જવાબદાર કોણ? / 25 કરોડ પાણીમાં? તંત્રની ગૂંચના કારણે રિવરફ્રન્ટનાં સ્પોર્ટ્સ કોમ્પ્લેક્સ ખાઈ રહ્યા છે ધૂળ

• રિવરફ્રન્ટનાં સ્પોર્ટ્સ કોમ્પ્લેક્સ હજુ પણ ધૂળ ખાતાં પડ્યાં રહેશે
• તંત્રની ગૂંચના કારણે લોકોપયોગી બની શક્યાં નથી
• ઓપરેશન-મેન્ટેનન્સનું કામ રિટેન્ડર કરાયું

મ્યુનિ. તિજોરીમાંથી રૂ. રપ.૬૬ કરોડ ખર્ચાયા
અમદાવાદમાં તંત્ર દ્વારા સાબરમતી નદીના બંને કાંઠે ભવ્ય સ્પોર્ટ્સ કોમ્પ્લેક્સ તૈયાર કરાયા છે. જેની પાછળ મ્યુનિ. તિજોરીને ખુલ્લી મૂકી દીધી હતી. બંને કોમ્પ્લેક્સના નિર્માણ પાછળ કુલ રૂ. રપ.૬૬ કરોડનો ખર્ચ કરાયો હોવા છતાં ફક્ત મ્યુનિ. સત્તાવાળાઓની બલિહારીથી યુવાઓ તેના લાભથી વંચિત છે.

આઠ મહિના પહેલાં બનાવાયેલાં સ્પોર્ટ્સ કોમ્પ્લેકસ હજુ પણ ધૂળ ખાતાં
અમદાવાદ મ્યુનિસિપલ કોર્પોરેશનના સત્તાવાળાઓ દ્વારા સાબરમતી નદીના બે કાંઠાને જોડતા આકર્ષક ફૂટ ઓવરબ્રિજનું નિર્માણ કરાશે. જેનું આવતા મહિને વડા પ્રધાન નરેન્દ્ર મોદીના હસ્તે લોકાર્પણ થાય તેવી શક્યતા વચ્ચે રિવરફ્રન્ટના પશ્ચિમ અને પૂર્વે કાંઠે આઠ મહિના પહેલાં બનાવાયેલાં સ્પોર્ટ્સ કોમ્પ્લેકસ હજુ પણ ધૂળ ખાતાં પડ્યાં રહેશે. જેની પછાળ મ્યુનિ. તંત્ર જવાબદાર હોવાનું ચર્ચાઈ રહ્યું છે.

ક્રિકેટ પીચ, ટેનિસ કોર્ટ,જોગિંગ ટ્રેકની સુવિધા સાથે સ્પોર્ટ્સ કોમ્પ્લેક્સ બનાવાયાં
તંત્ર દ્વારા પશ્ચિમ કાંઠે સરદારબ્રિજ અને આંબેડકરબ્રિજ વચ્ચે એનઆઈડી પાછળના ભાગે અને પૂર્વ કાંઠે દધીચિબ્રિજથી ગાંધીબ્રિજ વચ્ચે શાહપુરના પાછળના ભાગે અપર પ્રોમીનોડ પર સ્પોર્ટ્સ કોમ્પ્લેક્સ બનાવાયાં છે. પશ્ચિમ કાંઠાના સ્પોર્ટ્સ કોમ્પ્લેકસની વાત કરીએ તો ૪પ હજાર ચોરસમીટર ક્ષેત્રફળ ધરાવતી ખુલ્લી જગ્યામાં મલ્ટિપલ સ્પોર્ટ્સની જોગવાઈ કરાઈ છે, જેમાં ચાર ક્રિકેટ પીચ, પાંચ ટેનિસ કોર્ટ, ચાર મલ્ટિપલ સ્પોર્ટ્સ કોર્ટ, સ્કેટિંગ રિંગ, સ્કેટ બોર્ડ, ૮૦૦ મીટર જોગિંગ ટ્રેક, ઈન્ટર્નલ રોડ તથા પાર્કિંગ, એડમિનિસ્ટ્રેશન બિલ્ડિંગ, યુટિલિટી બિલ્ડિંગનો સમાવેશ થાય છે. જ્યારે પૂર્વ કાંઠે ૮ હજાર ચોરસમીટર જમીનમાં મલ્ટિપલ સ્પોર્ટ્સની સુવિધા ઊભી કરાઈ છે, જેમાં ચાર ક્રિકેટ પીચ, બે ટેનિસ કોર્ટ, ૩ર૦ મીટર જોગિંગ ટ્રેક, ઈન્ટર્નલ રોડ, પાર્કિંગ, એડમિનિસ્ટ્રેશન બિલ્ડિંગ અને યુટિલિટી બિલ્ડિંગમાં ટોઈલેટ બ્લોકનો સમાવેશ થાય છે.

લોક નજરે તંત્ર હાસ્યાસ્પદ બન્યું
આમ તો આ બંને સ્પોર્ટ્સ કોમ્પ્લેક્સ ઓક્ટોબર-ર૦ર૧થી તૈયાર થયાં હોઈ શહેરના યુવા ક્રીડાપ્રેમીઓ આતુરતાથી તેના ઉદ્ઘાટન માટે રાહ જોઈ રહ્યા છે, જોકે મ્યુનિ. તંત્રના ઉચ્ચ અધિકારીઓ વચ્ચેની આપસી ગૂંચના કારણે શહેરના યુવાઓને નિરાશ થવું પડે છે, જેના કારણે વેકેશન દરમિયાન પણ તેનો લાભ યુવાઓ લઈ શકશે નહીં.સ્પોર્ટ્સ કોમ્પ્લેક્સમાં ઓપરેશન અને મેન્ટેનન્સનો કોન્ટ્રાક્ટ કોને સોંપવો તેને લઈ ઉચ્ચ અધિકારીઓમાં અનેક મતમતાંતર થયાં છે એટલે મેન્ટેનન્સના કામમાં રિટેન્ડર કરવાની તંત્રને ફરજ પડી છે, જોકે આના કારણે લોક નજરે તંત્ર હાસ્યાસ્પદ બન્યું છે.

આવી રીતે ફિટ અમદાવાદનો સંકલ્પ સાકાર થસે? 
કેટલાંક વર્તુળોમાં એવું આશ્ચર્ય વ્યક્ત થઈ રહ્યું છે કે સામાન્ય મેન્ટેનન્સના કોન્ટ્રાક્ટનું કોકડું તંત્ર ઊકેલી શકતું ન હોય તો ભાજપના સત્તાધીશો આ ગૂંચ ઉકેલવા માટે કેમ સક્રિય થતા નથી? શું તેઓ પણ અધિકારીઓની શેહ-શરમ હેઠળ આવી ગયા છે? શું આનાથી રજાઓનો આવો માહોલ વેડફાયો નથી? શું આવી રીતે સત્તાવાળાઓ ફિટ અમદાવાદનો સંકલ્પ સાકાર કરી શકશે? 
કે પછી ફિટ અમદાવાદનો નારો હજુ પણ કાગળ પર જ રહી જશે?

પૂર્વ કાંઠાનું કોમ્પ્લેક્સ નવેમ્બર-ર૦ર૦માં પૂરું કરવાનું હતું
મ્યુનિ. સત્તાવાળાઓએ કોરોના પહેલાંના આયોજન મુજબ પૂર્વ કાંઠાના સ્પોર્ટ્સ કોમ્પ્લેકસને નવેમ્બર-ર૦ર૦માં પૂરૂ કરવાના હતા, જોકે કોરોનાના આતંકથી સ્વાભાવિકપણે આ પ્રોજેક્ટને ગ્રહણ લાગ્યું હતું. કોરોના ઉપરાંત પોલીસતંત્રની બેદરકારી પણ પ્રોજેક્ટના વિલંબમાં નડતરરૂપ બની હતી. જ્યારે પશ્ચિમ કાંઠાના એનઆઈડી પાછળના ભાગે તૈયાર કરાયેલા સ્પોર્ટ્સ કોમ્પ્લેક્સને અગાઉ જાન્યુઆરી-ર૦ર૧ તૈયાર કરીને તેની ભેટ યુવા રમતગમત પ્રેમીઓને મળવાની હતી, જોકે આ પ્રોજેકટ પણ કોરોના મહામારીના પ્રકોપના કારણે લથડિયાં ખાવા લાગ્યો હતો અને મહિનાઓના વિલંબ બાદ તે તૈયાર થયો હતો.