નિર્ણય / અમદાવાદમાં તંત્રને હવે રસ્તા યાદ આવ્યા: પેચવર્ક અને રિસરફેસિંગ માટે અપાયો આદેશ, સફાઇ કામમાં પણ તેજી

• AMCની સ્ટેન્ડિંગ કમિટીએ મહત્વનો નિર્ણય લીધો
• અમદાવાદમાં ચૂંટણી સુધી તમામ રોડ રસ્તા સરખા કરવા આદેશ
• મતદાન મથક સુધીના રોડ પર કામગીરી કરવા સૂચના

ગતરોજ મળેલી કોર્પોરેશનની સ્ટેન્ડિંગ કમિટીમાં શહેરના રોડ રસ્તા મુદ્દે ચર્ચા કરવામાં આવી હતી. જે બાદ AMCની સ્ટેન્ડિંગ કમિટીએ મહત્વનો નિર્ણય લીધો હતો. જે મુજબ ચૂંટણી સુધીમાં શહેરના તમામ રોડ રસ્તા સરખા કરવાનો આદેશ અપાયો છે. 

તાત્કાલિક ધોરણે રોડ બનાવવાની અપાઈ સૂચના
ગુજરાતમાં વિધાનસભાની ચૂંટણી જાહેર થઈ ચૂકી છે. રાજ્યમાં બે તબક્કામાં ચૂંટણી યોજાવાની છે. આગામી વિધાનસભાની ચૂંટણીને ધ્યાને રાખીને અમદાવાદ શહેરમાં આવેલા તમામ મતદાન મથક સુધી જતા રસ્તાઓના પેચવર્ક અથવા રિસરફેસિંગ કરવાની જરૂર હોય ત્યાં નવા રોડ બનાવવાનો આદેશ સંબંધિત અધિકારીઓને આપી દેવામાં આવ્યો છે. 

સફાઈ મામલે પણ અધિકારીઓને અપાઈ સૂચના
ઉપરાંત શહેરમાં જે રસ્તાઓ પર હજુ સુધી પેચ વર્ક અથવા રિસરફેસ કરાયું નથી ત્યાં તાત્કાલિક ધોરણે કામગીર કરવાની પણ સૂચના આપી દેવામાં આવી છે. અમદાવાદ મ્યુનિસિપલ કોર્પોરેશનની સ્ટેન્ડિંગ કમિટીમાં શહેરમાં સફાઈ મામલે પણ અધિકારીઓને સૂચના આપી દેવાઈ છે. 

હાલમાં શહેરમાં રોજના 3,000 મેટ્રિક ટન જેટલો વપરાય છે ડામરઃ હિતેશ બારોટ 
આ અંગે માહિતી આપતા સ્ટેન્ડિંગ કમિટીના ચેરમેન હિતેશ બારોટે જણાવ્યું કે, રોડ-રસ્તા મામલે અધિકારીઓને સૂચના અપાઈ છે. શહેરમાં દરરોજ 12 જેટલા પેવર મશીન દ્વારા રોડની કામગીરી કરવામાં આવી રહી છે. જેમાં દરરોજ 3 હજાર મેટ્રિક ટન જેટલો ડામરનો વપરાશ થાય છે. જોકે, હજુ પણ કેટલાક રસ્તા ઉપર કામગીરી યોગ્ય રીતે થઈ નથી જેના પગલે ઝડપથી કામગીરી કરવા માટે જણાવવામાં આવ્યું છે.