અમદાવાદ શહેરમાં દિવસેને દિવસે છેડખાનીના બનાવ વધતા જાય છે. અને આવો જ એક કિસ્સો હાલમાં નિકોલ વિસ્તારમાં બન્યો છે. જે જાણીને લાગશે કે અમદાવાદ મહિલાઓ માટે દિન-પ્રતિદિન અસુરક્ષિત બનતું જાય છે.
રિક્ષાચાલકે એકલતાનો ફાયદો ઉઠાવ્યો
મહિલાએ દોઢ વર્ષથી રીક્ષા ભાડે આપી હતી
નિકોલ પોલીસ સ્ટેશનમાં મહિલાએ ફરિયાદ નોંધાવી
શહેરમાં જાહેરમાં છેડતી અને અશ્લીલ ચેનચાળાના બનાવ દિન-પ્રતિદિન વધી રહ્યા છે. નિકોલ વિસ્તારમાં આવેલ ઇન્ટરિસટી ગેલેક્સી ખાતે રહેતી વિધવાએ યાસીન છિપા નામના યુવક વિરુદ્ધમાં છેડતી તેમજ ધમકી આપી હોવાની ફરિયાદ કરી છે. મહિલા તેના બે દીકરા અને એક દીકરી સાથે રહે છે. મહિલાના ભાઈએ તેને એક રિક્ષા આપી હતી, જે શાહઆલમ ખાતે રહેતા યાસીન છિપાને છેલ્લા દોઢ વર્ષથી ભાડે ચલાવવા આપી હતી.
થોડા દિવસ પહેલાં મહિલાના બંને દીકરા નોકરી પર ગયા હતા અને મહિલા ઘરે એકલી હતી ત્યારે યાસીન રિક્ષાનું ભાડું આપવા માટે આવ્યો હતો. મહિલાને એકલી જોઇ યાસીને તેના પર નજર બગાડી હતી અને બીભત્સ માગણી કરી મહિલાનાં કપડાં ખેંચી બળજબરી કરવા લાગ્યો હતો. મહિલાએ એકદમ બૂમાબૂમ કરતાં યાસીન ત્યાંથી ભાગતાં ભાગતાં મહિલાને કહ્યું કે જો આ બાબતની કોઈને વાત કરી તો જાનથી મારી નાખીશ. મહિલાએ નિકોલ પોલીસ સ્ટેશનમાં ફરિયાદ કરતાં પોલીસે ગુનો નોંધી તપાસ હાથ ધરી છે.