ખુલાસો / સફાઈ કામદાર વિદ્યાર્થીઓને ભણાવતો હોવાના VIDEO મામલે આચાર્યની સ્પષ્ટતા, કહ્યું વીડિયો વાયરલ કરનાર મને.....

• રાજકોટની શાળા નંબર 62ના વાયરલ વીડિયોનો મામલો
• પ્રિન્સિપાલે વાયરલ વીડિયો અંગે આપ્યું નિવેદન
• વીડિયો બનાવનારો મને અવારનવાર આપે છે ધમકીઃ આચાર્ય

રાજકોટની સોરઠીયા વાડી શાળામાં સફાઈ કામદાર બાળકોને શિક્ષણ આપતો હોવાનો વીડિયો વાયરલ થતા શાળાના મહિલા આચાર્યએ આ મામલે સ્પષ્ટતા કરી છે. તેઓએ આ વાયરલ વીડિયોમાં કરવામાં આવેલા દાવાને ફગાવી દીધો છે.

વીડિયો વાયરલ કરનારાએ મને બદનામ કરવા પ્રયાસ કર્યો- આચાર્ય
રાજકોટની શાળા નંબર 62ના આચાર્ય આનંદીબેન પટેલે જણાવ્યું કે, સફાઈ કામદાર બાળકોને અભ્યાસ કરાવી રહ્યા નથી. વીડિયોમાં દેખાતો વ્યક્તિ માત્ર મદદ માટે આવ્યો હતો. વીડિયો વાયરલ કરનારાએ મને બદનામ કરવાનો પ્રયાસ કર્યો છે. વીડિયો બનાવનારો મને અવારનવાર ધમકી આપે છે. મેં પર્સનલ લોન લીધી હોવાથી રૂપિયાની ઉઘરાણી માટે ધમકી આપે છે. 

રાજકોટની સરકારી શાળાનો વીડિયો થયો હતો વાયરલ 
રાજકોટની સરકારી શાળા વધુ એક વખત વિવાદમાં સપડાઈ હતી. આ વીડિયો સોરઠીયા વાડી વિસ્તારની શાળા નંબર-62નો હોવાનું જાણવા મળ્યું હતું. જેમાં સફાઇ કામદાર બાળકોને અભ્યાસ કરાવતો હોવાનું સામે આવતા વાલીઓમાં આક્રોશની જ્વાળા ભભૂકી હતો. તો આ વીડિયોને લઈને શિક્ષણ વિભાગની કામગીરી સામે સવાલો ઉભા થયા હતા.

સફાઈ કામદાર વિદ્યાર્થીઓને ભણાવતો હતો શિક્ષણના પાઠ
આ અંગેનો વીડિયો સોશિયલ મીડિયામા વાયરલ થયો હતો. જેમાં શિક્ષકોના કહેવાથી હું દરરોજ સ્કૂલે આવું છું તેવું સફાઇ કામદારએ રટણ રટ્યું હતું. મને કંઇ કહેશો તો તમારી પર ફોન આવશે તેવી ગર્ભિત ધમકી પણ આપી હતી. આ વીડિયોને લઈને શાળામાં બહારના માણસના પ્રવેશથી શિક્ષણ વ્યવસ્થા અને બાળકોની સલામતી સામે પણ સવાલો ઉભા થયા હતા.