ભારતીય શેરબજાર છેલ્લા 6 દિવસથી કડડભૂસ થઈને તૂટી રહ્યું છે, રોકાણકારોના સતત શેરના થઈ રહ્યા વેચાણને લીધે શેરબજાર વેચવાલીનું ભયાનક દબાણ અનુભવી રહ્યું છે. ખાસ કરીને બેન્કિંગ અને IT સેક્ટરના શેર્સમાં ભારે ઘટાડો નોંધાયો છે.
છેલ્લા 6 દિવસોમાં લગભગ 3000 જેટલા પોઈન્ટ ઘટ્યું છે સ્ટોક માર્કેટ
ગુરુવારે પણ ભારતીય સ્ટોક માર્કેટ માં ભારે વેચવાલીનું દબાણ જોવા મળ્યું હતું. BSE સેન્સેક્સ ના શેરમાં લગભગ 1,100 પોઇન્ટનો ઘટાડો થયો છે. સેન્સેક્સ 1,114.82 પોઇન્ટ અથવા 2.96% ઘટીને 36,547.22 પર અને નિફ્ટી 50 ઈન્ડેક્સ 326 પોઇન્ટ ઘટીને 10,805.55 પોઇન્ટ પર આવ્યું છે.
બેન્કિંગ અને IT માં થયું ધોવાણ
બેન્કિંગ અને IT શેરોમાં સૌથી વધુ ફટકો પડ્યો હતો. નિફ્ટી બેંક અને નિફ્ટી IT માં લગભગ 4% નો ઘટાડો નોંધાયો છે. સેન્સેક્સ છેલ્લા 6 ટ્રેડિંગ દિવસોમાં લગભગ 3000 પોઇન્ટ ઓછો થયો છે. આ 6 દિવસમાં રોકાણકારો ની અધધ 10 લાખ કરોડ મૂલ્યની સંપત્તિ નું ધોવાણ થયું છે.
સતત છઠ્ઠા ટ્રેડીંગ સેશનમાં ઘટયું બજાર
શેરબજારોમાં સતત છઠ્ઠા ટ્રેડિંગ સેશનમાં પણ ઘટાડો જોવા મળ્યો હતો. વૈશ્વિક બજારોમાં વેચવાલી વચ્ચે સેન્સેક્સમાં પણ 1111 પોઇન્ટનો તીવ્ર ઘટાડો નોંધાયો હતો. BSE ના 30 શેર્સ વાળું સેન્સેક્સ નબળા વલણ સાથે ખુલ્યા પછી વધુ નીચે ગયું હતું. તે અંતે 1,114.82 પોઇન્ટ અથવા 2.96 ટકાના ઘટાડા સાથે 36,553.60 પોઇન્ટ પર સમાપ્ત થયું હતું. એ જ રીતે નેશનલ સ્ટોક એક્સચેંજ NSE નો નિફ્ટી પણ 326.30 પોઇન્ટ અથવા 2.93 ટકા તૂટીને 10,805.55 પોઇન્ટ પર રહ્યો.
ઘણી મોટી કંપનીઓમાં થયું નુકસાન
સેન્સેક્સ ના 30 શેરોમાં હિન્દુસ્તાન યુનિલિવર સિવાયના ઘણા શેર્સ તૂટ્યા. ઇન્ડસઇન્ડ બેન્કના શેરમાં સૌથી વધુ સાત ટકાનો ઘટાડો થયો છે. બજાજ ફાઇનાન્સ, મહિન્દ્રા એન્ડ મહિન્દ્રા, ટેક મહિન્દ્રા, ટીસીએસ અને ટાટા સ્ટીલ પણ ઘટ્યા છે.
ટ્રેડર્સે જણાવ્યું હતું કે અર્થવ્યવસ્થાને પુનર્જીવિત કરવાની ચિંતા અને કેન્દ્રીય બેન્કો તરફથી નવી પ્રોત્સાહનોના અભાવને લીધે વૈશ્વિક બજારોમાં વેચવાલી ઊભી થઈ છે. આ સિવાય અનેક અર્થવ્યવસ્થાઓમાં કોવિડ -19 ના બીજા રાઉન્ડની સંભાવનાની ધારણાને લીધે પણ માર્કેટનું ગણિત ગડબડ થઈ ગયું છે. તેનાથી પણ સેન્સેક્સ પર અસર પડે છે.
ઇન્ટ્રા બેંક વિદેશી વિનિમય બજારમાં રૂપિયો 32 પૈસા તૂટીને 73.89 રૂપિયા પર બંધ રહ્યો છે. દરમિયાન, વૈશ્વિક બેંચમાર્ક બ્રેન્ટ ક્રૂડ તેલ 0.22 ટકા તૂટીને 41.૬૮ ડોલર પ્રતિ બેરલના સ્તરે સ્થિર થયું છે. આજે સેન્સેક્સ અને નિફ્ટી માં ભારે કડાકા બાદ શેર બજાર માં રોકાણકારો ના લાખો કરોડ ડૂબી ગયા હતા.