બેદરકારી / કોર્ટમાં લગાવેલ LCDમાં કંઇ ડિસ્પ્લે નહીં, વહીવટીતંત્ર ઉદાસીન

અમદાવાદના ધીકાંટા ખાતે આવેલી મેટ્રો પોલિટિન કોર્ટે અને મીરજાપુર ખાતે આવેલી ગ્રામ્ય કોર્ટ તેમજ ઇન્કમટેક્સની  ફેમિલી કોર્ટમાં રોજેરોજ ચાલતા કેસોની વિગતો વકીલો તેમજ પક્ષકારો આસાનીથી મળી રહે તે માટે કોર્ટ રૂમની બહાર લાખો રૂપિયાના ખર્ચે લગાવેલા ડિસ પ્લે બોર્ડ હાલ માત્ર શો પિસ બનીને રહી ગયાં છે. અંદાજે છેલ્લા એક વર્ષથી આ ડિસ પ્લે બોર્ડ બંધ હોવાનું સામે આવ્યું છે, પરંતુ તંત્રના પેટનું પાણી પણ હાલતું નથી. લોકોની સવલત માટે લગાવેલાં આ ડિસ પ્લે બોર્ડ માત્ર કોર્ટની શોભમાં વધારો કરવામાં ઉપયોગી સાબિત થયાં છે.

મેટ્રો પોલિટિન કોર્ટ અને ગ્રામ્ય કોર્ટના હાઇરાઇઝ બિલ્ડિંગ કુલ ૬૫ કોર્ટ આવેલી છે અને ફેમિલી કોર્ટમાં કુલ ૬ કોર્ટ આવેલી છે. જેમાં શહેરમાં આવેલા ૪૫ કરતાં વધુ પોલીસ સ્ટેશનમાં નોંધાતા ગુનાઓ તેમજ અમદાવાદ જિલ્લામાં આવેલાં ૧૫ કરતાં વધુ પોલીસ સ્ટેશનમાં નોંધાતા ગુનાઓના કેસ ચાલી રહ્યા છે. આ સિવાય સીઆઇડી, સીબીઆઇ, સેન્ટ્રલ એજન્સીઓએ રાજ્ય ભરમાં કરેલા કેસોની પણ સુનવણી આજ બિલ્ડિંગમાં કરવામાં આવે છે. એટીએસ, ક્રાઇમ બ્રાંચ, સહિતની એજન્સીઓએ કરેલા કેસ પણ આજ કોર્ટમાં ચાલી રહ્યા છે. બન્ને હાઇરાઇઝ બિલ્ડિંગની ૬૫ કોર્ટમાં રોજેરોજ હજારો કેસ બોર્ડ પર આવે છે. જ્યારે ફેમિલી કોર્ટમાં પણ રોજ સંખ્યાબંધ કેસ બોર્ડ પર આવે છે. જેમાં કેટલાક કેસ ચાલે છે જ્યારે કેટલાક કેસોની તારીખો પડતી હોય છે. 

તમામ કોર્ટમાં રોજ કયો કેસ બોર્ડ પર આવવાનો છે તેની તમામ વિગતો કોર્ટ રૂમની બહાર લગાવવામાં આવે છે. જેના કારણે પક્ષકાર તેમજ વકીલને અંદાજો આવે કે કયા સમય પર તેમનો કેસ બોર્ડ પર આવશે. વર્ષોથી આ જ પ્રથા બન્ને કોર્ટમાં ચાલી રહી છે અને ચાલતી રહેશે. તો બીજી તરફ ગુજરાત હાઇકોર્ટની વાત કરીએ તો તેની કામ કરવાની પદ્ધતિ નીચલી કોર્ટોથી એકદમ અલગ છે. ગુજરાત હાઇકોર્ટમાં રોજેરોજ ચાલતા  કેસોની તમામ વિગતો ડિસ પ્લે બોર્ડ પર દર્શાવવામાં આવે છે જેના કારણે કયા સમયે કયો કેસ ચાલવા પર આવશે તેની જાણકારી વકીલ તેમજ પક્ષકારને આસાનીથી મળી રહે છે. 

હાઇકોર્ટના રોજેરોજ કેસોની વિગતો ડિસપ્લે બોર્ડ અપડેટ કરવામાં આવે છે. ગુજરાત હાઇકોર્ટની જેમ ગ્રામ્ય કોર્ટ અને મેટ્રો પોલિટિન કોર્ટમાં પણ ડિસ પ્લે બોર્ડ મૂકવામાં આવ્યાં હતાં. જોકે હવે તે માત્ર એક શો પિસ બની ગયાં છે. મેટ્રો કોર્ટમાં ચીફ મેટ્રો પોલિટિન મેજિસ્ટ્રેટની કોર્ટ સહિત કુલ ૩૮ કોર્ટ આવેલી છે જ્યારે ગ્રામ્ય કોર્ટમાં સીબીઆઇની સ્પેશિયલ કોર્ટ સહિત કુલ ૨૭ કોર્ટ આવેલી છે અને ફેમિલીની પણ ૬ કોર્ટ આવેલી છે. આ તમામ કોર્ટની બહાર લાખો રૂપિયાના ખર્ચે એલસીડી ટીવી ડીવીઆર સિસ્ટમ સાથે લગાવવામાં આવ્યાં છે. આ એલસીડી ટીવી કોઇ મનોરંજન માટે નહીં પરંતુ કઇ કોર્ટમાં કયો કેસ બોર્ડ પર ચાલી રહ્યો છે તેની માટે મૂકવામાં આવ્યાં છે.

હાઇકોર્ટના માર્ગદર્શન હેઠળ મૂકવામાં આવેલાં આ એલસીડી બોર્ડનો પ્રયોગ ખરેખર સારો છે પરંતુ તેનું યોગ્ય મોનિટરિંગ થતું નહીં હોવાથી છેલ્લા એકાદ વર્ષથી તે બંધ છે. ડિસ પ્લે બોર્ડ મૂકવા પાછળનો મુખ્ય ઉદ્દેશ કોર્ટ રૂમમાં બિનજરૂરી લોકો બેસી રહે નહીં અને સિરિયલ નંબરના આધારે વકીલ અને પક્ષકાર આવે તે માટેનો છે. અમદાવાદ ક્રિમિનલ કોર્ટ બાર એસોશિએશનના સેક્રેટરી મીતેશ પંડ્યાએ જણાવ્યું છે કે ડિસ પ્લે બોર્ડ છેલ્લા ઘણા સમયથી બંધ છે તેને ચાલુ કરવા માટે બારમાં હજુ સુધી કોઇ ચર્ચા થઇ નથી.

તો વકીલ હરનીશ રાવે જણાવ્યુ છેકે આ કોર્ટમાં લગાવેલા ડિસ પ્લે બોર્ડ શરૂ થયાં જ નથી. કોર્ટમાં થતી ભીડ ઓછી કરવા માટે તેમજ પક્ષકાર અને વકીલોને બેસી રહેવું પડે નહીં તે માટે આ ડિસ પ્લે બોર્ડ હાઇકોર્ટના માર્ગદર્શન હેઠળ લગાવવામાં આવ્યાં હતાં. મેટ્રો કોર્ટના વકીલ શમશાદખાન પઠાણે જણાવ્યું છે કે છેલ્લા ઘણા સમયથી એલસીડી ડિસ પ્લે બોર્ડ બંધ છે. જો શરૂ કરવામાં આવે તો વકીલો અને પક્ષકારોનો સમય બચી શકશે. સમગ્ર મામલે મેટ્રો કોર્ટ, ગ્રામ્ય કોર્ટ અને ફેમિલી કોર્ટના રજિસ્ટ્રારનો સંપર્ક થઇ શક્યો નથી.

ત્રણેય કોર્ટમાં ડિસ પ્લે બોર્ડ માટે કુલ ૭૨ એલસીડી ટીવી ડીવીઆર સાથે લગાવવામાં આવ્યાં છે. જે છેલ્લા એકાદ વર્ષથી બંધ છે શરૂઆતમાં આ ડિસ્પ લે બોર્ડ ચાલુ કરવામાં આવ્યાં હતાં. જોકે તે હાલ બંધ છે. હજુ સુદી આ ડિસ્પ લે બોર્ડ કેટલાના ખર્ચે લગાવવામાં આવ્યાં છે તેનો કોઇ ચોક્કસ આંકડો આવ્યો નથી પરંતુ વકીલોના મત પ્રમાણે અંદાજે ૨૦ લાખ રૂપિયા કરવા વધુના ખર્ચે આ ટીવી લગાવેલાં છે.