રાજ્યમાં વરસાદી માહોલ શરૂ થતા મહાનગરોમાં જનતાની વધી પરેશાની, ઠેર ઠેર ભૂવા, ખાડા અને રોડ બેસી જતા સ્થાનિકોની વધી મુશ્કેલી
પહેલા વરસાદમાં જ રોડ રસ્તા ધોવાયા
મહાનગરોમાં રોડ રસ્તાની ખખડધજ સ્થિતિ
સ્થાનિકો થયા પરેશાન
ગુજરાતમાં હજી તો વરસાદી માહોલ જામ્યો નથી કે તંત્રની પોલ ખૂલી નથી. રાજ્યમાં વરસાદનું આગમન થતા રોડ રસ્તાના કામોમાં થયેલો ભ્રષ્ટાચાર ખૂલ્લો પડે છે. તો બીજી તરફ તંત્રની પ્રિ મોન્સૂન કામગીરીને લઇને પણ સવાલો ઉભા થાય છે. ત્યારે આજે વાત કરીએ તો રાજ્યમાં વરસાદને કારણે રોડ રસ્તાની સ્થિતિ બિસ્માર બનતા સ્થાનિકોએ હાલાકી વેઠવાનો વારો આવ્યો છે. મહાનગરોમાં રોડ રસ્તાની બદ્દત્તર સ્થિતિને કારણે નાગરિકો વિરોધ નોંધાવી રહ્યા છે.
રાજકોટ: વોર્ડ નં.18ના સ્થાનિકોનો વિરોધ
રાજકોટમાં ખખડધજ રોડ રસ્તાને લીધે સ્થાનિકો રોષે ભરાયા છે. વોર્ડ નંબર 18ના લોકોએ ખરાબ રોડને લઇને વિરોધ નોંધાવ્યો. ગોંડલ રોડથી સાંઇબાબા સર્કલ સુધી રોડ એકદમ ખરાબ છે. તેમાં પણ વરસાદને કારણે ખાડા પડી ગયા છે.આવી સ્થિતિને કારણે અનેકવાર અકસ્માતના બનાવો બન્યા છે પરંતુ તંત્ર દ્વારા કોઇ ધ્યાન અપાતું ન હોવાનો સ્થાનિકોએ આરોપ લગાવ્યો. ભારે વાહનોને કારણે રોડ બેસી જાય અને તેમાં ખાડા પડ્યા હોવાનો પણ આક્ષેપ કર્યો.
સુરત: પહેલા વરસાદમાં રોડ બેસી ગયો
તો આ તરફ સુરત મનપાની પ્રિ-મોનસૂન કામગીરી સામે પણ સવાલો ઉઠ્યા છે. પહેલા વરસાદમાં જ રોડ રસ્તાનો મેકઅપ ધોવાઇ ગયો. ભટાર સહિતના અનેક વિસ્તારોમાં રોડ બેસી ગયો હોવાના બનાવો બન્યા છે. અંદાજિત 100થી 150 મીટરનો રોડ બેસી ગયો. આ ઉપરાંત અનેક સ્થળ પર ભુવા પડતા વાહનચાલકોએ પરેશાન થવાનો વારો આવ્યો છે. ચોમાસામાં આવા બિસ્માર રોડ રસ્તાને લઇને લોકોમાં ભારે રોષની લાગણી જોવા મળી રહી છે.
વડોદરા : વરસાદ પડતા રસ્તાઓ બિસ્માર
વડોદરાના શહેરાના છેવાડા વિસ્તારમાં રોડ રસ્તાની ખસ્તા હાલત જોવા મળી. શેરખી ગામની સિમમાં વરસાદ પડતા જ રોડ રસ્તા બિસ્માર બન્યા. તો બીજી તરફ રેલવેની કામગીરીમાં બનાવેલા નાળાનું કામ પણ અધુરુ રહેતા લોકોએ હાલાકી વેઠવાનો વારો આવ્યો છે. અવર જવર માટેનો જે રસ્તો બનાવ્યો હતો તેમાં પણ ખાડા પડતા સ્થાનિકો જીવના જોખમે અહીંથી પસાર થવા મજબૂર બન્યા છે.
પહેલા વરસાદમાં રસ્તા બિસ્માર, શું કરી રહ્યું છે તંત્ર ?
મહત્વનું છે કે તંત્ર દ્વારા ટેન્ડર બહાર પાડીને કરોડોના ખર્ચે રોડ રસ્તાની કામગીરી સોંપવામાં આવે છે. પરંતુ કોન્ટ્રાક્ટરોને તો માત્ર પૈસાથી જ મતલબ હોય તેમ ઉપર છલ્લી કામગીરી કરીને કરોડો રૂપિયા પડાવી લે છે. પરંતુ વરસાદના સમયે તો રોડ રસ્તાની કામગીરી ઉડીને આંખે વળગે છે. પહેલા વરસાદમાં જો મહાનગરોમાં રોડ રસ્તા પર ખાડા અને ભૂવા પડ્યા હોય તો આગામી દિવસોમાં કેવી સ્થિતિ હશે તેની કલ્પના કરવી મુશ્કેલ છે. એક તરફ નાગરિકો દ્વારા સમયસર વેરો ભરવામાં આવે તેમ છતાં પ્રાથમિક સુવિધાના નામે તંત્ર હલકી ગુણવત્તા ધરાવતી કામગીરી કરાવે તેનો શું મતલબ ? તંત્ર દ્વારા પ્રિમોન્સૂન કામગીરીને લઇને મોટી મોટી વાતો કરવામાં આવે છે પંરતુ ચોમાસામાં તો પરિસ્થિતિ એની એજ જોવા મળે છે. જનતાએ તો મુશ્કેલી વેઠવાનો જ વારો આવે છે.