કોરોના સામે પ્રતિકાર માટે આશરે 100 જેટલી રસીઓ ક્લિનિકલ ટ્રાયલમાં છે જે પૈકી ઘણી રસીઓ તો હ્યુમન ટ્રાયલમાં છે. જો કે આરોગ્ય નિષ્ણાતોનું કહેવું છે કે એક એવી પણ શક્યતા છે કે આપણે ક્યારેય કોવિડ 19ની પ્રતિકાત્મક રસી શોધી જ ન શકીએ. ઉદારહણ તરીકે આપણે અત્યાર સુધી વર્ષોના રિસર્ચ પછી પણ HIV અને ડેન્ગ્યુ જેવા રોગોની રસી નથી શોધી શક્યા.
અત્યારે 102 ડેવલપ કરાયેલ રસીઓમાંથી 8ના હ્યુમન ટ્રાયલ્સ ચાલુ છે
કેટલાય વાયરસ એવા છે જેની રસી આપણે હજુ શોધી શક્યા નથી
WHOના ડોક્ટર ડેવિડ નબારોએ કહ્યું હતું કે કેટલાય વાયરસ એવા છે જેની રસી આપણે હજુ શોધી શક્યા નથી. એવું માનવાની જરૂર નથી કે આપણે કોરોના સામે 100% અસરકારક અને સુરક્ષિત રસીને શોધી જ લઈશું. સૌથી ખરાબ શક્યતા એ પણ રહેલી છે કે આપણે ભવિષ્યમાં પણ કોઈ દિવસ આ રોગની રસી ન શોધી શકીએ એમ પણ બની શકે.
વધુ પડતો આશાવાદ નિરાશા જન્માવી શકે છે
નોંધનીય છે કે અત્યારે અલગ અલગ કંપનીઓના રસીઓ તૈયાર થવાના સમાચારથી લોકોમાં આશાનું કિરણ જન્મે છે જો કે જ્યાં સુધી અસરકારક રસી સાબિત ન થઇ જાય ત્યાં સુધી આ પ્રકારનાં ટ્રાયલ્સ ગમે તે તબક્કે નિષ્ફળ જઈ શકે છે તેવું સમજવું જરૂરી છે. છેલ્લા 40 વર્ષમાં 3 કરોડથી વધુ મોત માટે જવાબદાર HIVની રસી હજુ વૈજ્ઞાનિકો બનાવી શક્યા નથી.
ડેન્ગ્યુની રસી છે જોખમી
દર વર્ષે 4 લાખ લોકોને સંક્રમિત કરનાર ડેન્ગ્યુ તાવની રસી પણ બની નથી. જે લોકોને એક વાર ડેન્ગ્યુ તાવનો ચેપ લાગી ચુક્યો હોય તેવા લોકો માટે એક રસી શોધાઈ છે પરંતુ જેમને એક પણ વાર ચેપ નથી લાગ્યો તેઓ જો આ રસી લે તો તેમનું ડેન્ગ્યુ વધારે ગંભીર થઇ જાય તેવી શક્યતા રહેલી છે આથી આ રસી એટલી અસરકારક ગણાતી નથી.
હજુ સુધી કોઈ રસી એક વર્ષ જેટલા ટૂંકા ગાળામાં શોધી શકાઈ નથી
અમેરિકાના National Institute of Allergy and Infectious Diseases (NIAID) ડાયરેક્ટર ડો. ફોસીએ કહ્યું કે રસી 12 થી 18 મહિનામાં તૈયાર થઇ શકે તેમ છે. જો કે હજુ સુધી કોઈ રસી એક વર્ષ જેટલા ટૂંકા ગાળામાં શોધી શકાઈ નથી પણ વૈજ્ઞાનિકોના પ્રયત્નો ચાલુ છે. અત્યારે 102 ડેવલપ કરાયેલ રસીઓમાંથી 8ના હ્યુમન ટ્રાયલ્સ ચાલુ છે જે પૈકી ઓક્સફર્ડ યુનિવર્સીટીએ શોધેલી ChAdOx1 nCoV-19 સૌથી આશાસ્પદ રસી છે.
વાયરસ હાજરીમાં જ જીવન જીવતા શીખવું પડશે
જો રસી ન શોધાઈ તો આ રોગ વર્ષો સુધી આપણી આસપાસ રહી શકે છે. લોકડાઉન લાંબા ગાળાના ઉપાય નથી કેમ કે તે અર્થવ્યવસ્થા માટે હાનિકારક છે. આ સ્થિતિમાં આપણે આપણી ટેવોમાં, નોકરી ધંધાની પદ્ધતિમાં કાયમી બદલાવો લાવવા પડશે.