વિદ્યાર્થીઓ તો ઠીક કોલેજને પણ લાગ્યું PUBGનું ઘેલું, કોલેજમાં ગેમનું આયોજન

બાળકો અને વિધ્યાર્થીઓ માટે પબજી અને બ્લૂ વ્હેલ ગેમ ખતરારૂપ બની હોવાના અનેક કિસ્સા સામે આવ્યા હતા. વિદ્યાર્થીઓ આ ગેમના એડિક્ટ બની જવાના કારણે તેમનું શિક્ષણ, આરોગ્ય અને સામાજિક સંબંધો પર ખરાબ અસર થઈ હોવાના પણ તારણો સામે આવ્યા હતા. જેને લઈને સરકારના ખુદ શિક્ષણ વિભાગને પબજી ગેમ પર એક પરિપત્ર દ્વારા પ્રતિબંધ મૂકી દેવાની ફરજ પડી હતી. સરકારે લગાવેલા આ પ્રતિબંધને હજુ મહિનો જ વીત્યો છે, ત્યાં ગાંધીનગરની એક એન્જિનિયરિંગ કોલેજે પરિપત્રની ઐસીતૈસી કરીને વિદ્યાર્થીઓને પબજી ગેમ રમાડીને પરિપત્રના ધજિયા ઉડાવ્યા છે. જોઈએ આ અહેવાલ. 

મોબાઈલથી વિદ્યાર્થીઓને જોઈતી માહિતી સેકન્ડોમાં મળી જાય છે. જો કે મોબાઈલ વિદ્યાર્થીઓ માટે આશીર્વાદ રૂપ બનવા કરતા અભિશાપ બની રહ્યો હોય તેવું ચિત્ર ઊભું થયું છે. કેમ કે, જ્ઞાન માટે સર્ચ કરતા કરતાં વિદ્યાર્થીઓ ક્યારે ગેમ રમવા લાગી જાય છે તે ખુદ તેમને પણ ખબર રહેતી નથી. આજે એ દ્રશ્યો સામાન્ય થઈ ગયા છે કે, વિદ્યાર્થીઓના હાથમાં ટેક્સબુક કરતાં વધારે સમય મોબાઈલ હોય છે. વિદ્યાર્થીઓ વિવિધ વીડિયો ગેમના એવા બંધાણી એટલે કે એડિક્ટ બની જાય છે કે તેમને પછી ગેમની દુનિયા જ વાસ્તવિક દુનિયા લાગવા લાગે છે અને વાસ્તવિક દુનિયા તેમને આભાસી લાગવા લાગે છે.

ખતરનાક PUBG ગેમ

થોડા સમય પહેલા પબજી ગેમે ખૂબ ચકચાર જગાવી હતી. પબજી ગેમે અનેક કિશોરો અને યુવાઓને આપઘાત કરવા માટે પ્રેર્યા હતા. આ ગેમના એડિક્શને અનેક કિશોરોને પોતાની જાતને જ ગંભીર નુકસાન કરવા પ્રેર્યા હતા. જેના કારણે આજથી એક મહિના પહેલા રાજ્યના શિક્ષણ વિભાગને પબજી ગેમ પર પ્રતિબંધ લગાવવાની ફરજ પડી હતી. 

સરકારના પરિપત્રના ધજિયા ઉડ્યા

સરકારે પબજી ગેમ પર મૂકેલા આ પ્રતિબંધને હજુ એક મહિનો માંડ વિત્યો છે ત્યાં તેના ધજિયા ઉડવાના શરૂ થઈ ગયા છે. ખુદ રાજ્યસરકારના શિક્ષણ વિભાગ દ્વારા જ ગત 23 જાન્યુઆરીએ પબજી ગેમ પર પ્રતિબંધ લગાવમાં આવ્યો હતો. એક પરિપત્ર દ્વારા શિક્ષણવિભાગે પબજી ગેમ પર લગાવેલા પ્રતિબંધને હજુ તો મહિનો માંડ વિત્યો છે ત્યાં તો ખુદ એક શિક્ષણધામ દ્વારા જ આ પરિપત્રના ધજિયા ઉડાવાયા છે.

મેયરે જ કર્યુ ઉદ્ઘાટન

ગાંધીનગરની આલ્ફા એન્જીનિયરિંગ કોલેજમાં જ્ઞાનવર્ધક ઈવેન્ટની આડમાં વિદ્યાર્થીઓને ખુદ કોલેજના વહીવટી તંત્ર દ્વારા જ પબજી ગેમ રમાડવામાં આવી હતી. કોલેજ દ્વારા 150 વિદ્યાર્થીઓને પબજી ગેમ રમાડવામાં આવી હતી. નવાઈની વાત એ છે કે આ ઈવેન્ટનું ઉદ્ઘાટન શહેરના મેયર બિજલ પટેલના હસ્તે કરવામાં આવ્યું હતું.

પબજી ગેમ વિશે સરકારના પરિપત્રનો આલ્ફા કોલેજના વહીવટીતંત્ર દ્વારા સરકારના જ કોઈ પદાધિકારની ના હસ્તે ભંગ કરાવવાનો આ નવતર કીમીયો હતો અને સરકાના એક પદાધિકારીએ હોશે હોશે તેમાં ભાગ પણ લીધો. પરિપત્રના પ્રભાવથી વિદ્યાર્થીઓમાં માંડ ભૂલાયેલી એક પબજી ગેમ એક જબાબદાર કોલેજ દ્વારા ફરી પાછી યાદ દેવરાવાઈ છે. આને કેળવણી કહેશું કે મનમાની તે તો સરકારે નક્કી કરવાનું છે.

સામાજીક કાર્યકરે કરી અરજી

સરકાર દ્વારા પ્રતિબંધ લગાવ્યા બાદ કોલેજ દ્વારા ગેમ રમાડવામાં આવતા સામાજીક કાર્યકરે સરકારને અરજી કરી છે. સામાજીક કાર્યકર ચંદ્રવદન ધ્રુવે ગૃહમંત્રી, શિક્ષણ વિભાગ અને SPને અરજી કરીને કોલેજ સામે કાર્યવાહી કરવાની માગ કરી છે. સામાજીક કાર્યકરે કોલેજ સંચાલક-પ્રોફેસર વિરૂદ્ધ કાર્યવાહી કરવાની માગ કરી છે. આ અરજીમાં સમાજીક કાર્યકરે લખ્યું છે કે, વિદ્યાર્થીમાં પબજી ગેમની આડ અસર વિશે જાગૃત ફેલાવવાના બદલે કોલેજ દ્વારા ગેમને પ્રોત્સાહન આપવામાં આવ્યુ છે. કોલેજે ગેમને પ્રોત્સાહન આપતા વિદ્યાર્થીઓ ગેરમાર્ગે દોર્યા છે. સરકારના પરિપત્ર છતાં કોઈ જવાબદાર કોલેજ દ્વારા નોલેજ ઈવેન્ટની આડમાં આવી હાનિકારક પબજી ગેમ રમાડવામા આવે.

સળગતા સવાલ

ત્યારે સવાલ એ ઉભા થાય છે કે, સરકારના પરિપત્ર બાદ કોલેજે કેમ રમાડી પબજી ગેમ? મેયર બિજલ પટેલને સરકારના આદેશની જાણ ન હતી? કાર્યક્રમમાં ક્યાં પ્રોગ્રામ થાય તે તેની મેયરને જાણ ન હતી? મેયરની સામે પબજી ગેમ રમાઈ તેમ છતા કાર્યવાહી કેમ નહી? કાર્યક્રમ બાદ મેયરે કોલેજના સત્તાધીશો સામે કાર્યવાહી કેમ ન કરી? કોલેજ દ્વારા કેમ સરકારના પરિપત્રનુ પાલન ન કરાયું? શું શિક્ષણ વિભાગ દ્વારા કોલેજ સામે કાર્યવાહી કરાશે? શિક્ષણ વિભાગ દ્વારા અત્યાર સુધી કાર્યવાહી કેમ ન કરી?  

કાયદેર પ્રતિબંધ ક્યારે?

કુમળા માનસ પર અસર કરતી આવી ગેમ પર  પ્રતિબંધ આવકાર્ય હતો અને છે, પરંતુ જ્યાં સુધી આવી રમતો વિરુદ્ધ કાયદેર પ્રતિબંધ નથી મૂકાતો ત્યાં સુધી આલ્ફા એન્જિનિયશરગ કોલેજો જેવી શૈક્ષણિક સંસ્થાઓ ઈવેન્ટની આડમાં ગેમ રમાડતી રહેશે અને વિદ્યાર્થીઓ ગેરમાર્ગે દોરવાતા રહેશે. જો કે  તેમ છતાં પરિપત્ર કરતાં સ્વયં શિસ્ત જ વિદ્યાર્થીઓ અને કિશોરોને મોટા નુકસાનમાંથી ઉગારી શકે છે.