ગુજરાતી ફિલ્મોને પ્રોત્સાહન આપવા માટે રાજ્ય સરકાર દ્વારા નવી પોલીસી જાહેર કરવામાં આવી છે. ફિલ્મ મેકીંગ માટે મળતી સબસીડીમાં વધારો કરવાનો નિર્ણય સરકાર દ્વારા લેવામાં આવ્યો છે. જેમાં સબસીડીની રકમ રૂપિયા 25 લાખથી વધારીને રૂપિયા 75 લાખ કરવામાં આવી છે. આમ, સરકાર દ્વારા ગુજરાતી ફિલ્મ બનાવવા માટે સબસીડીની રકમમાં ત્રણ ગણો વધારો કરાયો છે, જેનો અમલ 9મી માર્ચ 2019થી જ એટલે કે આજથી જ કરી દેવામાં આવ્યો છે.
મહત્વનું છે કે, ગુજરાતી ફિલ્મ મેકીંગ માટે અત્યાર સુધી A ગ્રેડમાં રૂપિયા 50 લાખ, B ગ્રેડમાં રૂપિયા 25 લાખ, C ગ્રેડમાં રૂપિયા 10 લાખ અને D ગ્રેડ માટે રૂપિયા 5 લાખની સબસીડી આપવામાં આવતી હતી, પરંતુ સરકાર દ્વારા B ગ્રેડની સબસીડીની રકમમાં ત્રણ ગણો વધારો કરાતા હવે ગુજરાતી ફિલ્મ બનાવતા પ્રોડ્યુસરોને મહદઅંશે લાભ થશે.
જો કે ગ્રેડીંગ માટે લઘુતમ ગુણના ધોરણો 41થી ઘટાડીને 21 કરવામાં આવ્યા છે. તેમજ અરજી કરવા માટે સેન્સર સર્ટીફિકેટની તારીખના બદલે ફિલ્મ રીલીઝ થયાની તારીખ ધ્યાને લેવામાં આવશે. મળતી માહિતી મુજબ ગ્રેડીંગ માટે નવી ત્રણ કેટેગરી A+, E અને F ઉમેરવામાં આવી છે.
ઉમેરવામાં આવેલ કેટેગરી A+, E અને Fમાં Sound, VFX, Choreography, Action વગેરેનો સમાવેશ થાય છે. તથા ભારત સરકાર દ્વારા ‘‘સ્વર્ણ કમલ’’નો પુરસ્કાર એનાયત કરવામાં આવે તેવા ગુજરાતી ચલચિત્રને રૂપિયા 2 કરોડની સહાય મળવાપાત્ર થશે. આ ઉપરાંત સરકાર દ્વારા જૂની નીતિ મુજબ આર્થિક સહાય મળેલ નથી તેવા 21 જેટલા ગુજરાતી ચલચિત્રોને રૂપિયા 5 લાખની ઉચ્ચક રકમ ચૂકવામાં આવશે.