રાજયભરમાં દારૂબંધીને લઈને મોટી મોટી વાતો કરવામાં આવી રહી છે. ત્યારે આ વાતો અહિંયા પોકળ સાબિત થઈ રહી છે. રાજકોટમાં નશામાં ધૂત ટ્રાફિક પોલીસકર્મીનો વીડિયો સોશિયલ મીડિયામાં વાયરલ થયો છે. નશામાં ધૂત ટ્રાફિક પોલીસકર્મી ચા-પાનની દુકાનો બંધ કરવા નીકળ્યા હતા, તેમણે એટલો દારૂ ઢીંચ્યો હતો કે, તેમને ન તો ચાલવાની ભાન હતી કે ન તો બોલવાની ભાન હતી.
લાકડી ઉગામીને દુકાનદારોને દુકાન બંધ કરવા ધમકાવ્યા
ટ્રાફિક વિભાગમાં ફરજ બજાવતા હેડ કોન્સ્ટેબલ નરભેરામ પટેલ પોલીસ લખેલુ ટી-શર્ટ પહેરીને રાજકોટ શહેરના કોઠારિયા રોડ પર આવેલી નીલકંઠ ટોકીઝ પાસે ચા-પાનની દુકાને પહોંચ્યા હતા અને લાકડી ઉગામીને દુકાનદારોને દુકાન બંધ કરવા ધમકાવવા લાગ્યા હતા. જોકે, તેઓ નશામાં ધૂત હોવાનું માલુમ પડતા લોકોએ પોતાના મોબાઈલમાં તેમનું વીડિયો શૂટિંગ કર્યું હતું. જે વીડિયો લોકોએ ફરતો કરતા સ્થાનિક પોલીસ દોડતી થઈ હતી અને જમાદાર નરભેરામ પટેલને સકંજામાં લેવામાં આવ્યા હતા.
પોલીસે કરી કાર્યવાહી
આ અંગે ભક્તિનગર પોલીસ સ્ટેશનના પોલીસ ઈન્સપેક્ટર ચાવડાએ જણાવ્યું કે, ટ્રાફિક શાખામાં ફરજ બજાવતા પોલીસ કોન્સ્ટેબલ નરભેરામ પટેલની સામે કાર્યવાહી કરવામાં આવી છે. શહેરમાં કાયદો વ્યવસ્થાની સ્થિતિ બગાડનાર કોઈ પણ વ્યક્તિને છોડવામાં આવશે નહીં.