જ્યારે પણ આપણને પૈસાની જરૂર પડે ત્યારે આપણને લોન લેવાની વાત ધ્યાનમાં આવે છે. એવામાં જો તમને પણ પૈસાની જરૂર હોય તો લોનની જગ્યા પર તમે FD પર લોન લઈ શકો છો. જાણો તેના વિશે વધુ માહિતી.
પૈસાની જરૂર પડવા પર આ રીતે લો લોન
FD પર પણ મળી શકે છે લોન
જાણો તેના વિશે દરેક માહિતી
ઘણી વખત એવું બનતુ હોય છે કે અણધાર્યા ખર્ચા આવી જાય છે તેના કારણે આપણને પૈસાની જરૂર પડતી હોય છે. એવા સંજોગોમાં સામાન્ય રીતે આપણે તો એવું જ વિચારીએ છીએ કે બેંકની FD તોડીને પૈસાની જરૂરીયાત પુરી કરી દઈએ. તેના માટે લોન લેવાની જરૂર નથી. પરંતુ શું તમે જાણો છો કે તમે FD તોડ્યા વગર જ તમારા FDના પૈસા વાપરી શકો છો. જાણો કઈ રીતે?
FD તોડવા પર થાય છે નુકસાન
જ્યારે આપડે FD તોડાવીએ ત્યારે આપણે આપણી મુડી તોડાવતા હોઈએ છીએ. એનાથી મૂડી ઓછી થાય છે. જ્યારે આપણે સમય પહેલા FD તોડાઈએ ત્યારે બેંકના નિયમો પ્રમાણે તેના પર ચાર્જીસ, પેનલ્ટી અને વ્યાજમાં પણ નુકસાન ભોગવવું પડે છે. જેનાથી આપણી મુડી સાવ ઘટી જાય છે. એની જગ્યા પર તમે તમારી FD પર લોન લઈ શકો છો.
FD પર લઈ શકો છો લોન
FD પર લોન એકદમ સિક્યોર લોન ગણવામાં આવે છે. કારણ કે આપણી રકમ FD તરીકે બેન્ક પાસે પડી છે તેના સામે બેંક આપણને લોન આપે છે. તેથી તે એક સિક્યોર લોન ગણાય છે જેનું વ્યાજદર ઓછુ રહેશે.
કેટલું હોય છે આ લોન સામે વ્યાજ?
FD પર લોનમાં વ્યાજ દર કેટલું હશે તેવો પ્રશ્ન હવે તમને જરૂરથી થયો હશે. તો અમે તમને જણાવી દઈએ કે આપણને FD પર જેટલું વ્યાજ મળે છે તેના કરતા 1થી 2 ટકા વધુ દરેક બેંક વાઈઝ વ્યાજ લગાડવામાં આવે છે અને તે વ્યાજ પર આપણને લોન મળે છે.
ઉદાહરણ તરીકે જો SBIની વાત કરવામાં આવે તો તે 1 ટકો વધારે વ્યાજ લગાડે છે. આપડે કોઈ પણ પ્રોપર્ટી પર લોન લઈએ ત્યારે 60, 70 કે 80 ટકા પર જ આપણને લોન મળતી હોય છે. FD પર તમને 90થી 95 ટકા સુધીની લોન મળી શકે છે. એટલે બેંકમાં જો તમારી પાસે 1 લાખ રૂપિયા પડ્યા છે તો તમને 95 હજાર સુધી લોન મળી શકે છે.
વ્યાજની આવક તો ચાલું જ રહેશે
આ બધામાં સૌથી સારી વસ્તુ એ છે કે FD સામે વ્યાજ તો ચાલુ જ રહેશે. એની સામે આપણે જે લોન લીધી છે તેની સામે વ્યાજ ચુકવવાનું આવશે. પણ બીજા કોઈ ખર્ચ FD પર લોનમાં નથી હોતા. એટલે પ્રોસેસીંગ ચાર્જીસ નહીં લાગે. જો તમે લોન વહેલી ભરી દો તો તેના પ્રી પેમેન્ટ ચાર્જીસ પણ નથી હોતા. એટલે વ્યાજનું જે ડિફરન્સ રહેશે તે જ આપણો વધારાનો ખર્ચ રહેશે.
બે પ્રકારની હોય છે લોન
ઓવરડ્રાફ્ટ લોન
ઓવરડ્રાફ્ટ લોન એટલે કે જેમ જેમ પૈસાની જરૂર પડે તેમ તેમ પૈસા આપણે ઉપાડીએ અને તેટલા પૈસા પર જ વ્યાજ ગણવામાં આવશે.
રેગ્યુલર લોન
આ લોન આપણી સામાન્ય લોનની જેમ જ છે. જેમાં બધા પૈસા ખાતામાં આવી જાય. EMI શરૂ થઈ જાય. EMI ભરતા જઈએ તેમ તેમ લોનની ચુકવણી થાય.
ખાસ ધ્યાનમાં રાખજો આ વાત
જો તમે FD પર લોન લીધી અને તેની EMI તમે સમયસર ન ચુકવી તો ભલે આપણી FD બેંક પાસે છે તો પણ આપણો ક્રેડિટ ક્રોર ડાઉન થઈ શકે છે. માટે અમે ભલામણ કરીએ છીએ કે જો તમે લોન સમયસર ન ચુકવી શકો તો FD પર લોન ન લેવી જોઈએ. બાકી કોઈ પણ સીનારીયોમાં FD પર લોન લેવી વધુ ફાયદાકારક સાબિત થઈ શકે છે.