સર્બિયાના વર્લ્ડ નંબર વન ટેનિસ ખેલાડી નોવાક જોકોવિચ, સ્વિટ્ઝર્લેન્ડના રોજર ફેડરર અને સ્પેનના રફેલ નડાલની ઓળખ ટેનિસના 'બિગ-થ્રી' તરીકે થાય છે, પરંતુ 16 વર્ષમાં પહેલી વાર એવું બન્યું, જ્યારે આ બિગ-થ્રી કોઈ ગ્રાન્ડ સ્લેમની ક્વાર્ટર ફાઇનલમાં જોવા નહીં મળે. હાલ ચાલી રહેલી યુએસ ઓપન આ બિગ-થ્રી વિના સાવ ફિક્કી લાગી રહી છે. આ પહેલાં વર્ષ 2004ની ફ્રેંચ ઓપનમાં આ ત્રણેય ક્વાર્ટર ફાઇનલમાં નહોતા રમ્યા. એ સમયે ફેડરરને ત્રીજા રાઉન્ડના મુકાબલામાં ગુસ્તાવો કુએર્ટને હરાવી દીધો હતો.
ટોચના ટેનિસ ખેલાડી યુએસ ઓપનમાંથી બહાર
જોકોવિચને ડિસક્વોલિફાઇડ કરવામાં આવ્યો
નાડાલ અને ફેડરર નથી રમી રહ્યાં યુએસ ઓપન
હવે યુએસ ઓપનમાં આવું બન્યું. નડાલ કોરોના મહામારીને કારણે અને ફેડરર ઈજાને કારણે આ વર્ષે આ ટૂર્નામેન્ટમાં રમી રહ્યા નથી. યુએસ ઓપન શરૂ થઈ ત્યારથી જોકોવિચને ખિતાબ જીતવાનો એકમાત્ર દાવેદાર માનવામાં આવતો હતો, પરંતુ અજાણતા એક લાઇન જજને બોલ માર્યા બાદ તેને ટૂર્નામેન્ટની બહાર કરી દેવામાં આવ્યો. હવે સવાલ એ ઊભો થયો છે કે શું ટેનિસમાં બિગ-થ્રીનો સમયકાળ પૂરો થઈ ગયો છે? જોકે એક વાત નક્કી છે કે આ વખતે યુએસ ઓપનને કોઈ નવો ચેમ્પિયન મળશે.
ટેનિસની દુનિયામાં બિગ-થ્રીની બાદશાહત છે. છેલ્લાં 17 વર્ષમાં ફેડરર, જોકોવિચ અને નડાલે મળીને કુલ ૫૬ ગ્રાન્ડ સ્લેમ જીત્યા છે. 2016માં અંતિમ વાર એવું બન્યું હતું, જ્યારે આ ત્રણેય મોટા ખેલાડી સિવાય અન્ય કોઈ ખેલાડીએ ગ્રાન્ડ સ્લેમ જીત્યું હોય. એ સમયે સ્ટેન વાવરિન્કા યુએસ ઓપનમાં ચેમ્પિયન બન્યો હતો. છેલ્લા 13 ગ્રાન્ડ સ્લેમ બિગ-થ્રીના નામે જ રહ્યા છે.
યુએસ ઓપનમાં 2004થી 2019 દરમિયાન 16 વર્ષમાં બિગ-થ્રી જોકોવિચ, ફેડરર અને નડાલે મળીને ૧૨ ખિતાબ પોતાના નામે કર્યા છે. અન્ય ચાર- 2009, 2012, 2014 અને 2016માં આ ત્રણ સિવાયના અન્ય ખેલાડી ચેમ્પિયન બન્યા હતા. 2004થી 2008 સુધી રોજર ફેડરરે સતત પાંચ વર્ષ સુધી ખિતાબ પોતાના નામે કર્યો, જ્યારે નડાલે 2010, 2013, 2017, 2019- એમ ચાર વાર યુએસ ઓપન ખિતાબ જીત્યો. જોકોવિચ 2011, 2015 અને 2018માં યુએપ ચેમ્પિયન બન્યો હતો.
બિગ-થ્રીની વાત કરવામાં આવે તો રોજર ફેડરરે સૌથી વધુ 20ગ્રાન્ડ સ્લેમ જીત્યા છે. તેણે આઠ વિમ્બલ્ડન, છ ઓસ્ટ્રેલિયન ઓપન, પાંચ યુએસ ઓપન અને એક વાર ફ્રેંચ ઓપન ખિતાબ જીત્યો છે. નડાલ ૧૯ ગ્રાન્ડ સ્લેમ જીત સાથે બીજા ક્રમ પર છે. તેણે ૨૦૧૧થી પ્રોફેશનલ ટેનિસ રમવાનું શરૂ કર્યું. આ દરમિયાન નડાલે બે વિમ્બલ્ડન, એક ઓસ્ટ્રેલિયન ઓપન, ચાર યુએસ ઓપન અને ૧૨ ફ્રેંચ ઓપન ખિતાબ પોતાના નામે નોંધાવ્યા છે. ત્રીજા ક્રમે રહેલા જોકોવિચના નામે ૧૭ ગ્રાન્ડ સ્લેમ નોંધાયેલા છે. ૨૦૦૩માં પ્રોફેશનલ ટેનિસ રમવાનું શરૂ કરનારા સર્બિયાના આ ખેલાડીએ આઠ ઓસ્ટ્રેલિયન ઓપન, પાંચ વિમ્બલ્ડન, એક ફ્રેંચ ઓપન અને ત્રણ યુએસ ઓપન ટાઇટલ જીત્યા છે.