વડોદરા શહેરમાં ઓટોરિક્ષામાં જઈ રહેલી એક યુવતીને બાઈક પર જતા ત્રણ રોડ રોમિયોએ હેરાન પરેશાન કરતા પોલીસે ત્રણેયને ઝડપી લીધા છે. ત્યારે આ યુવતીએ VTVને સમગ્ર ઘટના જણાવી છે.
વડોદરા પોલીસે રોડ રોમિયોને કરાવ્યું કાયદાનું ભાન
યુવતીને હિંમત દાખવી પોલીસ પાસે માંગી હતી મદદ
યુવતીએ VTV સમક્ષ સમગ્ર ઘટના જણાવી
તેઓની ઉંમર ઓછી હોવાથી મેં કેસ ન કર્યોઃ યુવતી
વડોદરા શહેરમાં મહિલા અને યુવતીના છેડતીના એક પછી એક ચોંકાવનારા બનાવો વચ્ચે શહેરમાં ઓટોરિક્ષામાં જઈ રહેલી એક યુવતીને બાઈક ઉપર જતા ત્રણ ટોપરી રોડ રોમિયોએ હેરાન કરતા હતા. જેને લઈને યુવતીએ હિંમત દાખવી સમગ્ર ઘટનાનો વીડિયો સોશિયલ મીડિયા પર શેર કરી પોલીસની મદદ માંગી હતી. ત્યારબાદ વડોદરા પોલીસની શી ટીમે ત્રણેય રોડ રોમિયોને પકડી પાડી કાયદાનું ભાન કરાવ્યું હતું. ત્યારે હવે આ પીડિત યુવતીએ સમગ્ર ઘટનાનો VTV સમક્ષ ખુલાસો કર્યો છે.
2-3 કિલોમીટર સુધી મેં તેઓને નજરઅંદાજ કર્યાઃ યુવતી
VTV સાથેની વાતચીત દરમિયાન યુવતીએ જણાવ્યું કે, 'હું ગેંડા સર્કલથી ઘરે જવા ઓટિરિક્ષામાં નીકળી હતી, જે બાદ પંડ્યા બ્રિજથી આ ત્રણેય રોમિયોએ મને ફોલો કરવાનું શરૂ કર્યું. તેઓએ મારો લગભગ 7-8 કિલોમીટર સુધી પીછો ક્યો. શરૂઆતમાં 2-3 કિલોમીટર સુધી મેં તેઓને નજરઅંદાજ કર્યાં. પરંતુ જ્યારે મારું ઘર નજીક આવ્યું ત્યારે મને એક્શન લેવાનું જરુરી લાગ્યું. કારણ કે જો તેઓને મારા ઘરનું એડ્રેસ મળી જાત તો તેઓ ભવિષ્યમાં મને પરેશાન કરેત. જેથી મેં ફોનમાં વીડિયો ઉતારવાનું શરૂ કર્યું.'
'વીડિયો ઉતારીને મેં સોશિયલ મીડિયા પર શેર કર્યો'
યુવતીએ કહ્યું કે, 'જ્યારે મેં જોશથી પોલીસ સ્ટેશન જવાની રાડ પાડી, ત્યારે તેઓ ત્યાંથી ફૂલ સ્પીડમાં બાઇક ચલાવીને નાસી છૂટ્યા. આ વીડિયો મેં સોશિયલ મીડિયા પર અપલોડ કર્યો હતો અને પોલીસની શી-ટીમે 2-3 દિવસમાં તેઓની સામે કાર્યવાહી કરી. પોલીસે ત્રણેયની ધરપકડ કરી. યુવતીએ વધુમાં જણાવ્યું કે, તેઓની ઉંમર ઓછી હોવાથી મેં તેમની સામે કેસ કર્યો નથી.'
શું છે સમગ્ર મામલો?
વડોદરાની એક યુવતી જ્યારે ઓટોરિક્ષામાં જઈ રહી હતી, ત્યારે બાઇક પર ત્રિપલ સવારી આવેલા રોડ રોમિયોએ તેનો લગભગ 7-8 કિલોમીટર સુધી પીછો કર્યો હતો અને પરેશાન કરી હતી. જેનો યુવતીએ રિક્ષા બેઠા-બેઠા વીડિયો ઉતાર્યો હતો. આ વીડિયો તેણીએ હિંમત દાખવી રોડ રોમિયોને સબક શીખવવા સોશિયલ મીડિયામાં શેર કર્યો હતો. સમગ્ર ઘટના અંગે વડોદરા શહેર પોલીસે એક્શન મોડમાં આવી ત્વરિત કાર્યવાહી કરી હતી.
વડોદરા પોલીસે પણ શેર કર્યો હતો વીડિયો
વડોદરા શહેર પોલીસની 'SHE ટીમ' 3થી 4 દિવસમાં જ આકરા પગલાં લીધા હતા અને આ ત્રણેય રોમિયોને પકડી પાડી તેમની ગાડી ડિટેઇન કરી કાયદાનું ભાન કરાવ્યું હતું. વડોદરા પોલીસે આ વીડિયો ટ્વિટર પર શેર પણ કર્યો છે.
યુવતીએ પોલીસનો આભાર માન્યો
જે બાદ આ યુવતીએ પોલીસનો આભાર માન્યો હતો. આ યુવતીએ વીડિયો દ્વારા તમામ યુવતીઓ અને મહિલાઓને અપીલ કરતા જણાવ્યું હતું કે, તમે પણ અવાજ ઉઠાવો, જો તમે અવાજ ઉઠાવશો તો પોલીસ તમારી મદદ કરવા માટે તૈયાર છે. તમારે માત્ર મદદ માંગવાની જરૂર છે. જ્યાં સુધી તમે કહેશો નહીં કે, તમારી સાથે શું થયું છે, ત્યાં સુધી પોલીસ તમારી મદદ કેવી રીતે કરશે? તમે આ બાબતોને રોકશો નહીં, તો તમે પણ ક્રાઇમને વધારી રહ્યા છો તેવું જણાવી આવી નાની બાબતો મોટું સ્વરૂપ ધારણ કરી લે તે પહેલા અવાજ ઉઠાવવો જરૂરી હોવાનું ભારપૂર્વક કહ્યું હતું.