અમેરિકાની પ્રમુખ ડિફેન્સ મેન્યુફેક્ચરિંગ કંપની લોકહિડ માર્ટિને આજે MH 60 Romeo મલ્ટિ-રોલ હેલિકોપ્ટરનો પહેલો ફોટો ભારતીય રંગમાં ભારતીય નૌકાદળ માટે શેર કર્યો છે. ભારતે આ માટે 2.6 અબજ ડોલરના સોદા પર હસ્તાક્ષર કર્યા છે, જે અંતર્ગત 24 MH 60 Romeo હેલિકોપ્ટર ભારતીય નૌકાદળ માટે લોકહિડ માર્ટિન પાસેથી ખરીદવામાં આવશે.
ભારતીય રંગોમાં MH 60 Romeo હેલિકોપ્ટરની તસવીર જાહેર કરાઇ
2.6 બિલિયન ડોલરના ખર્ચે ટ્રમ્પની ભારત મુલાકાત વખતે થયો હતો સોદો
ભારતીય નૌકાદળમાં બ્રિટિશ બનાવટના જૂના સી કિંગ હેલિકોપ્ટરની જગ્યા લેશે
આ હેલિકોપ્ટર યુદ્ધ જહાજો, વિનાશિકા, ક્રુઝર્સ અને વિમાનવાહક જહાજો દ્વારા સંચાલિત થઈ શકે છે. MH 60 Romeo હાલમાં 'વિશ્વના સૌથી અદ્યતન દરિયાઇ હેલિકોપ્ટર' તરીકે ઓળખાય છે. હાલમાં વિશ્વભરમાં 300 થી વધુ આવા હેલિકોપ્ટર કાર્યરત છે. યુએસ નૌકાદળમાં, તે ખુલ્લા સમુદ્ર અને દરિયાઇ વિસ્તારો માટે એન્ટિ-સબમરીન હથિયાર સિસ્ટમ તરીકે તૈનાત છે.
MH 60 Romeo હેલિકોપ્ટર ભારત માટે આધુનિક હથિયાર બનશે
સબમરીનને શોધીને તેને નષ્ટ કરવા માટે બનાવાયેલ આ હેલિકોપ્ટર હાલમાં ભારતીય નૌકાદળ માટે આધુનિક હથિયાર પુરવાર થશે. હિન્દ મહાસાગર, અરબ સાગર અને બંગાળના ઉપસાગરમાં હાલમાં ચીન અને પાકિસ્તાન દ્વારા ઘણા નવા પડકારો ઊભા કરવામાં આવ્યા છે, ખાસ તો ચીનની વધતી જતી સબમરીન ક્ષમતા ભારત માટે ખતરાની ઘંટડી સમાન છે ત્યારે આ હેલિકોપ્ટર તેને ભારતનો જવાબ મનાઈ રહ્યા છે.
લોકહિડ માર્ટિન દ્વારા બનાવવામાં આવેલા આ હેલિકોપ્ટર દુશ્મન જહાજો અને સબમરિન પર નજર રાખ્યા સિવાય અને દરિયામાં શોધ અને બચાવ કામગીરી કરવા માટે પણ ઉપયોગમાં લઈ શકાશે. સૂત્રો દ્વારા મળતી માહિતી અનુસાર બ્રિટેન નિર્મિત જૂના સી કિંગ હેલિકોપ્ટરની જગ્યાએ ભારતીય નૌકાદળના કાફલામાં સમાવેશ કરવામાં આવશે.
મલ્ટિ ફંક્શન છે આ હેલિકોપ્ટર
લોકહિડ માર્ટિન ની સત્તાવાર વેબસાઇટ પર ઉપલબ્ધ વિગતો અનુસાર પાણીની અંદર દુશ્મનની ભાળ મેળવવી, તેમનાથી ઊભા થયેલા ખતરાનું આકલન કરવું, સુરક્ષા એજન્સીઓ સાથે કોઓર્ડિનેટ કરવું, મિશનમાં બદલાવ કરવો અને જહાજ અને સમુદ્રના કિનારે રહીને પણ સંચાલનને યોગ્ય હોવું, મલ્ટિ ફંક્શનને યોગ્ય હોવું અને પ્રતિકૂળ મોસમમાંઅ પણ પૂરી ક્ષમતા સાથે કામ કરવું તે MH 60 Romeo ની ખાસિયત છે.
તે જ સમયે, વિશ્લેષકોના જણાવ્યા અનુસાર, તે ભારતીય નૌકાદળ નું સૌથી સક્ષમ હેલિકોપ્ટર છે જે યુદ્ધ જહાજો, ડિસ્ટ્રોયર્સ, ક્રુઝર્સ અને વિમાનવાહક જહાજોથી પણ સંચાલિત થઈ શકે છે. MH 60 Romeo હાલમાં નૌકાદળની હેલિકોપ્ટર બ્રાન્ચની કરોડરજ્જુ બની શકે તેમ છે.