રાજ્યના વાતાવરણને લઈ હવામાન વિભાગ દ્વારા આગાહી કરવામાં આવી છે. જેમાં આગામી 5 દિવસ રાજ્યમાં વાતાવરણ સૂકું રહેવાની ધારણા બંધાઈ છે.
હવામાન વિભાગની આગાહી
5 દિવસ વાતાવરણ સૂકું રહેશે
4-5 જૂને અમદાવાદમાં યલો એલર્ટની શક્યતા
ઉનાળાની કાળઝાળ ગરમી વચ્ચે છેલ્લા બેથી ત્રણ દિવસથી રાજ્યના વાતાવરણમાં બદલાવ જોવા મળી રહ્યો છે. આવી સ્થિતિ વચ્ચે રાજ્યના વાતાવરણને લઈ હવામાન વિભાગ દ્વારા આગાહી કરવામાં આવી છે. જેમાં જણાવાયા અનુસાર આગામી 5 દિવસ રાજ્યમાં વાતાવરણ સૂકું રહેશે. તો સાબરકાંઠા અને બનાસકાંઠામાં થન્ડર સ્ટોર્મ એક્ટિવિટીની શકયતા પણ જોવા મળી રહી છે.હવામાન વિભાગના ડિરેક્ટર મનોરમા મોહન્તી જણાવ્યા અનુસાર કચ્છમાં પણ થન્ડર સ્ટોર્મ એક્ટિવિટીની શક્યતા જોવા મળી રહી છે.વધુમાં 4 અને 5 જૂને અમદાવાદમાં 41 ડિગ્રી સુધીના તાપમાન પર યલો એલર્ટ જેવું આકરું વાતાવરણ રહે તેવું જોવા મળી રહ્યું છે. આ ઉપરાંત રાજ્યના તાપમાનમાં 1 ડિગ્રીનો વધારો થાય તેવા પણ અણસાર વર્તાઇ રહ્યા છે.
હવામાન વિભાગે શું આગાહી કરી?
રાજ્યમાં આગામી 5 દિવસ વાતાવરણ સૂકું રહેશે
સાબરકાંઠા અને બનાસકાંઠામાં થન્ડર સ્ટોર્મ એક્ટિવિટીની શકયતા
કચ્છમાં પણ થન્ડર સ્ટોર્મ એક્ટિવિટીની શક્યતા
અમદાવાદમાં 41 ડિગ્રી સુધી તાપમાન રહેવાની શક્યતા
4 અને 5 જૂને અમદાવાદમાં યલો એલર્ટની સંભાવના
રાજ્યના તાપમાનમાં 1 ડિગ્રીનો થઈ શકે વધારો
8 જૂન સુધી રહેશે રોહિણી નક્ષત્ર
બીજી બાજુ ચોમાસાને લઈને હવામાન નિષ્ણાંત અંબાલાલ પટેલે પણ આગાહી કરી છે. જેમાં જણાવ્યું કે, ગુજરાતમાં 25 મેથી રોહિણી નક્ષત્ર ચાલે છે, 8 જૂન સુધી રોહિણી નક્ષત્ર રહેશે. 8 જૂને મૃગશીર્ષ નક્ષત્ર બેસી જશે. રોહિણી નક્ષત્રના ચાર પાયા છે. પહેલા ભાગમાં વરસાદ થાય તો 72 દિવસના વાયરા ફૂંકાય છે. બીજા ભાગમાં વરસાદ થાય તો એટલા વાયરાના દિવસ ઓછા ગણવા. એટલે પહેલા અને બીજા પાયામાં વરસાદ થયો છે. તેમજ રોહિણી ઉતરતા પણ વરસાદ થવાની શક્યતા છે.
4 જૂન સુધી વરસાદની આગાહી
તેમણે જણાવ્યું કે, ગુજરાતમાં કેટલાક ભાગમાં 4 જૂન સુધી વરસાદની આગાહી છે. તો 3થી 7 જૂન અરબ સાગરમાં હવાનું હળવું દબાણ ઉભું થવાની સંભાવના પણ અંબાલાલ પટેલ દ્વારા વ્યક્ત કરવામાં આવી છે. અંબાલાલ પટેલે જણાવ્યું કે, 8થી 10 જૂન વચ્ચે કેરળમાં ભારે પવન ફૂંકાશે. કેરળના દરિયા કિનારે 200 કિમીની ઝડપે પવન ફૂંકાઈ શકે છે. બંગાળના ઉપસાગર પર પણ ચક્રવાત સર્જાવાની શક્યતા છે. ચક્રવાતના કારણે ગુજરાતમાં વરસાદ આવશે. આ દરમિયાન દક્ષિણ સૌરાષ્ટ્ર અને દક્ષિણ ગુજરાતમાં વરસાદ થઈ શકે છે.