ચોંકાવનારો બનાવ / ત્રાસની પરાકાષ્ઠાઃ અમદાવાદમાં જુલમી સાસુ ગર્ભવતી પરિણીતાને ચાદર ખેંચી લાતો મારી ઉઠાડતી, દહેજ માટે મારઝૂડ કરતી, ફરિયાદ દાખલ

• અમદાવાદના ચાંદખેડાનો ચોંકાવનારો બનાવ 
• દહેજ મામલે પણ પરિણીતા પર ત્રાસ ગુજાર્યો
• સાસરિયાના ત્રાસથી પોલીસ સ્ટેશનમાં નોંધાવ્યો ગુનો

કેટલાક સાસરિયા તેમની પુત્રવધુ પર અલગ અલગ કારણોસર અમાનુષી ત્રાસ ગુજારતા હોય છે. સાસરિયાના ત્રાસની પરાકાષ્ઠા સમાન એક ચોંકાવનારો કિસ્સો અમદાવાદ શહેરના ચાંદખેડા વિસ્તારમાં સામે આવ્યો છે, જેમાં પરિણીતા સૂતી હોય ત્યારે જુલમી સાસુ તેની ચાદર ખેંચી લાતો મારી ઉઠાડતી હતી. સૌથી આઘાતજનક વાત એ છે કે, આ પરિણીતા ગર્ભવતી હતી ત્યારે સાસુએ વહેલી સવારે પાંચ વાગે ઊઠી જવાની ફરજ પાડી તેના પગ પર લાતો મારી હતી. આટલું જ નહીં, સાસરિયાંએ દહેજ મામલે પણ તેની મારઝૂડ કરી હોવાના ગંભીર આરોપ ઊઠ્યા છે.

વર્ષ 2020માં કર્યા હતા કોર્ટ મેરેજ
ચાંદખેડા વિસ્તારમાં રહેતી રીમા (નામ બદલ્યું છે)એ ચાંદખેડા પોલીસ સ્ટેશનમાં પતિ દીપેશ, સાસુ સુધાબહેન, સસરા જયેશભાઇ અને નણંદ ધરા વિરુદ્ધ ડોમેસ્ટિક વાયોલન્સ તેમજ દહેજ અને મારામારીની ફરિયાદ કરી છે. ફરિયાદમાં કરેલા આક્ષેપ પ્રમાણે રીમા છ વર્ષ પહેલાં ઇન્સ્ટાગ્રામ પર તેના સ્કૂલના મિત્ર દીપેશ સાથે સંપર્કમાં આવી હતી. રીમા અને દીપેશે વાતચીત શરૂ કરી હતી અને બાદમાં તેમની વચ્ચે પ્રેમ થઇ જતાં વર્ષ 2020માં કોર્ટ મેરેજ કરી લીધાં હતાં. કોર્ટ મેરેજ કરી લીધા બાદ રીમા પોતાના ઘરે રહેતી હતી જ્યારે દીપેશ પણ તેના તેના જ ઘરે રહેતો હતો. થોડા સમય બાદ બન્ને જણાએ હિંમત કરીને તેમના માતા પિતાને કહી દીધું હતું. રીમાનાં માતા પિતા માની ગયા હતા, પરંતુ દીપેશનાં માતા પિતા નાખુશ હતાં. રીમાનાં માતા પિતાએ દીપેશના માતા પિતાને સમજાવતાં અંતે તેઓ રાજી થઇ ગયાં હતાં અને લગ્ન કરાવવાનું નક્કી કરી લીધું હતું. 

પતિએ પણ માર્યો હતો માર
સમાજના રીત રિવાજ પ્રમાણે બંનેનાં લગ્ન થઇ ગયાં હતાં અને રીમા સાસરીમાં રહેવા માટે જતી રહી હતી. લગ્નના થોડા દિવસ બાદ રીમા પહેલી વખત પિયરમાં ગઇ હતી. પિયરથી રીમા પરત સાસરીમાં આવી ત્યારે તેનાં માતા પિતાએ સોનાની બુટ્ટી ગિફ્ટમાં આપી હતી. બુટ્ટી લઇને રીમા સાસરીમાં પહોંચી ત્યારે દીપેશે તેની સાથે બબાલ કરી હતી અને પૂછ્યા વગર બુટ્ટી કેમ લીધી તેમ કહીને માર માર્યો હતો. રીમાએ આ વાત તેની સાસુને કહી ત્યારે તેણે તું અમને ગમતી નથી તેમ કહીને હડધૂત કરી હતી. રીમા બધું મૂંગા મોઢે સહન કરતી હતી પરંતુ હદ ત્યારે થઇ કે જ્યારે તે ગર્ભવતી હતી અને તેની સાસુએ લાત મારી હતી. 

એસી તેમજ બીજી વસ્તુઓ લાવવા કરતા દબાણ
રીમા ગર્ભવતી હતી ત્યારે તે રૂમમાં આરામ કરતી હતી ત્યારે સુધાબહેને ચાદર ખેંચીને લાત મારી હતી અને કહ્યું હતું કે વહેલી સવારે પાંચ વાગે ઊઠી જવું પડશે. રીમા ડિલિવરી માટે પિયરમાં ગઇ હતી જ્યાં તેણે પુત્રને જન્મ આપ્યો હતો. પુત્રને લઈ છ મહિના બાદ રીમા પરત સાસરીમાં ગઇ હતી, જ્યાં સાસુ પગમાં ચૂંટલા ખણીને ઉઠાડતાં હતાં. રીમાનાં માતા પિતાએ તેનાં નામે પાંચ લાખ રૂપિયાની એફડી કરી હતી તે તોડાવીને એસી તેમજ બીજી વસ્તુઓ લાવવા માટેનું દબાણ સાસરીવાળા કરતા હતા. સાસરિયાના ત્રાસથી રીમા પિયર આવી ગઇ હતી. જ્યાં તેણે ફરિયાદ કરી છે. પોલીસે આ મામલે ગુનો દાખલ કરીને તપાસ શરૂ કરી છે.