શહેરમાં રોજે અવનવી ઘટનાઓ સામે આવતી હોઈ છે પરંતુ આ ઘટના થોડીક અલગ છે. શહેરમાં હવે સામાન્ય બાબતમાં હત્યા કરી દેવાની ઘટના વધતી જાય છે. જ્યારે એક રિક્ષાચાલકે તેમના પાડોશીને કેક ખવડાવવા જતાં કેકનો ટુકડો શર્ટ પર પડતાં પાડોશીએ ચપ્પુ મારી દીધું.
શહેરમાં સામાન્ય બાબતે છરી અને હત્યા કરી દેવાની ઘટનાઓ સતત વધી રહી છે ત્યારે રામોલ વિસ્તારમાં રહેતા એક રિક્ષાચાલકે તેમના પાડોશીને કેક ખવડાવવા જતાં કેકનો ટુકડો શર્ટ પર પડતાં પાડોશીએ ચપ્પુ મારી હત્યાની કોશિશ કરતાં ચકચાર મચી ગઈ છે. રામોલ પોલીસે હત્યાની કોશિશનો ગુનો નોંધી તપાસ હાથ ધરી છે. વસ્ત્રાલના ગંગા એપાર્ટમેન્ટમાં રહેતા રાજભાઇ રિક્ષા ચલાવીને ગુજરાન ચલાવે છે. ગઇ કાલે રાત્રે તેમના મિત્ર જગદીશભાઇ રિક્ષા લઇને થોડીવારમાં આવશે તેમ કહી નીકળ્યા હતા. પણ ઘણો સમય વીતી ગયો છતાંય તેઓ પરત આવ્યા ન હતા. જેથી રાજભાઇ ફ્લેટના ગેટ પાસે તેમની રાહ જોતા હતા.
તે દરમિયાનમાં રાજભાઇના ફ્લેટમાં રહેતા નિખિલ લકુમે તેમને ચપ્પુ મારી દીધું હતું. તપાસ કરતા માલુમ પડ્યું કે રાજભાઇ તેમના મિત્ર પરેશભાઇ અને આરોપી નિખિલ બગીચા પાસે ઊભા હતા. આ સમયે કોઇનો જન્મદિવસ હોવાથી તે કેક ખવડાવવા આવ્યા હતા. રાજભાઇ નિખિલને કેક ખવડાવવા ગયા હતા પણ નિખિલે ના પાડતાં કેકનો ટુકડો તેના શર્ટ પર પડ્યો હતો. જેથી આવેશમાં આવીને નિખિલે રાજભાઈને ચપ્પુ મારી દીધું હતું.