મહેસાણા / અનોખું કેળવણી મંદિર જે અભ્યાસ સાથે શિખવાડે છે જીવન જીવવાના પાઠ

• અનોખું કેળવણી મંદિર
• અભ્યાસ સાથે જીવનના પાઠ
• સ્વાવલંબી બનાવતી પાઠશાળા

આમ તો શિક્ષણનું બીજું નામ કેળવણી છે અને કેળવણી ત્યારે જ યથાર્થ ઠરે જ્યારે બાળક સંપૂર્ણ અર્થમાં કેળવાય. જો કે આજની શિક્ષણ વ્યવસ્થામાં માત્ર પુસ્તકિયું જ્ઞાન જ સર્વોપરી બની ગયું છે.આ કારણે બાળકની  ખરી કેળવણી અધૂરી રહી જાય છે. પરંતુ મહેસાણાના વિહાર ગામમાં ચાલતી વેદ ઇન્ટરનેશનલ સ્કૂલ નામની શાળાએ સામાન્ય ફીમાં શિક્ષણની વિભાવના જ બદલી નાખી છે. 

બાળકો પુસ્તકીયા જ્ઞાનની સાથે અપાય છે જીવન જીવવાના પાઠ

નાના ગામડામાં કાર્યરત આ શાળા તેના બાળકોને ફોરેન લેંગ્વેજ શીખવવાની સાથે સાથે બાળકોને રોજબરોજના જીવનમાં ઉપયોગી તમામ કામ શીખવે છે. આ શાળામાં બાળકોને રસોઈ કરતા શીખવવામાં આવે છે. તો શાળામાં જ બાળકને સુથારી કામ અને ઇલેક્ટ્રિકના કામ શીખવવામાં આવે છે. જેના પાછળ શાળાના શિક્ષકોનો એ આશય છે કે, બાળકો પુસ્તકીયા જ્ઞાન સાથે સાથે જીવનના નાના મોટા પ્રોબ્લેમ સોલ્વ કરી શકે તેવી રીતે પણ કેળવાય. 

મોટા શહેરોની શાળા જ આપી શકે સારું શિક્ષણ તેવો ખ્યાલ પડ્યો ખોટો 

આમ તો સામાન્ય રીતે લોકોમાં એવો ખ્યાલ પ્રવર્તે છે કે મોટા શહેરોની શાળા જ સારું શિક્ષણ આપી શકે. પણ આ ખ્યાલને વિહાર જેવા નાનકડા ગામની આ શાળાએ ખોટો પાડયો છે. આ શાળા એફ આર સી એ નક્કી કરેલી ફી કરતા પણ ઓછી ફીમાં અભ્યાસ કરાવે છે. છતાં પણ  આ શાળા તેના બાળકો જીવનના કોઈ તબક્કો પાછળ ન રહી જાય તેવો પ્રયાસ કરી રહી છે. 

સ્વરક્ષણ કરવાના પાઠ પણ શિખવાય છે આ વિદ્યામંદિરમાં

શાળામાં શિક્ષણની સાથે સાથે વિવિધ કામ તો શીખવવામાં આવે જ છે. સાથે સાથે વિદ્યાર્થિનીઓ સ્વરક્ષણ કરી શકે તે માટે શાળામાં જુડો અને કરાટેની પણ તાલીમ આપવામાં આવે છે. આવી અનેકવિધ પ્રવૃતિઓને લઈને શાળામાં અભ્યાસ કરતા બાળકો ભાર વિનાના ભણતરનો અનુભવ કરી રહ્યા છે.  

બાળક માતા પિતા પછી સૌથી વધુ સમય પોતાની શાળામાં ગાળે છે. ત્યારે જો શાળામાં જ તેને કેળવણીના સંપૂર્ણ પાઠ ભણવા મળે તે બાળક ના વિકાસ માટે સૌથી ઉત્તમ સ્થિતિ ગણી શકાય. ત્યારે મહેસાણાના ગ્રામ્ય વિસ્તારની આ શાળા પાસેથી તગડી ફી વસુલતી શાળાઓએ શીખ લેવા જેવી છે.