અમદાવાદ શહેરમાં સતત વધતી જતી વસ્તી અને ટ્રાફિક ભારણના કારણે શહેરના ભાજપ શાસકોએ વિવિધ જગ્યા પર બ્રિજ બનાવાનું નક્કી કર્યું છે. આ ઉપરાંત ટ્રાફિક સિગ્નલ, પાર્કિંગ સુવિધાઓ વગેરે પર પણ ધ્યાન આપવામાં આવશે.
AMCએ ટ્રાફિક સિગ્નલ મૂકવા બજેટમાં રૂ.પાંચ કરોડ ફાળવાયા છે
ફૂટઓવરબ્રિજ વિથ એસ્કેલેટર તૈયાર કરાશે
સ્ટેન્ડિંગ કમિટીના ચેરમેને રૂ.૧૦ કરોડની ફાળવણી કરી છે
નવા બ્રિજ અંડરપાસનું આયોજન કર્યું છે
અમદાવાદ શહેરમાં સતત વધતી જતી વસ્તી અને ટ્રાફિક ભારણના કારણે શહેરના ભાજપ શાસકોએ વિવિધ જગ્યા પર મલ્ટિસ્ટોરિંગ પાર્કિંગ, રોડ સાઇડ પે એન્ડ પાર્ક, મ્યુનિ. પ્લોટ અને ટ્રાફિક આયલેન્ડમાં પાર્કિંગ સુવિધા, મોડ્યુલર કાર પાર્કિંગ સિસ્ટમ ઉપરાંત નવા બ્રિજ અંડરપાસનું આયોજન કર્યું છે જે હેઠળ ચાર નવા બ્રિજ અંડરપાસની જાહેરાત કરાઇ છે.
શાહઆલમ, નારણપુરા અને વિવેકાનંદ સર્કલ પાસે બ્રિજ બનશે
સ્ટેન્ડિંગ કમિટીના ચેરમેન અમુલ ભટ્ટ દ્વારા આગામી વર્ષ ર૦ર૦-ર૧ના રૂ.૯૬૮પ કરોડના જમ્બો બજેટમાં ટ્રાફિક સમસ્યાના સરળીકરણ માટે એકશન પ્લાન ઘડી કઢાયો છે. આ માટે બજેટમાં રૂ.૩૦ કરોડ ફાળવાયા છે. હાથીજણના લાલગેબી સર્કલ પાસે નવો ફલાયઓવર બ્રિજ, શાહઆલમ ટોલનાકા જંકશન પાસે ફલાયઓવર બ્રિજ, નારણપુરા એઇસીથી વિવેકાનંદ સર્કલ પાસે અંડરપાસ, નહેરુબ્રિજથી નગરી હોસ્પિટલ તરફ અંડરપાસના નિર્માણ માટે શાસકપક્ષે બજેટમાં રૂ.રપ કરોડની ફાળવણી કરી છે.
માર્કિંગ પેઇન્ટ અને સાઇનેઝ સિસ્ટમ મુકાશે
આ ઉપરાંત શહેરના ટ્રાફિક સિગ્નલ પર દસ નવા સ્માર્ટ ટ્રાફિક સિગ્નલ મૂકવા બજેટમાં રૂ.પાંચ કરોડ ફાળવાયા છે. લેફ્ટ ટર્ન ફ્રી ટ્રાફિક આયોજન માટે જંકશનોનો સર્વે કરી દબાણ દૂર કરી રોડ માર્કિંગ પેઇન્ટ અને સાઇનેઝ સિસ્ટમ મુકાશે. તેમજ હયાત ફલાય ઓવર અને રિવરબ્રિજના ટ્રાફિક સર્વે કરી ચાર લેનનું વિસ્તૃતિકરણ કરવા ફિજિબિલિટી રિપોર્ટ તૈયાર કરાશે.
બાપુનગરમાં પણ ફૂટઓવરબ્રિજ વિથ એસ્કેલેટર તૈયાર કરાશે
ગૃહરાજ્યપ્રધાન પ્રદીપસિંહ જાડેજાનાં સૂચન મુજબ નારણપુરાના વાળીનાથ ચોક પાસે રાહદારીઓ માટે ફૂટ ઓવરબ્રિજ વિથ એસ્કેલેટર મુકાશે. પાંજરાપોળ બીઆરટીએસ બસ દુર્ઘટના મુદ્દે ટ્રાફિકની સમસ્યાને તપાસવા તેમણે વિવિધ વિસ્તારની મુલકાત લઇ વાળીનાથ ચોક પાસે ફૂટઓવરબ્રિજ બનાવવાની તાકીદ સત્તાધારી પક્ષને કરી હતી. આ ઉપરાંત કાલુપુર રેલવે સ્ટેશન, ખમાસા ચાર રસ્તા, નિકોલ અને બાપુનગરમાં પણ ફૂટઓવરબ્રિજ વિથ એસ્કેલેટર તૈયાર કરાશે. આ માટે બજેટમાં સ્ટેન્ડિંગ કમિટીના ચેરમેને રૂ.૧૦ કરોડની ફાળવણી કરી છે.