કોઇ જઘન્ય ગુના માટે માનવીનો ફાંસી આપવામાં આવી હોવાની વાત તો આપણે સાંભળી છે પરંતુ ક્યારેય એવું સાંભળ્યું છે કે, કોઇ હાથીને ફાંસીને આપવામાં આવી હોય, આ વાત ભલે માનવામાં ન આવે પરંતુ હકિકત છે. આશરે 104 વર્ષ પહેલા અમેરિકામાં આ ઘટના બની હતી.
વિશ્વની એકમાત્ર ઘટના
જ્યારે હાથીને આપવામાં આવી ફાંસી
અમેરિકામાં બની હતી આ ઘટના
આ ક્રૂર ઘટના 13 સપ્ટેમ્બર 1916ના દિવસે બની હતી. જ્યારે અમેરિકાના ટેનેસી રાજ્યમાં 2 હજારથી વધુ લોકો વચ્ચે મેરી નામના હાથીને ફાંસી પર લટકાવવામાં આવ્યો. આ ફાંસી પાછળ પણ કારણ હતું જેના વિશે જાણીને તમે પરેશાન થઇ જશો.
સર્કસમાં કામ કરતો હાથી
ઉલ્લેખનીય છે કે, ચાર્લી સ્પાર્ક નામનો માણસ સ્પાર્કસ વર્લ્ડ ફેમસ શો નામનું ટ્રાવેલિંગ સર્કસ ચલાવતો હતો.આ સર્કસમાં કેટલાય જાનવર હતા. જેમાં મેરી નામના એશિયન હાથીના કરતબ ફેમસ હતા.મેરીને કંટ્રોલ કરનારા માણસે નોકરી છોડી દેતા રેડ એલ્ડ્રિઝ નામના યુવાને સર્કસ જોઇન કર્યું હતું.
નવો મહાવત મેરીથી હતો અજાણ
નોંધનીય છે કે, મહાવતને મેરી હાથી વિશે કાંઇ જાણકારી હતી નહીં અને મેરીએ તે મહાવત સાથે વધુ સમય પસાર કર્યો હતો. એટલા માટે મેરીને કંન્ટ્રોલ કરવા માટે મહાવતને તકલીફ પડી રહી હતી. પરંતુ આ તમામ બાબત વચ્ચે એક દિવસ સર્કસના પ્રમોશન માટે શહેરમાં પરેડનું આયોજન કરવામાં આવ્યું જેમાં મેરી સહિત તમામ જાનવર તથા સર્કસના તમામ કલાકારો સામેલ હતા. શહેરની મધ્યમાં જ્યારે પરેડ ચાલી રહી હતી ત્યારે મેરીને કાઇ ખાવાની ચીજ દેખાઇ અને તે ઝડપથી તે તરફ દોડ્યો.
મહાવતથી ગુસ્સે ભરાયેલા હાથીએ તેને પછાડ્યો
હવે નવા મહાવતે મેરીનો રોકવાનો ખૂબ પ્રયાસ કર્યો પરંતુ તે રોકાયો નહીં. આ દરમિયાન મહાવતે તેને કાન પાછળ ભાલો માર્યો, જેનાથી હાથી ગુસ્સો ભરાયો અને ગુસ્સાથી મહાવતને નીચે પછાડ્યો અને તેના પર પગ મુકતા મહાવતનું મોત નિપજ્યું. આ ઘટનાને લઇને લોકોમાં અફરાતફરી મચી. તો કેટલાક લોકોએ હાથીને મારી નાખવા માટે હંગામો શરૂ કર્યો અને જો કે, આ ઘટના જ્યારે અખબારમાં પ્રસિદ્ધ થઇ ત્યારે તે સમગ્ર શહેરમાં વાયુવેગે ફેલાઇ.
લોકોએ હાથીને ફાંસી આપવાની કરી વાત
શહેરના લોકોએ સર્કસના માલિક ચાર્લી સ્પાર્ક પાસેથી મેરી (હાથી) ને ફાંસીની સજાની માંગ શરૂ કરી. તે જ સમયે, તેમણે ધમકી પણ આપી હતી કે જો આવું ન થાય તો તેઓ ફરી ક્યારેય શહેરમાં સર્કસ નહીં થવા દે. ઘણા લોકોએ હાથીને ઘણી રીતે મારવાની વાત કરી. જ્યારે કોઈએ ટ્રેનથી કચડી નાખવાનું કહ્યું, તો કોઈએ હાથીને વિદ્યુતશક્તિથી મારી નાખવાનું કહ્યું.
13 સપ્ટેમ્બર 1916ના રોજ હાથીને લટકાવી દેવાયો
આખરે, ચાર્લી સ્પાર્કને લોકોની જીદ સામે નમવું પડ્યું અને મેરી (હાથી) પર ફાંસીની સજા લાદવાનો નિર્ણય કર્યો. આ માટે, તેણે 100 ટન વજનવાળા ક્રેનનો ઓર્ડર આપ્યો અને 13 સપ્ટેમ્બર 1916 માં, ક્રેનની મદદથી, હાથીને હજારોની વચ્ચે લટકાવી દેવાયો. આ ઘટનાને ઇતિહાસમાં પ્રાણીઓ પ્રત્યે માનવતાનું સૌથી ક્રૂર ઉદાહરણ માનવામાં આવે છે.