નશાનો કારોબાર / કચ્છનાં જખૌમાંથી ફરી મળ્યું ડ્રગ્સ, યુવાધનને બરબાદ કરવાનું કાવતરું, અત્યાર સુધીમાં 1 કિલોનાં 48 પેકેટ મળ્યા

• ક્ચ્છના દરિયાઈ જખૌ વિસ્તારમાંથી ડ્રગ્સ મળ્યું
• BSF અને પોલીસ પેટ્રોલીંગ દરમ્યાન ડ્રગ્સ મળ્યું
• અત્યાર સુધી સર્ચ દરમ્યાન 1 KGના 48 પેકેટ મળ્યાં 

ગુજરાતના દરિયાકાંઠે પોલીસ અને સુરક્ષા એજન્સીઓ સતર્ક હોવાના દાવા વચ્ચે ડ્રગ્સ મળવાની ઘટનાઓમાં કોઇ ફેરફાર જોવા મળ્યો નથી. ગુજરાતનો દરિયા કિનારો ડ્રગ્સના દૂષણ મામલે પહેલેથી જ બદનામીનો માર ભોગવી રહ્યો છે. આ રમણીય દરિયા માથે સફેદ કલંક સમાન ડ્રગ્સનો અવારનવાર જથ્થો ઝડપાઇ રહ્યો છે. તેવાં સંજોગો વચ્ચે આજે ફરી એક વાર કચ્છ વિસ્તારમાંથી ડ્રગ્સ મળી આવ્યું.

અત્યાર સુધી 1કિલોના 48 પેકેટ મળી આવ્યા

કચ્છના દરિયાઇ જખૌ વિસ્તારમાંથી બીએસએફ અને પોલીસ પેટ્રોલિંગ દરમિયાન ડ્રગ્સ મળી આવ્યું. થોડા દિવસ અગાઉ પાકિસ્તાની બોટ ઝડપાઇ હતી. IMBL નજીકથી પાકિસ્તાની બોટ ઝડપાઇ હતી.  પાકિસ્તાની બોટમાંથી ડ્રગ્સનો ફેકાયેલો જથ્થો હોવાની શક્યતા  છે. અગાઉ મળેલા ચરસના બિનવારસી પેકેટ કરતા અલગ પેકેટ મળી આવ્યા છે. મહત્વનું છે કે  અત્યાર સુધી સર્ચ દરમ્યાન 1 KGના 48 પેકેટ મળી આવ્યા છે. પોલીસ તથા એજન્સી તપાસ કરી જથ્થા અંગે વિગતો જાહેર કરશે. 

હરામીનાળામાંથી પાકિસ્તાની બોટ ઝડપાઇ

એક અઠવાડિયા અગાઉ  કચ્છના હરામીનાળા વિસ્તારમાંથી સતત બીજા દિવસે પણ BSFએ પેટ્રોલીંગ દરિયાન પાકિસ્તાની બોટ અને પાકિસ્તાની ઘુસખોરોને ઝડપી પાડ્યાં હતા. . મહત્વનું છે કે, ગતરોજ આ વિસ્તારમાંથી પેટ્રોલીંગ દરમિયાન બે પાકિસ્તાની માછીમાર અને 4 બોટ કબ્ઝે કરી હતી. 

અગાઉ ચરસના પેકેટ મળી આવ્યા હતા

અબડાસાના સિંધોડી નજીક જખૌ મરીન પોલીસ પેટ્રોલિંગ કરી રહી હતી આ દરમિયાન ચરસના પેકેટ મળી આવ્યા હતા. મરીન પોલીસે ચરસ જપ્ત કરીને આગળની કાર્યવાહી હાથધરી હતી. છેલ્લા ઘણા સમયથી અવારનવાર ડ્રગ્સ મળી આવવાનો સિલસિલો યથાવત જોવા મળી રહ્યો છે ત્યારે ગુજરાતના દરિયાકાંઠા પર ચુસ્ત બંદોબસ્ત અને સુરક્ષા કર્મીઓ તૈનાત કરવા અનિવાર્ય થઇ પડે છે.