રાજકોટના જસદણમાં જાહેરમાં છાકટા થયા યુવાનો, દારૂ પાર્ટી કરતા યુવાનોનો વીડિયો સોશિયલ મીડિયામાં વાયરલ, પોલીસ થઇ દોડતી
રાજકોટના જસદણમાં દારૂ પાર્ટીનો વીડિયો વાયરલ
યુવાનો જાહેરમાં કરી રહ્યા છે દારૂ પાર્ટી
'પીલે પીલે.. ઓ મેરે રાજા ગીત પર ઝૂમ્યા '
ગુજરાતમાં દારૂબંધીનો અમલ કરાવવામાં પોલીસ ક્યાંક પાછી પડતી હોય તેમ લાગી રહ્યુ છે. બોટાદ કથિત લઠ્ઠાકાંડના પડઘા હજુ શમ્યા નથી ત્યાં વધુ એક દારૂની પાર્ટીનો વીડિયો સામે આવ્યો. ગુજરાતના યુવાનોને બરબાદ કરવા માટે ડ્રગ્સની ઘૂસણખોરી કરવામાં આવી રહી છે તો બીજી તરફ યુવાનો દારૂના નશામાં ચૂર થયા હોય તેવા વીડિયો સામે આવતા ચકચાર મચી છે.
યુવાનોની દારૂ પાર્ટીનો વીડિયો વાયરલ
રાજકોટના જસદણ વિસ્તારનો એક વીડિયો સામે આવ્યો છે જેમાં પાંચ યુવાનો ખુલ્લેઆમ દારૂની છોળો ઉડાડીને ટલ્લી બન્યા છે. દારૂ પીને જાહેર માર્ગ ઉપર છાકટા બન્યા છે. પીલે..પીલે ઓ મેરે રાજા ગીત પર યુવાનો બોટલો લઇને ઝૂમતા જોવા મળી રહ્યા છે. આ વીડિયો સોશિયલ મીડિયામાં વાયરલ થયો છે. વીડિયો સામે આવતા જિલ્લા પોલીસે આરોપીઓને શોધવા માટેની તજવીજ હાથ ધરી છે. પરંતુ ઘણીવાર સવાલ એ થાય કે યુવાનો આવી રીતે જાહેરમાં ખુલ્લેઆમ નિયમોનું ઉલ્લંઘન કરીને છાકટા બને છે ત્યારે શા માટે આ કરતૂત પોલીસની નજરમાં આવતી નથી.
યુવાનો પાસે દારૂ આવ્યો ક્યાંથી ?
ઇંગ્લિશ દારૂ પીને નશામાં ચૂર યુવાનોને પોલીસનો કોઇ ડર હોય તેમ લાગતુ નથી. પરંતુ અહીં સવાલ એ થાય છે કે ગુજરાતમાં ઇંગ્લિશ દારૂ આવે છે ક્યાંથી ? શું કરી રહ્યું છે જસદણનું તંત્ર ? ખુલ્લેઆમ દારૂ પીને છાકટા બનેલા આ યુવાનો વિરુદ્ધ કાર્યવાહી થશે ખરા ? ગુજરાતનું યુવાધન નશાના રવાડે ચઢી રહ્યુ છે તેના જવાબદાર કોણ ? હજુ તો આવો એક વીડિયો સામે આવ્યો છે આવા અનેક યુવાનો હશે જેની જિંદગી દારૂની લત પાછળ બરબાદ થઇ હશે. તંત્ર દ્વારા દારૂબંધી કરવામાં આવે છે તો પછી અમલવારી કરાવવામાં કેમ ઢીલી નીતિ દાખવી રહ્યા છે.