આનંદો / રાજ્ય સરકાર રવી પાકની ટેકાના ભાવે ખરીદીની તારીખ કરી જાહેર, જાણો ક્યારે શરૂ થશે રજિસ્ટ્રેશન

• રવી પાકની ટેકાના ભાવે કરશે ખરીદી
• તુવેર,ચણા અને રાયડાનું મબલક ઉત્પાદન 
• 15 ફેબ્રુઆરી તુવેર,1 માર્ચથી ચણા-રાયડા 

રાજ્ય સરકાર રવી પાકની ટેકાના ભાવે  ખરીદી કરશે. આ પાકમાં તુવેર,ચણા અને રાયડાનું મબખલ ઉત્પાદન થયું છે. રાજ્ય સરકાર લઘુત્તમ ટેકાના ભાવથી ખરીદી કરશે.જેમાં 15 ફેબ્રુઆરીથી તુવેરની ખરીદી શરૂ થશે તો 1 માર્ચથી ચણા અને રાયડાની ખરીદી શરૂ કરવામાં આવશે.આ ખરીદ પ્રક્રિયા ગુજરાત સ્ટેટ કોપરેટિવ માર્કેટિંગ ફેડરેશન દ્વારા થશે. ટેકાના ભાવે વેંચવા  માટે 1 ફેબ્રુઆરીથી  રજિસ્ટ્રેશન શરૂ થશે. રજિસ્ટ્રેશનની સમયાવધિ 28 ફેબ્રુઆરી સુધી રહેશે.

કૃષિ મંત્રીએ કરી જાહેરાત...

કૃષિ મંત્રી રાઘવજી પટેલે જણાવ્યું હતું કે, ચાલુ વર્ષે ચણા સહિતના રવિ સિઝનના પાકોનું વધુ વાવેતર થવાથી ઉત્પાદન વધવાની સંભાવનાને પગલે કેન્દ્રિય કૃષિમંત્રીને ચણાનો વધુ જથ્થો ખરીદવા વિનંતી કરવામાં આવી હતી.

વધુમાં જણાવ્યું હતું કે, ખેડૂતોને તેઓના પાકના પોષણક્ષમ ભાવ મળી રહે તે માટે ભારત સરકારે વર્ષ ૨૦૨૧-૨૨ માં તુવેર માટે રૂ.૧૨૬૦ પ્રતિ ૨૦ કી.ગ્રા(મણ), ચણા માટે રૂ. ૧૦૫૦ પ્રતિ ૨૦ કી.ગ્રા (મણ), અને રાયડા માટે રૂપિયા ૧૦૧૦ પ્રતિ ૨૦ કી.ગ્રા(મણ) લઘુત્તમ ટેકાના ભાવ જાહેર કરેલા છે. રાજયમાં ખરીફ/રવિ સીઝન ૨૦૨૧-૨૨માં લઘુતમ ટેકાના ભાવે તુવેરની ખરીદી તા.૧૫/૦૨/૨૦૨૨ અને ચણા તથા રાયડાની ખરીદી તા.૦૧/૦૩/૨૦૨૨ થી રાજ્ય સરકાર દ્વારા નિયુક્ત ગુજરાત સ્ટેટ કોઓપરેટીવ માર્કેટીંગ ફેડરેશન લી.,અમદાવાદ મારફતે કરવામાં આવનાર છે.

તેમણે જણાવ્યું કે, લઘુતમ ટેકાના ભાવે તુવેર, ચણા અને રાયડોનું વેચાણ કરવા ઇચ્છા ધરાવતા ખેડૂતોની ઓનલાઇન વિના મુલ્યે નોંધણી સમગ્ર રાજ્યમાં સ્થાનિક/ ગ્રામ્ય કક્ષાએ VCE દ્વારા તા.૦૧/૦૨/૨૦૨૨ થી તા.૨૮/૦૨/૨૦૨૨ સુધી કરવામાં આવશે. તે મુજબ તમામ ખેડૂતોએ નોંધણી કરાવવી જરૂરી છે. નોંધણીનો તમામ ખર્ચ રાજ્ય સરકાર દ્વારા કરવામાં આવતો હોઈ ખેડૂતોએ નોંધણી માટે VCE ને કોઈપણ પ્રકારની રકમ ચૂકવવાની રહેતી નથી.

નોંધણી માટે જરૂરી પુરાવા જેવા કે આધાર કાર્ડની નકલ, અદ્યતન મહેસૂલી રેકર્ડ ગામ નમુનો ૭, ૧૨, ૮-અની નકલ, ગામ નમુના ૧૨માં પાક વાવણી અંગે એન્ટ્રી ન થઇ હોય તો પાકની વાવણી અંગેનો તલાટીના સહી સિક્કા સાથેનો દાખલો, ખેડુતના નામના બેન્ક ખાતાની વિગત જેમ કે બેન્ક પાસબુકની નકલ અથવા કેન્સલ ચેકની નકલ સાથે લાવવાની રહેશે.

રાજ્યમાં તુવેર, ચણા અને રાયડા પકવતા ખેડૂતો તેઓનો પાક લઘુતમ ટેકાના ભાવે વેચાણ કરવા ઇચ્છુક હોય તેઓની ઓનલાઇન નોંધણી ફરજીયાત હોઇ આ માટે સંબંધિત ગ્રામ પંચાયતનો સંપર્ક કરી નોંધણી કરાવવા મંત્રીશ્રીએ ખાસ અનુરોધ કર્યો છે. નોંધણી બાબતે કોઇ મુશ્કેલી જણાય તો સવાર ૯-૦૦ થી સાંજના ૬-૦૦ સુધી હેલ્પલાઇન નંબર ૦૭૯-૨૬૪૦૭૬૦૯, ૨૬૪૦૭૬૦૧૦, ૨૬૪૦૭૬૦૧૧, અને ૨૬૪૦૭૬૦૧૨ ઉપર સંપર્ક કરવાનો રહેશે.

ખાતરની અછત નથી: રાઘવજી પટેલ   

ગુજરાતમાં ખાતરની તંગી હોવાની બૂમરાણ વચ્ચે કૃષિમંત્રી રાઘવજી પટેલે સ્પષ્ટતા કરતા કહ્યું છે કે, હાલ રાજ્યમાં ખાતરની કોઈ તંગી નથી અને પૂરતા પ્રમાણમાં ખાતરનો જથ્થો ઉપલબ્ધ છે. આ મુદ્દે સ્થાનિક કક્ષાએ ખરીદનાર-વેચનાર વચ્ચે અસમંજસ હોઇ શકે છે. ખાતરની સાથે અન્ય કોઇપણ વસ્તુઓનું વેચાણ ન કરી શકાય અને આ ઉપરાંત  ખાતર ન મળે તો મને ફરિયાદ કરજો, હું તાત્કાલિક પગલા લેવડાવીશ.

સંઘાણીની પણ સ્પસ્ટતા 

આ તરફ, ઇફ્કોના ચેરમેન તરીકે વરાયેલા દિલીપ સંઘાણીએ VTV સાથે ખાસ વાતચીત કરતા યુરિયા ખાતર પર પ્રકાશ પાડ્યો હતો. તેમણે કહ્યું કે, યુરિયા ખાતરથી જમીનને નુકસાન થાય છે
અને આ નુકસાન નાં થાય તે માટે  નેનો ખાતરની શોધ કરવામાં આવી છે. સસ્તુ ખાતર મળે તે માટે સરકારે સબસિડી વધારી છે તો રો-મટિરીયલનો ભાવ 300 ડોલરથી વધીને 900 ડોલર જેટલા થયા છે. સરકાર ખોટ ખાઇને ખેડૂતોને સસ્તુ ખાતર પુરૂ પાડે છે. રાજ્ય,  ખાતરની માંગ કરે તે આધારે કેન્દ્ર સરકાર ફાળવણી કરે છે. પાટણમાં ખાતરની માંગ વધારે હોવાથી ખાતરની અછત વર્તાઈ રહી હોવાનો મત વ્યક્ત કર્યો હતો.