ભારતમાં મોંઘવારીએ મધ્યમવર્ગને કમર તોડી નાંખી છે ત્યારે ક્રૂડ ઓઇલના ભાવમાં ઘટાડો આવે તેવી શક્યતા છે.
મોંઘવારી વચ્ચે રાહતના સમાચાર
પેટ્રોલ-ડીઝલના ઘટી શકે છે ભાવ
ક્રૂડ ઓઇલના ભાવમાં 10 ટકા ઘટાડો
ભારતમાં વધતી મોંઘવારી વચ્ચે પેટ્રોલ અને ડીઝલ પર મોટી રાહત મળી શકે છે. વૈશ્વિક સ્તરે ક્રૂડ ઓઇલની માંગમાં ઘટાડો થાય તેવી શક્યતા છે ત્યારે કાચા તેલના ભાવમાં ઘટાડો થતાં પેટ્રોલ અને ડીઝલની કિંમતોમાં પણ રાહત મળી શકે છે.
લોકડાઉનના કારણે માંગ ઘટશે
કોરોના વાયરસ સંકટના કારણે વિશ્વના અનેક દેશોમાં ફરીથી લોકડાઉન જેવા પ્રતિબંધ લગાવી દેવાની શરૂઆત કરવામાં આવી છે. ગત વર્ષે પણ લોકડાઉનના કારણે પેટ્રલ ડીઝલની માંગમાં ઘટાડો થયો હતો ત્યારે આ લોકડાઉનના કારણે ફ્યુલની માંગ ઘટે તેવા અણસાર છે. વૈશ્વિક બિઝનેસ પર નજર રાખતા નિષ્ણાતો માની રહ્યા છે કે આગામી સમયમાં ક્રૂડ ઓઇલના ભાવના ઘટાડો થઈ શકે છે. અન્ય દેશોમાં લોકડાઉન સહિતના અંકુશોને જોતાં ક્રૂડ ઓઇલના ભાવમાં 10%નો ઘટાડો આવી શકે છે.
મોટા ભાગના શહેરમાં ઑલ ટાઈમ હાઇ છે કિંમતો
નોંધનીય છે કે આશરે મહિના પહેલા ઈંધણના ભાવમાં જોરદાર ઉછાળો આવ્યો હતો. જે બાદ પ્રજામાં ભારે રોષ પણ જોવા મળ્યો હતો. તે બાદથી પેટ્રોલ અને ડીઝલના ભાવ સ્થિર થઈ ગયા છે. પેટ્રોલના ભાવ વધી નથી રહ્યા પણ ઘટી પણ નથી રહ્યા. આજે ઘણા શહેરોમાં પેટ્રોલ ડીઝલના ભાવ 100ને પાર થઈ ગયા છે ત્યારે વિધાનસભાની ચૂંટણી પહેલા પેટ્રોલ ડીઝલના ભાવમાં ઘટાડો આવે તેવી શક્યતા માનવામાં આવી રહી છે.
ચૂંટણી સમયે જ નથી વધતાં પેટ્રોલ ડીઝલના ભાવ
ભારતમાં પેટ્રોલ ડીઝલના ભાવની અસર ચૂંટણીઓ પર ન પડે તે માટે ચૂંટણી નજીક આવે તેમ ભાવને સ્થિર કરી દેવામાં આવે છે અને જેવી ચૂંટણી સમાપ્ત થાય ફરીથી કિંમતો વધારી દેવામાં આવે છે. ઓકટોબર-નવેમ્બર મહિનામાં જ્યારે બિહારમાં વિધાનસભા ચૂંટણી હતી તે સમયે પણ સતત 48 દિવસ સુધી પેટ્રોલની કિંમતો સ્થિર થઈ ગઈ હતી. હવે પાંચ રાજ્યોમાં ચૂંટણી છે ત્યારે છેલ્લા એક મહિનાથી પેટ્રોલના ભાવ સ્થિર થઈ ગયા છે અને આગામી સમયમાં પણ ભાવ નહીં વધે તેવું માનવામાં આવી રહ્યું છે.
24 દિવસથી સ્થિર છે કિંમતો
જાણકારો એમ પણ માને છે કે વિધાનસભાની ચૂંટણીના કારણે જ પેટ્રોલ ડીઝલના ભાવ અત્યારે સ્થિર છે. છેલ્લા 24 દિવસથી પેટ્રોલ ડીઝલના ભાવમાં કોઈ જ બદલાવ આવ્યો નથી. જોકે ભારતમાં અત્યારે કોઈ પણ શહેરમાં ઈંધણના ભાવ ઑલ ટાઈમ હાઇ ચાલી રહ્યા છે. દિલ્હીમાં આજે પેટ્રોલ 91.17 જ્યારે ડીઝલ 81.17 રૂપિયા પ્રતિ લિટર પર મળી રહ્યું છે.