ખાનગી શાળાઓમાં ફી નિયમન મુદ્દે સુપ્રીમ કોર્ટ આજે આપી શકે છે ચુકાદો

ખાનગી શાળાઓમાં ફી નિયમન મુદ્દે સુપ્રીમ કોર્ટ આજે ચૂકાદો આપી શકે છે. રાજ્ય સરકાર અને શાળા સંચાલકોની અરજી પર સુપ્રીમ કોર્ટ આજે પોતનો ચૂકાદો આપે તેવી શક્યતા છે. રાજ્ય સરકાર દ્વારા ફી નિયમન મુદ્દે કાયદો લાવતા શાળા સંચાલકોએ સુપ્રીમ કોર્ટમાં અરજી કરી હતી. આ બાબતે સરકાર તરફથી પોતાનો પક્ષ મજબૂતીથી રાખવા માટે શિક્ષણમંત્રી ભુપેન્દ્રસિહ ચુડાસમાએ અધિકારીઓ સાથે ચર્ચા કરી હતી. 

મહત્વનું છે કે રાજ્યમાં ફી નિયમન મુદ્દે અસરકારક કાયદો લાવવા વાલીઓ માંગ કરી રહ્યાં છે પણ સરકાર અને સંચાલકો તરફી મોટા ગજાના જાણીતા વકીલો રોકી દેવાયા છે. જેથી કાયદાકીય લડતમાં વાલીઓ મૂંઝાયા છે. 

ગુજરાત સરકારે 2017માં લાગુ કરેલ ખાનગી સ્કૂલ ફી નિર્ધારણ કાયદા અંતર્ગત અમદાવાદ સહિત વિવિધ મોટા શહેરોની બે હજારથી પણ વધારે મોટી ખાનગી સ્કૂલોએ સરકાર સામે હાઈકોર્ટમાં પીટિશન કર્યા બાદ સુપ્રીમમાં પીટિશન કરી છે. જેમાં નવી ફી કમીટીઓ રચવા અને ફી મર્યાદા નક્કી કરવા સહિતના ઓર્ડર કરાયા છે. તો સુપ્રીમ કોર્ટ પણ સરકાર અને સંચાલકો સામે નારાજ થઈ છે.

અગાઉ આ કેસમાં ચોથી એપ્રિલે ફાઈનલ ચુકાદો આપી દેવાનો નિર્ણય કર્યો હતો પણ સરકાર તરફથી સમય માગતા 18મી એપ્રિલ રખાઈ હતી પરંતુ ત્યારે પણ સુનવણી ન થતાં આજે ફાઈનલ સુનવણી હાથ ધરાશે. 

આ સુનવણીમાં સરકાર તરફથી પ્રોવિઝનલ ફીની વિગતો સાથે જે સ્કૂલોએ હજુ સુધી દરખાસ્ત જ નથી કરી તેવી રાજ્યાની તમામ સ્કૂલોની યાદી કોર્ટ સમક્ષ  મુકવામાં આવશે.

તો સંચાલકો એવી દલીલ કરશે કે સુપ્રીમના આદેશનું પાલન કરાયુ નથી. આમ બંને પક્ષ તરફથી મહત્વની દલીલો થવાની હોઈ આજે સુનાવણી તેમજ સુપ્રીમ તરફથી થનારા ઓર્ડર પર લાખો વાલીઓની નજર રહેલી છે.