અમદાવાદ / 'તારી વરદી ઉતારી દઈશ, તું મને ઓળખતો નથી' કહીને યુવકે ટ્રાફિક કર્મચારીને મુક્કો માર્યો

• વાહનચાલકની પોલીસ સામે દાદાગીરી
• યુવક વિરુદ્ધ ફરિયાદ નોંધાઈ
• યુવક સરકારી ફરજમાં અડચણરૂપ બન્યો

શહેરમાં ટ્રાફિકના નવા નિયમોના પગલે ટ્રાફિક પોલીસ દ્વારા રોજેરોજ ડ્રાઇવ કરવામાં આવી રહી છે ત્યારથી વાહનચાલકો અને પોલીસ વચ્ચે માથાકૂટની ઘટનાઓ પ્રકાશમાં આવતી રહે છે. ગઈ કાલે આસ્ટોડિયા દરવાજા પાસે બીઆરટીએસ કોરિડોરમાંથી એક યુવક બાઈક લઇ આગળ ધસી આવતાં ટ્રાફિક પોલીસે બાઇક સાઈડમાં ઊભું રાખવા માટે કહ્યું ત્યારે  બાઈકચાલકે ટ્રાફિક પોલીસને બીભત્સ ગાળો બોલી તારી વરદી ઉતારી દઇશ, તું મને ઓળખતો નથી તેમ કહી કર્મચારી સાથે ઝપાઝપી કરી મુક્કો મારી દીધો હોવાની ઘટના પ્રકાશમાં આવી છે.

શહેરના ઈ-ડિવિઝન ટ્રાફિક પોલીસ સ્ટેશનમાં ફરજ બજાવતા સંજયસિંહ ઝાલાએ યુવક વિરુદ્ધમાં ખાડિયા પોલીસ સ્ટેશનમાં ફરિયાદ નોંધાવી છે. લોકરક્ષક સંજયસિંહ આસ્ટોડિયા દરવાજા પાસે તેમના અધિકારીઓ અને સ્ટાફ સાથે હાજર હતા તે દરમિયાન એક બાઈકચાલક બીઆરટીએસ કોરિડોરમાંથી પસાર થઇ રહ્યો હતો. આથી પોલીસ કમિશનરના જાહેરનામાના ભંગ બદલ બાઈકચાલકને રોકી સાઈડમાં ઊભો રાખી દંડ ભરવો પડશે તેમ કહેતાં બાઇકચાલક પોલીસ કર્મચારી પર ઉશ્કેરાઈ ગયો હતો.

ત્યારબાદ બાઇકચાલકે પોલીસ કર્મચારીને બીભત્સ ગાળો બોલી કહ્યું કે ઘણા બધા માણસો બીઆરટીએસ કો‌રિડોરમાંથી નીકળે છે, તેમને કેમ રોકતા નથી, તું મને ઓળખતો નથી, તારી વરદી ઊતરાવી દઈશ. પોલીસ કર્મચારીએ ગાળો બોલવાની ના પાડી તો બાઈકચાલકે ઝપાઝપી કરી પોલીસ કર્મચારીને મુક્કો મારી દીધો હતો. ત્યારબાદ ટ્રાફિક પોલીસના સ્ટાફના માણસો જતાં બાઈકચાલકને પકડી ખાડિયા પોલીસ સ્ટેશન લઇ ગયા, જ્યાં બાઈકચાલકની પૂછપરછ કરતાં શા‌લિન ગજ્જર મણિનગરનો રહેવાસી હોવાનું જણાવ્યું હતું તે ખાડિયા પોલીસ સ્ટેશનમાં યુવક વિરુદ્ધમાં સરકારી ફરજમાં અડચણરૂપ બન્યાનો ગુનો નોંધી વધુ તપાસ હાથ ધરી છે.