BIG NEWS / પડોશી દેશે યુવતીઓ માટે યુનિવર્સિટીના દરવાજા કર્યા બંધ, સંલગ્ન યુનિ. તાત્કાલિક બંધ કરવાની 'તાલિબાની' ઘોષણાથી હાહાકાર

• અફઘાનિસ્તાનમાં તાલિબાનીઓનો નવો ફરમાન
• મહિલાઓ માટે ચાલતી યુનિવર્સિટીઓને બંધ કરવાના આદેશ
• છોકરાઓની શાળામાં છોકરીઓ અભ્યાસ કરી શકશે નહીં

તાલિબાને અફઘાનિસ્તાનમાં મહિલાઓ વિરુદ્ધ કડક આદેશ બહાર પાડ્યો છે. અફઘાનિસ્તાનમાં મહિલાઓ માટેની યુનિવર્સિટી બંધ કરવાની જાહેરાત કરવામાં આવી છે. ઉચ્ચ શિક્ષણ મંત્રીના એક પત્ર અનુસાર તાલિબાને અફઘાનિસ્તાનમાં છોકરીઓ અને મહિલાઓ માટે ચાલતી યુનિવર્સિટીઓને બંધ કરવાની જાહેરાત કરી છે. એક મીડિયા રિપોર્ટ અનુસાર, અફઘાનિસ્તાનના મંત્રીનું કહેવું છે કે આ આદેશ આગળની સૂચના ન મળે ત્યાં સુધી લાગુ રહેશે અને તેને તાત્કાલિક અસરથી લાગુ કરવામાં આવે તેવી અપેક્ષા છે.

યુવતીએ યુનિવર્સિટીઓની પ્રવેશ પરીક્ષા આપી હતી
તાલિબાનના નવા આદેશ બાદ દેશભરની યુનિવર્સિટીમાં કોઈપણ યુવતી કે મહિલા પ્રવેશ મેળવી શકશે નહીં. ત્રણ મહિના પહેલા જ સમગ્ર અફઘાનિસ્તાનની હજારો વિદ્યાર્થીનીએ યુનિવર્સિટીઓની પ્રવેશ પરીક્ષા આપી હતી.

છોકરાઓની શાળામાં છોકરીઓ અભ્યાસ કરી શકશે નહીં
તમને જણાવી દઈએ કે અફઘાનિસ્તાન પર કબજો કર્યા બાદ તાલિબાને મહિલાઓ અને છોકરીઓના શિક્ષણને લઈને એક આદેશ બહાર પાડ્યો હતો. જેમાં કહેવામાં આવ્યું હતું કે છોકરાઓની શાળામાં છોકરીઓ અભ્યાસ કરી શકશે નહીં. તેમજ તેમને માત્ર મહિલા શિક્ષિકા જ ભણાવી શકશે.

રાજ્યમાં સરકાર બની ત્યારથી દુનિયાના ઘણા દેશો તાલિબાનોને સરકારનો દરજ્જો આપતા નથી. તેને આતંકવાદી સંગઠન ગણવામાં આવે છે. જેના કારણે ઘણા દેશોએ અફઘાન પર વિવિધ પ્રતિબંધો લગાવ્યા છે. તાલિબાનોએ દેશમાં ઇસ્લામિક કાયદો લાગુ કર્યો છે અને મહિલાઓ પર ઘણા નિયંત્રણો લાદ્યા છે.