આફતના એંધાણ ? / ફરી આવી રહ્યું છે ખતરનાક વાવાઝોડું! આ રાજ્યોમાં મચાવશે કેર, IMDનું લેટેસ્ટ અપડેટ

ઉત્તર ભારતમાં શિયાળો ધીમે ધીમે દસ્તક આપી રહ્યો છે, ત્યારે દક્ષિણ ભારતમાં વરસાદ ચાલુ છે. મેદાની વિસ્તારોમાં તાપમાનમાં ઘટાડો થતાં ઠંડીમાં વધારો થઇ રહ્યો છે, જ્યારે પહાડી વિસ્તારોમાં ગાઢ ધુમ્મસ જોવા મળી રહ્યું છે. બંગાળની ખાડી પર સાયક્લોનિક સર્ક્યુલેશન છે, જેના કારણે ઘણા રાજ્યોમાં ભારે વાદળો ઘેરાવાની શક્યતા છે. ચાલો જાણીએ IMD નું લેટેસ્ટ અપડેટ શું છે?

ચક્રવાતી પરિભ્રમણ દક્ષિણ પશ્ચિમ બંગાળની ખાડી પર યથાવત છે અને હવે તે સમુદ્ર સપાટીથી 3.6 કિમી સુધી વિસ્તર્યું છે. તેની અસરને કારણે આગામી 48 કલાકમાં બંગાળની ખાડીમાં લો પ્રેશર સર્જાય તેવી શક્યતા છે. આગામી બે દિવસમાં તે તમિલનાડુ અને શ્રીલંકાના દરિયાકાંઠા તરફ આગળ વધવાની સંભાવના છે, જેના કારણે ઘણા રાજ્યોમાં ભારે તોફાન સાથે વરસાદ પડી શકે છે.

ભારતીય હવામાન વિભાગ (IMD) એ વરસાદને લઈને એલર્ટ જાહેર કર્યું છે. ચક્રવાતી પરિભ્રમણને કારણે, તમિલનાડુ, પુડુચેરી અને કેરળના ભાગોમાં ગાજવીજ અને વીજળી સાથે હળવાથી મધ્યમ વરસાદની સંભાવના છે, જ્યારે આ રાજ્યોના કેટલાક ભાગોમાં ભારે વરસાદ પડશે. આંધ્રપ્રદેશમાં પણ ભારે વરસાદની સંભાવના છે.

આ રાજ્યોમાં વાદળો વરસશે

IMD મુજબ આજે પણ દરિયાકાંઠાના તમિલનાડુ અને કેરળમાં ભારેથી અતિ ભારે વરસાદની સંભાવના છે, જ્યારે 09-14 નવેમ્બર દરમિયાન દક્ષિણ તટીય આંધ્ર પ્રદેશ, તમિલનાડુ અને કેરળમાં ભારે વરસાદ પડશે. જો છેલ્લા 24 કલાકની વાત કરીએ તો તમિલનાડુ, પુડુચેરી અને કરાઈકલ, કેરળ અને માહેમાં અલગ-અલગ જગ્યાએ ભારે વરસાદ થયો હતો. હિમાચલ પ્રદેશમાં આજે સવારે ગાઢ ધુમ્મસ છવાયું હતું.

બધાજ સમાચાર અને અપડેટ્સ મેળવવા માટે પ્લેસ્ટોર/ એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ