરુષોને 3 લાખ રૂપિયા મળે છે. હવે આ જ ફી મહિલા ક્રિકેટરોને પણ આપવામાં આવશે. આ સાથે જય શાહે આ નિર્ણયને સમર્થન આપવા બદલ એપેક્સ કાઉન્સિલનો પણ આભાર માન્યો છે.
ન્યૂઝીલેન્ડ ક્રિકેટ બોર્ડે આ પહેલ શરૂ કરી
ક્રિકેટમાં પુરુષો અને મહિલાઓને સમાન વેતન આપવાની પહેલ આ વર્ષે જુલાઈમાં ન્યુઝીલેન્ડ ક્રિકેટ બોર્ડ (NZC) દ્વારા કરવામાં આવી હતી. તેમણે મહિલા અને પુરૂષ ક્રિકેટરોને સમાન વેતન આપવાનો નિર્ણય કર્યો હતો. આ અંગે NZC અને 6 મોટા એસોસિએશન વચ્ચે એગ્રીમેન્ટ પણ થયા હતા.