અમદાવાદમાં ડ્રેનેજ લાઈનમાં ફસાયેલા યુવકની શોધખોળ યથાવત્ છે. ફાયર બ્રિગેડની ટીમોએ અત્યાર સુધીમાં 4 કિલોમીટર ડ્રેનેજ લાઈનને ફેંદી વાળી છે. છતાં હજુ સુધી યુવકનો કોઈ અત્તોપત્તો મળ્યો નથી.
21 કલાકથી ફાયર બ્રિગેડની ટીમ કરી રહી છે યુવકની શોધખોળ
આધુનિક સાધનોથી ફાયરની ટીમ દ્વારા શોધખોળ
અમદાવાદમાં સરખેજ-સાણંદ ચોકડી પાસે આવેલી સાવન હોટલની સામે એક યુવક ડ્રેનેજ લાઈનમાં પડી ગયો છે. 21 કલાકથી ફાયર બ્રિગેડની ટીમ દ્વારા આ યુવકની શોધખોળ કરવામાં આવી રહી છે. ફાયરબ્રિગેડની ટીમો દ્વારા સરખેજથી જુહાપુરા સુધી આવેલી ચાર કિલોમીટર લાંબી ડ્રેનેજ લાઈનના તમામ મેઈન હોલના ઢાંકણા ખોલી અને ત્યાં તપાસ કરવામાં આવી છે. જોકે, હજુ સુધી યુવક મળી આવ્યો નથી.
બે શ્રમિકોને સોંપ્યું હતું બોક્સ બનાવવા ચણતરનું કામ
મળતી માહિતી અનુસાર, સરખેજ-સાણંદ ચોકડી પાસે આવેલી સાવન હોટલની સામે બે શ્રમિકોને ડ્રેનેજ લાઈનનું ઢાંકણું નાખવા માટે બોક્સ બનાવવા ચણતરનું કામ સોંપવામાં આવ્યું હતું. જેથી બંને અહીં ચણતર કામ કરી રહ્યા હતા. લગભગ સાંજના 4 વાગ્યાની આસપાસ એક શ્રમિક કંઇક વસ્તુ લેવા માટે બહાર ગયો હતો, જ્યારે તે પાછો આવ્યો ત્યારે ત્યાં સાથી શ્રમિક જોવા મળ્યો નહોતો. તેથી તેણે ઘણી શોધખોળ કરી પરંતુ સાથી યુવક મળ્યો ન હતો. ત્યારે યુવક ડ્રેનેજ લાઈનમાં પડી ગયો હોવાનું અનુમાન લગાવીને ફાયર બ્રિગેડને જાણ કરવામાં આવી હતી.
યુવકનો 21 કલાક બાદ પણ નથી પતો
ઘટનાની જાણ થતા ફાયર બ્રિગેડની ટીમ તરત જ ઘટના સ્થળે આવી પહોચી હતી. યુવક ગટરમાં પડ્યો હોવાની આશંકાને પગલે તપાસ શરૂ કરવામાં આવી હતી. બે ટીમના 14 ફાયર જવાનો દ્વારા આખી રાત મ્યુનિસિપલ કોર્પોરેશનના ડ્રેનેજ વિભાગની ટીમ સાથે રહીને તમામ મેઈન હોલના ઢાંકણા ખોલી અને યુવકની શોધખોળ હાથ ધરવામાં આવી હતી, પરંતુ યુવક મળી આવ્યો નથી.
ફાયર બ્રિગેડની ટીમ દ્વારા શોધખોળ યથાવત
પ્રહલાદનગર ફાયર સ્ટેશનના ફાયર ઓફિસર મેહુલ ગઢવીના જણાવ્યા મુજબ,'યુવકની ગઈકાલે સાંજે 4 વાગ્યાથી શોધખોળ કરવામાં આવી રહી છે. જે ડ્રેનેજ લાઈન છે તે શહેરની સૌથી મોટી ડ્રેનેજ લાઈન હોય તેવું લાગી રહ્યું છે. કોર્પોરેશનના ડ્રેનેજ વિભાગના અધિકારીઓને જાણ કરી તેમના સાધન પણ મંગાવવામાં આવ્યા છે.' જોકે, અત્યારે સવાલ એ છે કે, શું યુવક ખરેખર અંદર પડી ગયો છે? કે પછી ક્યાંય જતો રહ્યો છે. હાલ તો ફાયરબ્રિગેડની ટીમ આધુનિક સાધનો દ્વારા યુવકની શોધખોળ કરી રહી છે.