ગિફ્ટ / હવે રિવરફ્રન્ટ પર જ જિમ અને જોગિંગ ટ્રેક સહિત અનેક સુવિધાઓ, જાણો ક્યારે શહેરીજનોને મળશે ભેટ

• અમદાવાદમાં સ્પોર્ટ્સ પ્રેમીઓ ખુશખબર
• રિવરફ્રન્ટ સ્પોર્ટસ સંકુલ બનીને છે તૈયાર
• જુલાઇ મહિનામાં ખુલ્લુ મુકાશે સ્પોર્ટ્સ સંકુલ 

અમદાવાદ શહેરની ઓળખ સમા સાબરમતી રિવરફ્રન્ટનું ડેવલપમેન્ટ ઉડીને આંખે વળગી રહ્યું છે.  સી-પ્લેન,  હેલિકોપ્ટર જોય રાઇડનો આનંદ માણી રહ્યા છે.  તો બીજી તરફ  વિદેશ જેવી અનુભૂતિ કરાવતો આઇકોનિક ઓવરબ્રિજ તૈયાર થઇ ગયો છે. ત્યારે હવે રમતગમતને રિવરફ્રન્ટ સ્પોર્ટસ સંકુલ પણ બનીને તૈયાર થઇ ગયુ છે. જુલાઇ મહિનામાં સ્પોર્ટ્સ સંકુલ ખુલ્લુ મૂકાઇ શકે છે. 

જુલાઇમાં સ્પોર્ટ્સ સંકુલ મુકાઇ શકે ખુલ્લુ

શહેરીજનોને ટૂંક સમયમાં જ અનમોલ ભેટ મળી શકે છે. એક છે આઇકોનિક ફૂટ ઓવરબ્રિજ તો બીજુ છે સ્પોર્ટ્સ સંકુલ. જી, હા સ્પોર્ટ્સ સંકુલ  બનીને તૈયાર છે.  સાબરમતી રિવરફ્રન્ટ પાલડી ખાતે નિર્માણ પામેલા સ્પોર્ટ્સ સંકુલનું જુલાઇમાં લોકાર્પણ થઇ શકે છે. 25.66 કરોડના ખર્ચે 45 હજાર ચોરસમીટરની જગ્યામાં તેનું નિર્માણ કરવામાં આવ્યુ છે. 

સ્પોર્ટ્સ સંકુલમાં આ છે સુવિધાઓ

સંકુલમાં સુવિધાની વાત કરીએ તો ચાર ક્રિકેટ પીચ બનાવવામાં આવી છે. આ ઉપરાંત ટેનિસ કોર્ટ, જિમ તથા 800મીટરનો જોગિંગ ટ્રેક બનાવવામાં આવ્યો છે. છેલ્લા 4-5 મહિનાથી સ્પોર્ટ્સ સંકુલ બનીને તૈયાર છે પરંતુ તેનું લોકાર્પણ કરવામાં આવતુ ન હતુ. ત્યારે હવે મળતી માહિતી મુજબ જુલાઇ માસમાં ખુલ્લુ મુકાઇ શકે છે. આ સમાચારને લઇને રમતગમત પ્રેમીઓમાં આનંદની લાગણી ફરી વળી છે. મહત્વનું છે કે AMC અને સાબરમતી રિવરફ્રંટ ડેવલપમેન્ટ કોર્પોરેશ દ્વારા સ્પોર્ટ્સ સંકુલ તૈયાર કરવામાં આવ્યું છે.

અમદાવાદમાં આંતરરાષ્ટ્રીય સ્પોર્ટ્સ કોમ્પ્લેક્ષ પામશે નિર્માણ

અમદાવાદના નારણપુરામાં આંતરરાષ્ટ્રીય કક્ષાનું સ્પોર્ટ્સ કોમ્પ્લેક્ષ બનશે.  નારણપુરાના વરદાન ટાવરની બાજુમાં સ્પોર્ટ્સ કોમ્પ્લેક્ષ માટે જમીનની ફાળવણી કરવામાં આવી છે. જેના ભૂમિપૂજન માટે અમિત શાહ 29મેના રોજ અમદાવાદ આવશે. આ સ્પોર્ટસ કોમ્પલેક્ષ વરદાન ટાવર પાસે અંદાજીત 82,507 ચોમી ક્ષેત્રફળવાળા પ્લોટમાં વિકસાવવામાં આવશે. અંદાજિત 284 કરોડના ખર્ચે આ પ્રોજેક્ટ છે તે પાર પાડવાની શક્યતાઓ દર્શાવી છે.  આ માટે એએમસી સૌથી વધુ કિંમતની 600થી 700 કરોડની જમીન આ પ્રોજેક્ટ માટે ફાળવશે. ભૂમિપૂજન બાદ કામગીરી  શરુ કરવામાં આવશે. મહત્વનું છે કે તૈયારીઓને લઇને થોડા દિવસ પહેલા જ ગૃહરાજ્યમંત્રી હર્ષ સંઘવીએ મુલાકાત કરી હતી.