રિલાયન્સ જીઓએ સોમવારે સુપ્રીમ કોર્ટને જણાવ્યું હતું કે દેવાળુ ફૂંકી ગયેલી અનિલ અંબાણીની રિલાયન્સ કોમ્યુનિકેશન્સના બાકી AGR (adjusted gross revenue) જીઓએ ચૂકવવા અન્યાયી છે. આ બંને ટેલિકોમ ઓપરેટર વચ્ચે થયેલા સ્પેક્ટ્રમ શેરિંગ એગ્રીમેન્ટમાં તેઓ લાયેબીલિટી શેર કરતા નથી અર્થાત એકની બાકી ચુકવણી બીજાએ કરવી પડે તેવી શરતોથી બંધાયેલા નથી.
નોંધનીય છે કે 14 ઓગસ્ટે સુપ્રીમ કોર્ટે રિલાયન્સ જીઓને પૂછ્યું હતું કે તેઓ Rcomના સ્પેક્ટ્રમ 2016થી વાપરે છે તે તેઓએ જ Rcomના બાકી AGRની ચુકવણી કરવી જોઈએ. તેમણે આ અંગે ડિપાર્ટમેન્ટ ઓફ ટેલિકોમ્યુનિકેશનને પણ રિપોર્ટ સબમિટ કરવા કહ્યું હતું. નોંધનીય છે કે રિલાયન્સ જીઓ RComના 800 મેગાહર્ટઝના બેન્ડ એસેટ શેરિંગ એગ્રીમેન્ટ હેઠળ વાપરી રહ્યા છે.
જીઓએ પોતાનો બચાવ કર્યો
આ મુદ્દે જીઓએ પોતાનો બચાવ કરતા કહ્યું હતું કે તેઓ લાયેબીલિટી શેર કરતા નથી અર્થાત એકની બાકી ચુકવણી બીજાએ કરવી પડે તેવી શરતોથી બંધાયેલા નથી. તેઓ AGR ઉપરાંત SUC (સ્પેક્ટ્રમ યુસેજ ચાર્જ) જેવા બીજા ખર્ચ પણ શેર કરતા નથી. જો તેમણે આ પ્રમાણેના ખર્ચ શેર કરવાની શરત હોત તો જીઓએ પ્રથમ તબક્કામાં જ આ એગ્રીમેન્ટ નકારી દીધું હોત.
આ એગ્રીમેન્ટથી સરકારને પહેલેથી જ 6627 કરોડનો રેવન્યુ થયો છે
આ ઉપરાંત તેમણે જણાવ્યું હતું કે આ એગ્રીમેન્ટ બદલ Rcomએ 6627 કરોડ રૂપિયાની સરકારને ચુકવણી કરી હતી. આમ જીઓએ દાવો કર્યો હતો કે આ એગ્રીમેન્ટથી સરકારને પહેલેથી જ 6627 કરોડનો રેવન્યુ થયો છે.
AGRનો પ્રશ્ન RComના 2G અને 3G બિઝનેસને લગતો છે
જીઓના મતે બાકી AGRનો પ્રશ્ન RComના 2G અને 3G બિઝનેસને લગતો છે બલ્કે જયારે જીઓએ Rcomના સ્પેક્ટ્રમ ફક્ત અને ફક્ત તેમની 4G સેવાઓ માટે જ લીધા છે. આમ જીઓને આ બાકી AGR સાથે કોઈ સીધો સંબંધ નથી. આ ઉપરાંત જીઓએ એમ પણ સ્પષ્ટ કર્યું હતું કે તેઓ Rcomના કોઈ એસેટને ખરીદવામાં રસ ધરાવતું નથી.