વર્ષો પહેલાં લાલ અને સફેદ રંગના જ ગરબા માતાજીની આરાધનામાં રાખવામાં આવતા, હવે તે ગરબાનું સ્થાન ડિઝાઈનર ગરબાએ લીધું
નવરાત્રીમાં 1 દિવસ બાકી
માર્કેટમાં ટ્રેન્ડ કરી રહ્યા છે ડિઝાઈનર ગરબા
પરંપરાગતની સાથે ડિઝાઈનર ગરબાનો ટ્રેન્ડ વધ્યો
ગુજરાતભરમાં શક્તિના આગમનની તૈયારીઓ શરૂ કરી દેવાઈ છે. દેવીમાનું નવ દિવસનું પાવન પર્વ શારદીય નવરાત્રિ આવતી કાલ તા. ૭થી ૧૪ ઓક્ટોબર સુધી શરૂ થઇ રહ્યું છે. નવરાત્રિનો પ્રારંભ વૈધૃતિ યોગમાં છે. આ ઉપરાંત નવરાત્રિના આઠ દિવસ છે એટલે કે એક તિથિ ઓછી છે. તા.૧૫ ઓક્ટોબરના રોજ ધામધૂમ સાથે વિજયાદશમી એટલે કે દશેરા ઊજવવામાં આવશે. આ દિવસે દુર્ગા વિસર્જન પણ કરવામાં આવશે. વર્ષો પહેલાં લાલ અને સફેદ રંગના જ ગરબા માતાજીની આરાધનામાં રાખવામાં આવતા હવે તે ગરબાનું સ્થાન ડિઝાઈનર ગરબાએ લીધું છે.
માર્કેટમાં ડિઝાઈનર ગરબાની માંગ વધી
શહેરમાં લાઈટિંગવાળા અને ડિઝાઈનર ગરબાની માગ વધી રહી છે. વર્ષોથી પરંપરાગત લાલ અને સફેદ રંગના જ ગરબા માતાજીની આરાધનામાં રાખવામાં આવતા હતા. પરંતુ આ સ્થાન હવે રંગબેરંગી અને કલાત્મક ગરબાએ લઈ લીધું છે. વર્તમાન સમયમાં લોકો ડિઝાઈનર ગરબા પસંદ કરી રહ્યા છે. તો કેટલાક લોકો નવરાત્રિ પર બે ગરબા ખરીદે છે. જેમાં એક સાદો પરંપરાગત મંદિરમાં મુકાતો ગરબો અને બીજો ડિઝાઈનર ગરબો. સાદો ગરબો નવરાત્રિ પૂરી થતાં પધરાવી દેવાય છે જ્યારે ડિઝાઈનર ગરબો આખું વર્ષ શો પિસ તરીકે ઘરમાં રાખવામાં આવે છે.
ડિઝાઈનર ગરબા રૂ.૧૩૦થી રૂ. ૨૭૦૦ સુધીની રેન્જમાં બજારમાં મળી રહ્યા છે. જોકે વર્ષો પહેલાં લાલ અને સફેદ રંગના જ ગરબા માની આરાધનામાં મૂકવામાં આવતા હતા. શહેરમાં ડિઝાઈનર ગરબા, લાઈટિંગવાળા ગરબા, ફરતા ગરબા સહિતના ગરબા બનાવવામાં આવી રહ્યા છે.
બાજઠવાળા ગરબાની પણ લોકોમાં ભારે માગ
અવનવા કલાત્મક ગરબામાં આભલાં, ટીકી, સ્ટોન, મોતી, ડાયમંડ વર્ક, મિરર વર્ક વગેરે ચીપકાવીને ગરબાને ડિઝાઈનર બનાવવામાં આવે છે. આ ઉપરાંત બાજઠવાળા ગરબાની પણ લોકોમાં ભારે માગ છે. લાઈટિંગવાળા ગરબા બનાવતા ત્રણથી ચાર દિવસ જેવો સમય લાગે છે. જેમાં પ્રથમ બેથી ત્રણ દિવસ ડેકોરેશન કરવામાં લાગે છે, બાદમાં એક દિવસ લાઈટનું ફિટિંગ કરવામાં આવે છે, ત્યારબાદ તેમાં એક એડેપ્ટર લગાવી ઈલેક્ટ્રિક વાયર સાથે જોડવામાં આવે છે. આમ તમામ કામગીરી પૂર્ણ કરી પાવર ઓન કરતા ગરબામાં લાઈટ થાય છે. આ ઉપરાંત ફરતો ગરબો બનાવવા માટે મોટરનો ઉપયોગ કરવામાં આવે છે.આ મોટરને ઈલેક્ટ્રિક તેમજ સેલ સાથે જોડી શકાય છે અને બાદમાં પાવર ઓન કરતાં સ્ટેન્ડ પર રહેલો ગરબો ફરે છે.
વિદેશોમાં પણ ડિઝાઈનર ગરબાની માગ હોવાથી બે માસ પહેલાં જ કુરિયર કરવામાં આવે છે. એક દિવસમાં દરરોજ ૧૫-૨૦ જેટલા ગરબા બનાવી શકાય છે. પ્રસિદ્ધ મંદિરોમાં પણ ડિઝાઈનર ગરબાની માગ રહે છે. વેપારીઓને મતે ગરબાની સિઝનમાં એક વેપારી ૧૨૦૦-૧૫૦૦ ગરબાનું વેચાણ કરે છે. ૨૦-૨૫ દિવસ પહેલાં ગરબાનું બુકિંગ શરૂ થઈ જાય છે.