બાળક રમતા-રમતા મેટ્રોના કામગીરીની સાઈટ પર પહોંચ્યો હતો, જ્યાં લોખંડનો પિલર માથા પર પડતાં ઘટનાસ્થળે જ બાળકે જીવ ગુમાવ્યો
સુરતમાં મેટ્રોની કામગીરી દરમિયાન દુર્ઘટના
લોખંડનો પિલર પડતા 14 વર્ષના બાળકનું મૃત્યુ
કાદરશાહની નાળમાં મેટ્રોના લોખંડનો પિલર પડ્યો
સુરતમાં મેટ્રોની કામગીરી દરમિયાન લાપરવાહીની ઘટના સામે આવી છે. લોખંડનો પિલર પડતા 14 વર્ષના બાળકનું કમકમાટી ભર્યું મોત નીપજ્યું છે. કાદરશાહની નાળ વિસ્તારમાં મેટ્રોના લોખંડનો પિલર પડ્યો હતો. બાળક રમતા-રમતા મેટ્રોના કામગીરીની સાઈટ પર પહોંચ્યો હતો. ઘટના બાદ SMC અને મેટ્રોના કર્મચારીઓ રફુચક્કર થઈ ગયા હતા.
કઈ રીતે બન્યો બનાવ?
સુરતના કાદરશાની નાળ ખાતે મેટ્રો પ્રોજેક્ટને લઈને સ્ટેશન બનાવવાની તૈયારી ચાલી રહી છે. જે દરમિયાન 14 વર્ષનો બાળક એખતર શેખ અન્ય મિત્રો સાથે રમવા ગયો હતો. જ્યાં સાઈટ પર લોખંડનો પિલર પડતાં બાળકનું મોટું છૂંદાઈ ગયું હતું અને ઘટના સ્થળ પર જ કમકમાટી ભર્યું મોત નીપજ્યું હતું. મૃતક અફસર શેખના પિતા સોફા બનાવતી દુકાનમાં મજૂરી કામ કરે છે સાથે 3 ભાઈ અને 3 બહેનોમાંથી અખતર સૌથી નાનો અને ઘરમાં બધાનો લાડકવાયો હતો. બાળકો રમત રમતમાં મેટ્રો સાઈટ પર પહોંચી ગયા હતા. જ્યાં કામગીરી કરી રહેલા કર્મચારીઓની બેદરકારીને કારણે બાળકને જીવ ખોવાનો વારો આવ્યો હતો.
મેટ્રોની કામગીરી અટકાવવાની માગ ઉઠી
બાળકના મોતની ખબર પડતાં જ પરિવાર સાથે કાદરશાની નાળ વિસ્તારના સ્થાનિકો મેટ્રો સ્ટેશન સાઇટ દોડી આવ્યા હતા. પાઈપની નીચે દબાઈને મોત થતાં સ્થાનિકોએ મેટ્રો સાઈટ બંધ કરવા માંગ કરી છે. પરિવારનું કહેવું છે કે અમારે દિલ્હી સુધી જવું પડે તો પણ ન્યાય માટે જઈશું પણ ગમે તે ભોગે આ કામ અટકાવીને જ રહીશું કારણ કે કોઈ પણ પ્રકારની સેફ્ટી રાખવામાં આવી નથી. મોટો સવાલ એ છે કે જ્યાં પણ કામ ચાલુ હોય ત્યાં તેટલો ભાગ કોર્ડન કરી દેવામાં આવે છે અને પતરાની સુરક્ષા ગોઠવવામાં આવે છે તો શું આ વિસ્તારમાં ચાલી રહેલા કામમાં કોઈ પણ સેફટી કામ ચાલતું હતું કે કેમ તે તપાસનો વિષય છે.