મતદાનના મહાપર્વ; રાજ્યમાં પ્રથમબક્કાનું મતદાન યોજાયુ જેમાં ક્યાંક શાંતિપૂર્ણ રીતે મતદાન થયુ તો ક્યાંક મતદાનની પ્રક્રિયામાં રૂકાવટ જોવા મળી હતી
મહાપર્વની ઉજવણીમાં ક્યાં થયો વિલંબ ?
સુરત ઉ.માં પાવર કટથી વોટિંગ ઠપ્પ થયો હતો
નાંધઈ ગામે મતદાન મથકમાં હોબાળો થયો હતો
ગુજરાતમાં વિધાનસભાની ચૂંટણીને લઈને મતદાનના મહાપર્વની ઉજવણી કરવામાં આવી રહી છે. રાજ્યમાં પ્રથમબક્કાનું મતદાન યોજાયુ જેમાં ક્યાંક શાંતિપૂર્ણ રીતે મતદાન થયુ તો ક્યાંક મતદાનની પ્રક્રિયામાં રૂકાવટ જોવા મળી હતી. જેમાં સુરતની ઉત્તર વિધાનસભા વિસ્તારમાં શાળામાં પાવર કટની સમસ્યાને કારણે વોટિંગની કામગીરી ઠપ્પ થઈ હતી. આ તરફ ગોંડલના દાળિયા ગામે બોગસ વોટિંગ થતુ હોવાની ફરિયાદ સામે આવી હતી. આ દરમ્યાન રીબડા જૂથના અને સામે પક્ષે જયરાજસિંહ જૂથના લોકો ઘટના સ્થળે પહોંચતા બોલાચાલી થઈ હતી જેના કારણે થોડીવાર માટે મતદાન બંધ રાખવામાં આવ્યું હતું. નવસારીના નાંધઈ ગામે પણ મતદાન મથકમાં હોબાળો થયો હતો. ભાજપ અને કોંગ્રેસના પોલિંગ એજન્ટો વચ્ચે બબાલ થતા મતદાનની પ્રક્રિયામાં મુશ્કેલી ઉભી થઈ હતી.
સુરતમાં પાવર કટથી વોટિંગ ઠપ્પ થયું હતું
સુરતની ઉત્તર વિધાનસભા વિસ્તારમાં વોટિંગ ઠપ્પ થયું હતું પાવર કટની સમસ્યા સર્જાતા મતદાન કરવાની કામગીરી ઠપ્પ થયું હતું. બેગમપુરાના વિરમગામી મહોલ્લાની શાળામાં પાવર કટની સમસ્યા સર્જાઈ હતી જેનાથી હોબાળો મચ્યો હતો. પાવર કટ થતા કોંગ્રેસના કાર્યકરોએ આક્ષેપ લગાવ્યો કર્યો હતો કે, જાણી જોઈને પાવર કટ કરાવામાં આવ્યો છે તેમજ કોંગ્રેસના કાર્યકર શાળામાં ધરણાં પર પણ બેઠા હતાં.
પોલિંગ એજન્ટને માર માર્યાનો આરોપ
ગોંડલના જામવાડી ગામના બુથ પર કોંગ્રેસના પોલિંગ એજન્ટ પર હુમલો થયાની ઘટના પ્રકાશમાં આવી હતી. કોંગ્રેસના પોલિંગ એજન્ટને કેટલાક શખ્સોએ માર માર્યા હોવાનુ સામે આવ્યું હતું જે બાબતે કોંગ્રેસના ઉમેદવારને જાણ થતાં તેઓ પોલિંગ બુથ પર પહોંચ્યા હતાં. 3 શખ્સોએ કોંગ્રેસના પોલિંગ એજન્ટને માર માર્યાનો આરોપ સગાવવામાં આવી રહ્યો છે.
મતદાન મથક પર હોબાળો
નવસારીના ગણદેવી વિધાનસભા બેઠકના મતદાન મથક પર હોબાળો મચ્યો હતો. ખેરગામ તાલુકાના નાંધઈ ગામે મતદાન મથક પર મોક પોલ મુદ્દે પ્રીસાઈડિંગ ઓફિસર જોડે કોંગ્રેસના પોલિંગ એજન્ટની બબાલ થઈ હતી. પ્રીસાઈડિંગ ઓફિસરે માત્ર 50 મોક પોલ કરવાનું કહેતા માથાકૂટ થઈ હતી. બાદમાં ભાજપ અને કોંગ્રેસના પોલિંગ એજન્ટો વચ્ચે પણ બબાલ થઈ હતી. સુરક્ષા કર્મચારીઓએ કોંગ્રેસના પોલિંગ એજન્ટોને બહાર કાઢ્યા હતાં. મતદાન મથકમાં હાજર સુરક્ષાકર્મીઓ-કોંગ્રેસના પોલિંગ એજન્ટ વચ્ચે પણ બબાલ થઈ હતી.