તમારા કામનું / કોરોના સંકટ વચ્ચે લોનધારકો માટે મહત્વના સમાચાર, EMI ભરી ન શકનારને મળશે આ સુવિધા

• 31મી ઓગસ્ટ બાદ મોરેટોરિયમની સુવિધામાં થઇ શકે છે ફેરફાર 
• કેન્દ્રીય રિઝર્વ બેંકે મોરેટોરિયમની મુદ્દત 31મી ઓગસ્ટ સુધી વધારી હતી
• જે લોકો EMI ભરી ન શકે તે માટેની સુવિધા છે મોરેટોરિયમ

27મી માર્ચથી RBIએ બેંકોને EMIની ચુકવણી ટાળવાની સુવિધા આપી હતી. ઓગસ્ટથી આગળ મુદ્ત વધારવાને લઇને બેંકોની કોઈ ગણતરી નથી. જે લોકો EMI ભરી ન શકે તે માટેની મોરેટોરિયમ સુવિધા છે . માર્ચ મહિનામાં આ સુવિધા 3 મહિના માટે લાગુ કરાઇ હતી. જેને હવે ફરીથી વધારીને 31 ઓગસ્ટ સુધી કરવામાં આવી છે.

ઉલ્લેખનીય છે કે લોકોને રાહત આપવા માટે રિઝર્વ બેંક એક સ્કીમ લાવવાની તૈયારી કરી રહી હોવાનું સૂત્રો દ્વારા જાણવા મળ્યું હતું. આ સ્કિમનું નામ છે વન ટાઈમ રીસ્ટ્રક્ચરિંગ સ્કીમ.  આ યોજના અંતર્ગત બેંકો હવે તેમના ગ્રાહકોની લોનની ચુકવણીના શેડ્યૂલમાં ફેરફાર કરી શકશે, જેનો અર્થ છે કે બેંકો પાસે પણ ગ્રાહકની લોનની અવધિ વધારવાનો અને પેમેન્ટ હોલિડે આપવાનો વિકલ્પ હશે. એવા પણ અહેવાલ છે કે, હોમ લોન, એજ્યુકેશન લોન, કાર લોન, ગોલ્ડ લોન, પર્સનલ લોન, કન્ઝ્યુમર ડ્યુરેબલ લોન અને સિક્યોરિટીઝ સામેની લોન જેવી રિટેલ લોનના ઇએમઆઈની ચુકવણી માટે બેન્કો ગ્રાહકોને વિવિધ વિકલ્પો આપી શકે છે. આ સિવાય ગ્રાહકની EMI પણ થોડા મહિના માટે ઘટાડી શકાય છે અથવા થોડા મહિના માટે મુલતવી રાખવામાં આવી શકે છે. 

મોરટોરિયમથી અલગ છે લોન રીસ્ટ્રક્ચરિંગ

જો તમે તમારી લોન મોરટોરિયમ અને લોન રીસ્ટ્રક્ચરિંગને એક જેવું માની રહ્યો છો તો એ જાણવું જરૂરી છે કે, બંનેમાં ઘણું અંતર છે. લોન મોરટોરીયમ હેઠળ 6 મહિના સુધી હપ્તા ન ભરવાની છૂટ મળી હતી, પરંતુ આ દરમિયાન વ્યાજને તમારી મૂળ રકમમાં એડ કરવામાં આવ્યો છે. જ્યારે લોન રીસ્ટ્રક્ચરિંગ સ્કીમમાં બેંકોને વધુ અધિકાર મળ્યા છે. બેંકો જાતે નક્કી કરી શકશે કે, તમારી ઈએમઆઈ ઘટાડવી છે કે લોનની અવધિ વધારવી છે. ફક્ત વ્યાજ વસૂલવાનું છે અથવા વ્યાજદરને એડજસ્ટ કરવાનો છે. સૌથી અગત્યની બાબત એ છે કે, લોન રીસ્ટ્રક્ચરિંગ વખતે લોનની મૂળ રકમમાં કોઈપણ પ્રકારની છૂટ મળે તેવી આશા નથી.