સાયબર ફ્રોડ / ફોન પર વારંવાર આવી રહ્યા હતા મિસ કોલ, અને બેંક ખાતામાંથી ઉડી ગયા 50 લાખ રૂપિયા

• ભોગ બનનારનું કહેવું છે કે 13 નવેમ્બરે તેને અજાણ્યા નંબર પરથી ફોન આવ્યો હતો.
• પીડિતાએ જણાવ્યું કે તેણે 3-4 વખત ફોન ઉપાડ્યો પરંતુ કોઈએ જવાબ આપ્યો નહી
• લગભગ 1 કલાક સુધી મિસ્ડ કોલની પ્રક્રિયા ચાલુ રહી અને ખાતામાંથી પૈસા ઉપડી ગયા

ટેકનોલોજીના યુગમાં જ્યાં મોટા ભાગનું કામ ચપટીમાં થાય છે ત્યાં તેની સાથે જોડાયેલા જોખમો પણ ઝડપથી વધી રહ્યા છે. ક્યારેક ઓટીપી શેર કરવાને કારણે તો ક્યારેક પાસવર્ડના કારણે સાયબર ફ્રોડના કિસ્સાઓ સામે આવે છે. પરંતું દિલ્હીમાં સાયબર ક્રાઈમનો એક ચોંકાવનારો કિસ્સો સામે આવ્યો છે. દિલ્હીમાં સિક્યોરીટી એજન્સી ચલાવતી વ્યક્તિ સાયબર ફ્રોડનો શિકાર બની હતી. ચોંકાવનારી વાત એ છે કે માત્ર એક મિસ્ડ કોસ આપીને હેકર્સે આ વ્યક્તિના બેંક ખાતામાંથી 50 લાખ રૂપિયાની ચોરી કહી હતી.

લગભગ 1 કલાક સુધી મિસ્ડ કોલ આવવાના ચાલુ રહ્યા

ભોગબનનારે 13 નવેમ્બરના રોજ તેને એક અજાણ્યા નંબર પરથી કોલ આવ્યો. જેને ઉપાડ્યા પછી કોઈ અવાજ આવ્યો નહી. આ પછી પણ તેને  મિસ્ડ કોલ આવતા રહ્યા. પીડિતાએ જણાવ્યું કે તેણે 3-4 વખત ફોન ઉપાડ્યો. પરંતું કોઈએ જવાબ આપ્યો નહી અને લગભગ 1 કલાક સુધી મિસ્ડ કોલની પ્રતિક્રિયા ચાલુ રહી.

થોડા સમય બાદ બેંક ખાતામાંથી પૈસા ઉપડી ગયા

એના થોડા સમય બાદ મેસેજ મળતા તેને ખબર પડી કે તેના બેંક ખાતામાંથી 50 લાખ રૂપિયા ઉપડી ગયા છે. પીડિતાનું કહેવું છે કે તેણે કોઈની સાથે OTP શેર કર્યો નથી. બીજી તરફ આ વિચિત્ર મામલા પર ડીસીપી સાયબર સેલનું કહેવું છે કે પીડિતાના ફોનમાં ઓટીપી આવી ગયો હતો, પરંતુ ફોન હેક થવાને કારણે તેને ખબર ન પડી અને તે હેકર સુધી પહોંચી ગયો.

હેકર્સ ફોનને નિયંત્રિત કરે છે
એક અધિકારીએ જણાવ્યું કે આ રીતે છેતરપિંડી કરનારા લોકોના મોબાઈલ ફોન કેરિયર્સનો પણ સંપર્ક કરે છે અને તેમને સિમ કાર્ડ એક્ટિવેટ કરવાનું કહે છે. એકવાર આવું થાય પછી હેકર્સ ફોન પર કબજો મેળવી લે છે અને આવી ઘટનાઓને અંજામ આપે છે. હાલમાં, વ્યક્તિએ પોલીસમાં ફરિયાદ નોંધાવી છે અને પોલીસ તેની તપાસ કરી રહી છે.